Son illərdə Özbəkistan kibertəhlükəsizlik şəbəkəsini olduqca gücləndirib. Bir neçə qanunvericilik aktı və proseduru yenilənib. Bu da müvafiq qanunvericilik bazasını əhəmiyyətli dərəcədə təkmilləşdirib. Həmçinin bu sahədə işlərin gücləndirilməsi ilə bağlı Prezident qərarı, fərmanı imzalanıb. Bundan həm dövlət, həm də özəl sektor nümayəndələri faydalanacaqlar.
AZƏRTAC xəbər verir ki, bunu Özbəkistan Respublikasının Kibertəhlükəsizlik Mərkəzinin Dövlət qurumlarında kibertəhlükəsizlik məsələlərinin koordinasiyası şöbəsinin müdiri Azamat Abdullayev Dövlət Təhlükəsizliyi Xidmətinin Milli Kibertəhlükəsizlik Mərkəzinin əsas tərəfdaşlığı ilə Azərbaycan Kibertəhlükəsizlik Təşkilatları Assosiasiyası tərəfindən Bakıda keçirilən “4-cü Milli Kibertəhlükəsizlik Forumu” çərçivəsində təşkil olunan "Regional təcrübə və əməkdaşlıq" mövzusunda panel sesiyada çıxışı zamanı deyib.
"Bizim mərkəz Özbəkistan ərazisində olan insidentləri və hadisələri təhlil edir, onları araşdırır. Biz, həmçinin bütün cavab tədbirləri arasında koordinasiya işlərini idarə edir, hədəfləri və təhdidləri təhlil edib, onları maraqlı tərəflərə çatdırırıq. Bundan əlavə, bütün dövlət qurumlarının iştirakı ilə kibertapşırıqlar həyata keçiririk. Bu işləri görərkən bir neçə çətinliklə rastlaşmışıq. Bütün sektor üzrə təmsil olunan dövlət qurumları səlahiyyətlərini aydın şəkildə bilir. Keçirdiyimiz treninqlər sahəsində onların mindən artıq əməkdaşının bilik və bacarıqları yeni səviyyəyə qaldırılıb. Ölkəmizdə də bu sahədə resurs qıtlığı mövcuddur. Ona görə də çalışırıq ki, bunu arada qaldıraq. Bu sahədə olan bilik və bacarıqlar real təcrübə əsasında inkişaf etdirilə bilər. Bu isə uzunmüddətli bacarıqların inkişafı sahəsində mümkündür. Biz milli dayanıqlılığa keçid etməyi hədəfləyirik. Bunun üçün praktik təcrübə lazımdır və davamlı ixtisasartırma tələb olunur”, - deyə o diqqətə çatdırıb.
Azamat Abdullayev deyib ki, digər önəmli istiqamət akademik istedadın inkişafı və ali təhsil müəssisələri ilə əməkdaşlıqdır: “Bu istiqamətdə çalışırıq. Biz davamlı monitorinq və təkmilləşmə işinə də çox böyük diqqət yetiririk. Burada müvafiq təlimlər keçirilir. Bunlar əsas səmərəli işlərdən biridir. Kibertəlimlər, real ssenarilər və simulyasiyalar əsasında müxtəlif müsabiqələr keçiririk. Həmçinin bizim mütəxəssislər beynəlxalq kibertəhlükəsizlik yarışlarında iştirak edirlər”.
O vurğulayıb ki, Özbəkistan uzunmüddətli kibertəhlükəsizlik hazırlığına investisiya edir: “Kibertəhlükəsizlik klubları təşkil olunur və tələbələr, gənc peşəkarlar buraya cəlb olunurlar. Ölkədə, eyni zamanda, Kiberuniversitet yaradılıb. Burada kibertəhlükəsizlik və məlumat təhlükəsizliyi kursları təşkil edilib. Bir çox universitetlər kibertəhlükəsizlik proqramları tətbiq edir, yeni kiberlaboratoriyalar davamlı olaraq açılır. Biz beynəlxalq təşkilatlarla və özəl şirkətlərlə birlikdə müxtəlif sertifikat proqramları, tədbirlər həyata keçiririk. Kibertəhlükəsizlik potensialının artırılması birdəfəlik səy, plan, layihə deyil. Bu, uzunmüddətli səylərin nəticəsidir. Texnologiyalar təklikdə kibertəhlükəsizliyi təmin edə bilməz. Peşəkarlar, əməliyyat qaydaları və beynəlxalq əməkdaşlıq eyni zamanda önəmlidir".
