Hər ili uğurla yola salan ağstafalılar cari ildə də kənd təsərrüfatının əksər sahələri üzrə yüksək göstəricilər əldə edirlər. Xüsusilə taxılçılıq üzrə bu mövsüm bütün gözləntilər özünü doğrultmuşdur.
Qeyd edək ki, cari ilin məhsulu üçün 8187,2 hektar sahədə taxıl əkilmişdir. Onun 4812,3 hektarı buğda, 3374,9 hektarı arpa olmuşdu. Buğda sahəsinin hər hektarından 34, arpa sahəsinin hər hektarından isə 28 sentner məhsul götürülmüşdür ki, bu da əvvəlki ildəki göstəricidən çoxdur.
Taxıl istehsalında yenə də fərqlənən fermerlər olmuşdur. İri fermer təsərrüfatlarından Elxan Cürənli 130, Köçəsgər kənd sakinləri Gülbəniz Mehdiyeva 70, Elmira İsmayılova 20 və Komsomol Məmmədov 18 hektar buğda sahələrindən bol məhsul götürmüşlər. Taxıl istehsalında rayonun Göycəli, Köçəsgər, Eynallı, Dağ Kəsəmən və Qıraq Kəsəmən kəndləri fərqlənmişlər.
Taxıldan savayı, rayon üzrə 552,5 hektarda kartof, 1592,3 hektarda yazlıq və yaylıq günəbaxan, 264,3 hektarda qarğıdalı, 852,2 hektarda tərəvəz və bostan məhsulları əkilmişdir.
Meyvə bağlarından da yüksək məhsuldarlıq gözlənilir. Hazırda Ağstafada 1640,9 hektar meyvə bağları mövcuddur. Cari ilin ötən dövrü ərzində bağlardan 6148,6 ton meyvə yığılmışdır. Rayonda intensiv tipli bağların salınmasına da maraq artır. "Kur Fruit Company" MMC 160, Kolxəlifəli kəndində Səxavət Binnətov 55 hektarda intensiv meyvə, Aşağı Göycəli kəndində Nazim Əhmədov 6, Zəlimxan kəndində Elfaq Mamayev 1,49 hektarda intensiv fındıq bağları salmışlar. Həmin bağlardan yüksək məhsuldarlıq gözlənilir.
Rayonun 466,6 hektara yaxın üzüm bağı da var. Üzümçülük sahəsi gəlirli olduğu üçün fermerlər arasında bu sahəyə maraq getdikcə artmaqdadır. Ötən il hər hektar üzüm bağından orta hesabla 153 sentner məhsul götürən fermerlər bu il məhsuldarlığın yüksək olacağına ümid edirlər.
Sabir ƏLİYEV,
"Azərbaycan"
