İctimai rəyin formalaşmasında, milli mədəniyyətin
və dilin qorunub saxlanmasında müstəsna rol oynayan milli mətbuat hər bir dövlət
üçün vacib institutdur. Xüsusilə hibrid savaşların, informasiya müharibəsinin
aktuallaşdığı dövrdə medianın rolu ön plana çıxıb. Artıq elə bir tendensiya
yaranıb ki, dövlətin təhlükəsizliyinin möhkəmləndirilməsində KİV-lər də iştirak
edir.
150 illiyini qeyd edən Azərbaycan milli mətbuatı
da uzun və keşməkeşli inkişaf yolu keçib. 1875-ci ildə “Əkinçi” ilə yola çıxan
Azərbaycan mətbuatı bütün inkişaf mərhələlərində milliliyi qoruyub saxlayıb.
Milli özünüdərk və istiqlal məfkurəsinin formalaşmasında, qabaqcıl ideyaların təbliğində
böyük xidmətlər göstərib. Ulu Öndər Heydər Əliyev deyirdi ki, “Milli mətbuatımızın
inkişaf mərhələləri Azərbaycan xalqının azadlıq, müstəqillik uğrunda mübarizə
tarixinin tərkib hissəsidir. “Əkinçi”dən üzü bəri azadlıq, demokratiya, müstəqillik
uğrunda mücadilə dərslərini biz milli mətbuatımızın səhifələrindən öyrənmişik.”
Müstəqillik dövründə Azərbaycanda müasir kütləvi
informasiya vasitələrinin formalaşması və inkişafı üçün geniş imkanlar yarandı.
Belə ki, 1993-cü ildən başlayaraq Ümummilli Lider Heydər Əliyevin rəhbərliyi ilə
həyata keçirilən islahatlar nəticəsində ölkədə senzura, söz və məlumat azadlığını
məhdudlaşdıran digər süni maneələr aradan qaldırıldı. Medianın fəaliyyətini tənzimləyən
mütərəqqi qanunvericilik bazası yaradıldı. Məhz bu ali dəstək nəticəsində ölkəmizdə
mətbuat azadlığı prinsipləri bərqərar oldu.
İnformasiya resurslarının iqtisadi müstəqilliyinin
gücləndirilməsi və jurnalistlərin sosial müdafiəsinin yaxşılaşdırılması istiqamətində
ardıcıl tədbirlər görülür.
Azərbaycan mediası həm birinci, həm də ikinci
Qarabağ müharibələrində üzərinə düşən vəzifəni layiqincə yerinə yetirib. Uzun
illər işğala məruz qalan dövlətin həqiqətlərini dünya ictimaiyyətinə çatdırmaq
missiyasını yerinə yetirib. Ölkəmizə qarşı hər zaman həyata keçirilən ikili
standartlar siyasətilə mübarizədə milli mətbuatımız ön sırada olub.
Peşəkar Azərbaycan jurnalisti həm də vətənpərvər,
təmsil etdiyi dövlətin milli maraqlarını bütün maraqlardan üstün tutmaqla fərqlənir.
44 günlük Vətən müharibəsi zamanı mediamız əsl
vətənpərvərlik, həmrəylik nümunəsi ortaya qoydu. Ölkəmizə qarşı aparılan çirkin
dezinformasiya müharibəsinin qalibi oldu. Azərbaycanın haqq səsi dünya
ictimaiyyətinə çatdırıldı. Düşmənin və onun havadarlarının saxta məlumatları
yüksək peşəkarlıqla ifşa olundu.
2020-ci il
44 günlük Vətən müharibəsi zamanı Azərbaycanın öz ərazi bütövlüyünü bərpa
etməsi bölgədə yeni reallıqlar yaratdığı kimi milli mətbuatımız üçün də yeni
prioritetlər formalaşdırıb.
Təsadüfi deyil ki, hazırda ölkəmizdə çoxlu
sayda müxtəlif qəzet və jurnallar nəşr olunur, internet qəzetçilik inkişaf
edir. Müasir dövrdə informasiya texnologiyalarının inkişafı Azərbaycan mətbuatını
qlobal informasiya şəbəkəsinin bir hissəsinə çevirib.
Prezident İlham Əliyevin milli mətbuatın 150
illiyinin yüksək səviyyədə qeyd olunması ilə bağlı sərəncamı ali diqqət və
qayğının növbəti təzahürüdür. Bir neçə gün əvvəl Xankəndidə keçirilən 3-cü Şuşa
Qlobal Forumunda cənab Prezident Azərbaycan mətbuatını milli maraqları müdafiə
edən güclü platforma kimi qiymətləndirdi. Dövlət başçımızın da bəyan etdiyi
kimi, “Azərbaycan mediası nəinki ölkə daxilində, hətta beynəlxalq müstəvidə çox
böyük nüfuz qazanıb. Azərbaycan mediası dövlət maraqlarını qorumağa qadirdir.
Ölkəmizə qarşı olan əsassız ittihamları arqumentlərlə, ciddi təhlil və faktlar əsasında
ifşa etməkdə də böyük uğurlar əldə edib.”
Bir sözlə, bu gün mediamız Azərbaycanın tərəqqisinin,
müasir cəmiyyət quruculuğu prosesinin fəal iştirakçısıdır. Əminliklə söyləyə
bilərik ki, qalib Azərbaycanın milli mətbuatı ən güclü dövrünü yaşayır.
Nigar MƏMMƏDOVA,
Milli Məclisin deputatı
