Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Əhməd Şövki: Misirin arxitektura mədəniyyətinin formalaşmasında azərbaycanlı memarların böyük əməyi olub

26 Sentyabr 2017
Azərbaycan Respublikasının Prezidenti yanında Bilik Fondu əhalinin maarifləndirilməsi, gənclərin ölkə və dünya mədəniyyətinin müxtəlif sahələri üzrə elmi biliklərinin artırılması, onların "İslam Həmrəyliyi İli"ndə “Dünya elmi Azərbaycanda” layihəsi çərçivəsində tanınmış elm və mədəniyyət xadimləri ilə görüşlərinin təşkili istiqamətində silsilə tədbirlərini davam etdirir.

Sentyabrın 26-da Bilik Fondunun təşkilatçılığı, Misir Ərəb Respublikasının ölkəmizdəki səfirliyinin Mədəniyyət və Təhsil Əlaqələri Mərkəzinin dəstəyi ilə Azərbaycan Memarlıq və İnşaat Universitetində (AzMİU) Misir Milli Kitabxanası və Arxivlərinin müdiri, Ayn Şəms Universitetinin professoru, İslam arxeologiyası üzrə tanınmış alim Əhməd Seyyid Muhəmməd Şövkinin görüşü və “İslam memarlığı” mövzusunda mühazirəsi keçirilib.

Bilik Fondundan AZƏRTAC-a bildiriblər ki, memarlıq ixtisası üzrə təhsil alan tələbələrin qatıldıqları görüşdə Mədəniyyət və Təhsil Əlaqələri Mərkəzinin müdiri Əhməd Sami Elaydi qonağı təqdim edib, onun fəaliyyəti barədə məlumat verib. Mərkəzin rəhbəri təmsil etdiyi qurumun Bilik Fondu ilə birlikdə həyata keçirdiyi tədbirlərdən də danışıb.

Maraqlı görüşə görə Bilik Fonduna və AzMİU-nun rəhbərliyinə minnətdarlığını bildirən Əhməd Şövki təmsil etdiyi ölkənin tarixi abidələri - arxitekturasının orijinallığı ilə seçilən dini məbədləri barədə 3d formatında hazırlanmış slayd vasitəsilə geniş məlumat verib.

Tikililərin sxemindən danışan misirli professor ölkəsinin 989-cu illərdə arxitektura mədəniyyətinin formalaşmasında azərbaycanlı memarların böyük əməyi olduğunu xatırladıb.

Sonda Ə.Şövki tələbələrin suallarını cavablandırıb.