Yaponiya sürətlə inkişaf edən robototexnika sahəsində infrastruktur layihələrinə daha birini əlavə etdi. Ölkədə insanabənzər robotların texniki qulluq və təmir ehtiyaclarına yönəlmiş diqqətçəkən bir təşəbbüs həyata keçirilir.
Yaponiyada yerləşən “GMO Internet Group” texnologiya şirkəti sıradan çıxan insanabənzər robotlara yerində baxım və təmir dəstəyi göstərmək üçün xüsusi “robot təcili yardım maşını” hazırlayıb.
Yaxın vaxtlarda xidmətə verilməsi planlaşdırılan nəqliyyat vasitəsi robotların olduğu ünvanlara gedərək müdaxilə edəcək. Problem yerində həll olunmazsa, robot təmir mərkəzinə aparılacaq, ehtiyac yarandıqda isə müvəqqəti olaraq başqa bir robotla əvəz ediləcək. Təcili yardım maşınında nasazlıqları aradan qaldırmaq üçün xüsusi təlim keçmiş mühəndis fəaliyyət göstərəcək.
Mikroavtobus tipli ənənəvi təcili yardım avtomillərinə bənzəyən nəqliyyat vasitəsinin xarici tərtibatında onun təyinatını bildirən xüsusi qrafik elementlər öz əksini tapıb. Şirkətin bu xidməti insanabənzər robotların geniş tətbiq olunması ilə yarana biləcək texniki qulluq ehtiyaclarına qarşı öncədən hazırlıq kimi qiymətləndirilir.
Yaponiyanın və böyük ehtimalla, dünyanın insanabənzər robotların baxımı və təmiri üçün xüsusi ayrılmış ilk nəqliyyat vasitəsi olan bu təcili yardım maşını, ölkənin sürətlə inkişaf edən yüksək texnologiya sektorunun yarada biləcəyi problemlərə indidən həll yolu tapmaq səylərinin maraqlı bir nümunəsidir.
“McKinsey & Co” konsaltinq şirkətinin proqnozlarına görə, qlobal robototexnika bazarının 2040-cı ilə qədər təxminən 370 milyard dollara çatması gözlənilir. Çinin növbəti 15 il ərzində bu ümumi dəyərin yarısını əldə edəcəyi ehtimal olunur, Yaponiya hökuməti isə 30 faizlik bazar payı hədəfləyir. Bu da təxminən 125 milyard dollarlıq göstəriciyə bərabərdir.
Yasəmən MUSAYEVA,
“Azərbaycan”
