Avropa ilə Asiyanın qovşağında yerləşən Azərbaycan həm Şərq-Qərb, həm də Şimal-Cənub istiqamətlərində mühüm nəqliyyat bağlantılarının üzərində yerləşir. Xüsusilə Xəzər dənizi üzərindən həyata keçirilən yükdaşımalar Mərkəzi Asiya ölkələrinin Avropa bazarlarına çıxışında alternativ və strateji marşrut formalaşdırır.
Bunu AZƏRTAC-a açıqlamasında türk iqtisadçı-ekspert Canip Nuray deyib.
Ekspert Azərbaycanın əlverişli coğrafi mövqeyinin Mərkəzi Asiya ölkələrinin beynəlxalq bazarlara çıxışında ölkəmizin tranzit əhəmiyyətini artırdığını bildirib. Onun sözlərinə görə, Azərbaycanın nəqliyyat infrastrukturunu son illərdə əhəmiyyətli dərəcədə inkişaf etdirilib.
“Ələt Beynəlxalq Dəniz Ticarət Limanı, Bakı-Tbilisi-Qars dəmir yolu xətti və digər regional nəqliyyat layihələri ölkəmizin tranzit imkanlarının genişlənməsinə şərait yaradıb. Bu layihələr Mərkəzi Asiya ölkələrindən gələn yüklərin Xəzər dənizi vasitəsilə Azərbaycana, buradan isə Gürcüstan və Türkiyə üzərindən Avropa istiqamətinə daşınması üçün mühüm imkanlar yaradır. Orta Dəhlizin inkişafı Azərbaycanın tranzit potensialının daha da artırılması baxımından xüsusi əhəmiyyət daşıyır. Mərkəzi Asiya ölkələrinin istehsal etdiyi sənaye və kənd təsərrüfatı məhsullarının dünya bazarlarına çıxarılmasında bu marşrutun imkanlarından istifadə qarşılıqlı iqtisadi əlaqələrin genişlənməsinə xidmət edir”, - deyə Canip Nuray qeyd edib.
Ekspertin fikrincə, nəqliyyat bağlantılarının inkişafı ilə yanaşı, enerji sahəsində əməkdaşlığın genişləndirilməsi də regional iqtisadi təhlükəsizliyin mühüm elementlərindən biridir. Azərbaycanın enerji infrastrukturu və beynəlxalq enerji layihələrində iştirakı ölkənin Avropa və Asiya arasında enerji əməkdaşlığında rolunu gücləndirir: “Azərbaycanın coğrafi mövqeyi və formalaşdırdığı müasir nəqliyyat infrastrukturu bütün üzv dövlətlər üçün yeni iqtisadi imkanlar yaradır. Xəzər dənizi üzərindən tranzit daşımaların artırılması Mərkəzi Asiya ölkələrinin dünya bazarlarına çıxışını asanlaşdırmaqla yanaşı, Azərbaycanın regional logistika mərkəzi kimi mövqeyini də möhkəmləndirir”.
O əlavə edib ki, gələcəkdə tranzit marşrutlarının səmərəliliyinin artırılması, limanların və dəmir yolu infrastrukturunun imkanlarının genişləndirilməsi, rəqəmsal gömrük və logistika sistemlərinin tətbiqi region ölkələri arasında ticarət dövriyyəsinin artmasına müsbət təsir göstərə bilər.
Canip Nurayın sözlərinə görə, Azərbaycan üzərindən həyata keçirilən nəqliyyat və enerji layihələri yalnız ölkələrin iqtisadi maraqlarına deyil, bütövlükdə Avrasiya məkanında dayanıqlı və təhlükəsiz bağlantıların formalaşmasına xidmət edir.
jpeg_1789974439.jpeg)
jpg_1789895854.jpg)
