Regionda sülh və normallaşma prosesinin davamlı xarakter alması Cənubi Qafqazın geosiyasi və geoiqtisadi əhəmiyyətini daha da artırır. Qarşıdakı mərhələdə sülhün əsas nəticələrindən biri bütün region ölkələri arasında iqtisadi və nəqliyyat əlaqələrinin genişlənməsi, bununla da yeni inkişaf imkanlarının formalaşması olacaq. Bu baxımdan Orta Dəhliz xüsusi strateji əhəmiyyət daşıyır.
Bu fikirləri AZƏRTAC-a açıqlamasında Azərbaycan Milli QHT Forumunun (AMQF) İdarə Heyətinin sədri Ramil İskəndərli söyləyib.
Onun sözlərinə görə, Orta Dəhliz artıq yalnız bir nəqliyyat marşrutu kimi nəzərdən keçirilə bilməz. Bu dəhliz Avropa ilə Asiya arasında ticarət, logistika, investisiya və iqtisadi əməkdaşlığın yeni platformalarından birinə çevrilməkdədir. Azərbaycanın coğrafi mövqeyi isə ölkəmizə bu prosesdə xüsusi üstünlüklər qazandırır: “Azərbaycan Xəzər dənizi vasitəsilə Mərkəzi Asiya, Cənubi Qafqaz, Türkiyə və Avropa istiqamətlərini birləşdirən mühüm halqa rolunu oynayır. Ölkəmizin isə bu prosesdəki rolu onun regional “orta güc” kimi strateji mövqeyini də nümayiş etdirir. Müasir beynəlxalq münasibətlər sistemində orta güclərin əhəmiyyəti yalnız hərbi və siyasi potensialla deyil, müxtəlif regionlar və güc mərkəzləri arasında iqtisadi, nəqliyyat və humanitar əlaqələrin qurulmasına verdiyi töhfə ilə də ölçülür. Azərbaycan coğrafi mövqeyindən və artan diplomatik imkanlarından istifadə etməklə Şərqlə Qərb, Şimalla Cənub arasında mühüm bağlantı məkanına çevrilir. Bu, ölkəmizin regional və beynəlxalq proseslərdə çəkisini artıran mühüm amildir. Xüsusilə sülh və normallaşma prosesinin möhkəmlənməsi Azərbaycanın bu imkanlarından daha geniş istifadə etməsinə şərait yarada bilər”.
AMQF-nin sədri, xüsusilə Naxçıvanın gələcəkdə bu prosesdə mühüm strateji rol oynaya biləcəyini diqqətə çatdırıb. “Bu bölgə qarşıdakı illərdə Azərbaycanın ən dinamik inkişaf edən strateji məkanlarından birinə çevrilə bilər. Sülh və regional kommunikasiyaların inkişafı Naxçıvan üçün tamamilə yeni iqtisadi imkanlar yaradır. Burada məsələ yalnız nəqliyyat bağlantısının təmin olunmasından getmir. Naxçıvanı logistika, ticarət, turizm, xidmət və investisiya mərkəzlərindən birinə çevirmək üçün geniş perspektivlər mövcuddur. Naxçıvan Türkiyə və daha geniş Avrasiya məkanı ilə iqtisadi əlaqələrin mühüm qovşaqlarından biri ola bilər. Bu isə Naxçıvanda yeni müəssisələrin, xidmət sahələrinin və iş yerlərinin yaranmasına, əhalinin sosial rifahının yüksəlməsinə ciddi töhfə verə bilər”, - deyə o vurğulayıb.
Ramil İskəndərli qeyd edib ki, Orta Dəhlizin inkişafı, Mərkəzi Asiya ilə əlaqələrin dərinləşdirilməsi, Türkiyə ilə strateji tərəfdaşlığın genişləndirilməsi və regional sülhün möhkəmləndirilməsi bir-birini tamamlayan proseslərdir. Azərbaycan bu imkanları düzgün şəkildə əlaqələndirir, ölkəmizin regional və beynəlxalq əhəmiyyətini daha da artırmaqda davam edir: “Azərbaycanın nəinki tranzit ölkə statusu güclənib, həm də ölkəmiz formalaşan yeni regional münasibətlər sistemində əlavə dəyər yaradan əsas aktorlardan birinə çevrilib”.
jpeg_1787209831.jpeg)
