Tarixin təkrarolunmaz bir hikməti var ki, bəzi nəşrlər, sadəcə, xəbər daşıyıcısı kimi doğulur, bəziləri isə millətin taleyi və zəfərləri ilə eyni gündə dünyaya göz açır. 1918-ci ilin 15 sentyabrında Bakı düşmən işğalından azad edilib bayrağımız paytaxtda dalğalandırılanda, həmin tarixi günün al şəfəqləri içində bir mətbuat möcüzəsi də həyata vəsiqə qazandı: "Azərbaycan" qəzeti!
Həmin tarixi gündə mətbuatımızın fədakar mühərrir və publisistlərinin qələmindən süzülən ilk nüsxələr azadlığın, hürriyyətin və istiqlalın carçısına çevrildi. Cəmi iki il sürən fəaliyyət dövründə qələmini istibdadı yıxan külüngə çevirən "Azərbaycan", 70 illik sovet qadağasından sonra yenidən dirçələrək müstəqil dövlətimizin, suverenliyimizin və bütövlüyümüzün rəsmi atributu kimi adını tarixə yazdırdı.
Vətənpərvərlik, milli idrak və dövlətçilik
Ərazilərimizin işğala məruz qaldığı, bir milyondan çox həmvətənimizin qaçqın və məcburi köçkün düşdüyü, daxili xaosun ölkəni sarsıtdığı o ağır illərdə "Azərbaycan" qəzeti xalqın faciəsini səhifələrinə həkk edən canlı şahid oldu.
"Azərbaycan" qəzetinin fəaliyyətinin ana xəttini hər zaman vətənpərvərlik, milli idrak və dövlətçilik təşkil edib. Birinci Qarabağ savaşından Aprel və Günnüt zəfərlərinə qədər xalqımızın və ordumuzun şücaətləri mütəmadi olaraq qəzetin səhifələrində geniş əksini tapıb. Torpaqlarımız işğal altında olduğu illərdə "Azərbaycan" qəzeti öz publisist yazıları, reportaj və şərhləri ilə Qarabağsız və Şərqi Zəngəzursuz böyüyən yeni nəslin milli şüurunu, vətənpərvərlik ruhunu daim diri tutub, bütöv Azərbaycan ideyasına xidmət edib.
O çətin illərdə qəzetin hər bir səhifəsi təkcə informasiya daşıyıcısı deyil, həm də itirilmiş yurd yerlərimizin canlı ensiklopediyası, unutmağa imkan verməyən mənəvi irs idi. Şuşanın, Laçının, Kəlbəcərin, Ağdamın, Cəbrayılın, Füzulinin... tarixi, mədəniyyəti, təbiəti və tanınmış şəxsiyyətləri haqqında dərc olunan silsilə məqalələr, xatirələr doğma torpaqları görməyən gənc nəslin təxəyyülündə həmin coğrafiyanı qarış-qarış canlandırırdı. Qəzetin qələm sahibləri oxucuya, sadəcə, həsrəti yox, həm də mütləq qayıdış inamını aşılayırdılar.
"Azərbaycan" qəzeti illərlə səbir və təmkinlə Böyük qayıdışın mənəvi-ideoloji bünövrəsini qoydu, cəmiyyətdə Vətən sevgisini və mübarizə əzmini daim alovlandırdı.
İşğal illərində sözlə, qələmlə qorunan o vətənpərvərlik ruhu illər sonra səngərdə real qəhrəmanlığa, Zəfər salnaməsinə çevrildi və "Azərbaycan"ın illərlə xidmət etdiyi bütöv Vətən amalı reallığa qovuşdu.
2020-ci ilin 44 günlük Vətən müharibəsində "Azərbaycan" qəzetinin əməkdaşları, sözün həqiqi mənasında, qələmlərini süngüyə çevirdilər. Müzəffər Ali Baş Komandan İlham Əliyevin "Qarabağ Azərbaycandır!" nidasını, dövlət başçısının sosial şəbəkələr üzərindən verdiyi Qələbə müjdələrini xalqın böyük coşqusu ilə bir ahəngdə oxuculara çatdıran redaksiya heyəti tarixi zəfərin fəal salnaməçisinə çevrildi.
Həmin günlərdə redaksiya əməkdaşlarının qələmə aldıqları məqalələrdə, reportajlarda İkinci Qarabağ savaşının mənzərəsi dəqiqliyi ilə tarixə həkk edildi. Arxa cəbhədə düşmənin raket atəşinə tutduğu dinc şəhər və kəndlərimizdən hazırlanan materiallar isə düşmən terrorunu ifşa edən sənədli yaddaşa çevrildi. Bu baxımdan, "Azərbaycan" qəzeti gələcək nəsillər üçün Zəfər tariximizin əvəzsiz mənbəyidir.
2023-cü ilin sentyabrında keçirilən birgünlük lokal antiterror əməliyyatı ilə Azərbaycan öz suverenliyini ölkənin hər bir qarışında tam təmin etdi, Xankəndidə, Xocalıda, Əsgəranda, Xocavənddə və Ağdərədə üçrəngli bayrağımız qürurla dalğalandı. Bu unudulmaz hadisə "Azərbaycan" qəzetinin səhifələrində Zəfər salnaməsinin ən zirvə nöqtəsi kimi tarixləşdi. Müzəffər Ali Baş Komandanın Xankəndi şəhərində bayrağımızı ucaltması, tarixi ədalətin bərpa olunması xəbərlərini böyük coşqu ilə oxuculara çatdıran qəzetimiz bir əsr öncə cümhuriyyət qurucularının qəlbində tutuşan tam və bütöv Azərbaycan idealının reallığa qovuşmasını bütün təfərrüatı ilə gələcək nəsillərin yaddaşına ötürdü.
Qürurverici səhifələr
İşğaldan azad edilmiş torpaqlara həyatın qayıdışını əks etdirən rubrikalar qəzetin ən kövrək və qürurverici guşələridir. "Biz qayıtdıq, Vətən!", "Şəhidlər ölməz, vətən bölünməz", "Tarix yazan oğullar", "Zəfər zirvəsini fəth edənlər", "Biz daha köçkün deyilik", "Qarabağ söhbətləri", "Yurdu yaşadan qəhrəmanlar" kimi silsilə rubrikalar altında yüzlərlə yazı dərc olunub. Şəhidlərimizin əziz xatirəsi, qazilərimizin rəşadəti və Böyük qayıdışın möhtəşəm mənzərələri bu səhifələrdə canlanır.
Xüsusilə redaksiyanın keçmiş məcburi köçkün olan jurnalistlərinin Qarabağ və Şərqi Zəngəzurun bərpası, doğma yurd yerlərinə dönən insanların sevinci haqqında hazırladıqları reportajlar ayrıca diqqət çəkir. Onilliklərlə həsrətini çəkdikləri ata-baba torpaqlarına qədəm basan jurnalistlərin duyğuları, göz yaşları və qürur hissi birbaşa oxucuya keçir, insanı həm qüssələndirir, həm də sonsuz bəxtəvərliklə qürurlandırır. Bu gün 108 yaşlı "Azərbaycan" qəzeti cənnətə çevrilən Qarabağ və Şərqi Zəngəzurun yeni növrağını parlaq təcəssüm etdirir.
Mənəvi varislik və ehtiram ənənəsi redaksiyada hər zaman uca tutulur. Qəzetin əməkdaşı olmuş şəhid Elgün İsmayılovun xatirəsi redaksiyada həmişə dərin ehtiramla yad olunur. Hər il onun doğum günündə İkinci Şəhidlər xiyabanında başlayan anım mərasimi redaksiyada keçirilən vətənpərvərlik mövzusundakı yaradıcılıq müsabiqəsinin yekunları ilə davam edir. Bu, qələmlə silahın, mətbuatla vətənpərvərliyin qırılmaz bağının əyani göstəricisidir.
22 İyul - Milli Mətbuat və Jurnalistika Gününü qeyd etdiyimiz bu təntənəli gündə bir daha əminliklə demək olar ki, əsrlər boyu söz sarayında mübarizə aparan mətbuat fədailərimizin ən böyük arzusu Azərbaycanı bütöv və suveren görmək olub. Biz müasir mətbuatın nümayəndələri olaraq bu ali arzunun gerçəkləşdiyi, Zəfər günəşinin işıqlandırdığı müstəqil Azərbaycanda yaşamaq və yaratmaq xoşbəxtliyinə nail olmuşuq.
108 yaşlı "Azərbaycan" qəzeti bu gün də bütöv Vətənin səsi, müasir dövrün salnaməçisi kimi öz müqəddəs missiyasını ləyaqətlə davam etdirir və "Zəfər" möhürlü yazıları ilə qürurverici tariximizi gələcək nəsillərə çatdırır.
Yasəmən MUSAYEVA,
"Azərbaycan"
