Azərbaycanın suverenliyinə, dövlətçilik maraqlarına və milli ləyaqətinə qarşı yönələn hər bir təxribata adekvat reaksiya verəcək
Son dövrlərdə Rusiya Federasiyasının müxtəlif media platformalarında, televiziya kanallarında və sosial şəbəkə resurslarında Azərbaycan Respublikasına, onun dövlətçilik prinsiplərinə və xalqına qarşı sistemli xarakter alan informasiya hücumları diqqət çəkir. Müasir beynəlxalq münasibətlər sistemində media resurslarından psixoloji və siyasi təzyiq vasitəsi kimi istifadə edilməsi, təəssüf ki, tez-tez rast gəlinən üsullardandır.
Açıq nifrət nitqi, suverenliyə qəsd və hibrid təhdidlərdən ibarət olan bu kütləvi qarayaxma kampaniyaları təsadüfi ekspert mülahizələri sayıla bilməz. Bu cür məqsədyönlü təxribatlar iki ölkə arasında bəyan edilən strateji tərəfdaşlıq və mehriban qonşuluq ruhuna kökündən zidd olmaqla yanaşı, dövlətlərarası etimad mühitini də ciddi şəkildə zədələyir.
Sistemli təhrikçilik
Məhz bu təhlükəli tendensiyanın kəskin həddə çatması fonunda Rusiya Federasiyasının Azərbaycandakı fövqəladə və səlahiyyətli səfiri Mixail Yevdokimov avqustun 18-də Azərbaycan Xarici İşlər Nazirliyinə (XİN) çağırılıb. Rəsmi Bakının bu diplomatik addımı informasiya müstəvisində sərhədləri aşan təhdidlərə, təhqirlərə və dövlətimizin daxili işlərinə müdaxilə cəhdlərinə verilən kəskin, prinsipial və rəsmi cavab kimi qiymətləndirilməlidir.
Xarici İşlər Nazirliyinin bəyan etdiyi faktlar göstərir ki, Rusiyanın media məkanında ölkəmizə qarşı yönəlmiş fəaliyyət artıq adi jurnalistika çərçivəsindən tamamilə çıxaraq təhlükəli xarakter alıb. Avqust ayı ərzində fərqli media resurslarında ardıcıl şəkildə yayımlanan materiallar məsələnin məqsədyönlü idarə olunduğunu sübut edir.
13 avqust tarixində yayımlanan və "Çistota ponimaniya" verilişində ölkəmizə, xalqımıza və Azərbaycan Respublikasının rəhbərliyinə qarşı səsləndirilən ifadələr diplomatik etikaya və hüquq normalarına tamamilə ziddir.
7 avqustda "Sputnik" radiosunda Azərbaycan rəhbərliyinin əsassız şəkildə "terrorçu və ekstremistlər" siyahısına salınması kimi cəfəng təkliflərin tirajlanması, 9 və 16 avqust tarixlərində isə "YouTube" və "Spas" telekanalında Azərbaycanın rəhbərliyinə qarşı yenidən təhqiramiz məzmunların təqdim olunması informasiya terrorunun miqyasını göstərir.
Səfirlə görüşdə Azərbaycan dövlətinin daxili siyasi proseslərinə müdaxilə imkanlarının müzakirə edilməsi, Azərbaycan xalqına və Azərbaycan rəhbərliyinə qarşı fiziki zorakılıq xarakterli çağırışların səsləndirilməsinin qəbuledilməz olduğu vurğulanıb.
Azərbaycan tərəfinin dəfələrlə sözügedən fəaliyyətlərin qarşısının alınmasına dair çağırışlara və məsələnin müxtəlif siyasi səviyyələrdə müzakirə edilməsinə baxmayaraq, analoji ritorikanın daha sərt formada davam etməsinin ciddi narahatlıq doğurduğu bildirilib: "Görüşdə Rusiyanın informasiya və media məkanında Azərbaycan əleyhinə təxribat, təhdid və zorakılıq ritorikasına son qoyulması məqsədilə təxirəsalınmaz və təsirli tədbirlərin görülməsi barədə gözləntimiz bir daha qarşı tərəfin diqqətinə çatdırılıb".
Daxili siyasi proseslərə müdaxilə cəhdləri
Rusiya kütləvi informasiya vasitələrində Azərbaycanın daxili işlərinə müdaxilə mexanizmlərinin açıq şəkildə müzakirəyə çıxarılması suverenlik prinsiplərinin kobud şəkildə tapdalanmasıdır.
Azərbaycan Mətbuat Şurası da sözügedən məsələ ilə bağlı bəyanat verərək bunun sivil jurnalistika prinsiplərinə, etik normalara və insani dəyərlərə tamamilə zidd olduğunu bildirib: "...Azərbaycan mediası həmişə qonşu ölkələr, o cümlədən Rusiya ilə bağlı məsələlərə həssas münasibəti ilə seçilib, peşə prinsiplərindən kənar fikir və iddialara yer verməyib.
Buna görə də Rusiyanın informasiya müstəvisində belə xoşagəlməz halların yaşanması Azərbaycan ictimaiyyətində dərin təəssüf və əsaslı narazılıq doğurmaqdadır".
Bakının diplomatik xəbərdarlığı və Azərbaycan Mətbuat Şurasının kəskin bəyanatı Rusiyanın müəyyən dairələrinə aydın mesaj verir. Media azadlığı adı altında zorakılığı və terroru təbliğ etmək, müstəqil dövlətin varlığına qəsd çağırışları etmək qəbulolunmazdır.
Ölkəmizə qarşı yönəlmiş bu cür məqsədyönlü informasiya terroru və hibrid təhdidlər iki dövlət arasında mövcud olan strateji tərəfdaşlıq mühitinə kölgə salır, regiondakı həssas sabitliyi pozmağa xidmət edir. Mətbuat azadlığı adı altında terroru və zorakılığı təbliğ edənlər anlamalıdırlar ki, bu cür əməllər cavabsız qala bilməz. Rəsmi Bakının nümayiş etdirdiyi prinsipial mövqe bir daha təsdiqləyir ki, Azərbaycanın suverenliyinə, dövlətçilik maraqlarına və milli ləyaqətinə qarşı yönələn hər bir təxribat adekvat reaksiyasını alacaq.
Yasəmən MUSAYEVA,
"Azərbaycan"
jpeg_1787209831.jpeg)
