İl boyu işlə-güclə məşğul oluruq, istirahət haqqında fikirləşməyə zaman belə qalmır. İxtisasca həkim olduğuma görə insanların sağlamlığının qeydinə qalmaq, onların səhhətini normallaşdırmaq bizim vəzifə borcumuzdur.
Bir neçə il bundan əvvəl özümü yorğun və üzgün hiss etdim. Respublika Səhiyyə İşçiləri Həmkarlar İttifaqı Komitəsinə müraciət edərək göndərişlə ailəliklə Qusardakı "Şəfa" sanatoriyasına gəldik.
Neçə ildir hər il yay dövründə bura gəlirik. Respublikanın müxtəlif bölgələrində çalışan həkimlərlə görüşməyin özü bir münasibətdir. Yeddi gün ərzində müalicə prosedurları, idman hərəkətləri, normal qidalanma itirdiyin enerjini sənə qaytarır.
Burada əraziyə yaxın olan görməli yerlərə ekskursiyalar təşkil edilir. Şahdağa, Qusar və Quba rayonlarının görməli yerlərinə təşkil olunan ekskursiyalar isə böyüyün də, kiçiyin də ürəyincə olur. Beləliklə, müalicə və istirahətə gələnlər eyni zamanda ölkəmizin şimal bölgəsinin tarixi və inkişafı ilə də yaxından tanış olmaq imkanı qazanırlar. Xınalıq, Təngəaltı kəndləri, Laza şəlalələri, tarixi abidələrin ziyarəti bu bölgə barədə məlumatımızı daha da zənginləşdirir.
Burada futbol həvəskarları da darıxmırlar. Turistlərin ixtiyarında olan futbol meydançasında kiçik komandalarla yarışlar təşkil olunur, axşamlar isə bir yerə yığışıb dünya arenasında keçirilən oyunları da seyr edirlər.
Bu sanatoriya həm də tanışlıq mərkəzidir. Üzünü illərlə görmədiyimiz tələbə yoldaşlarımızla burada rastlaşırıq. Hələ tibbi təcrübəmizin bölüşməyini demirəm. Dostlarımızla istirahət vaxtlarında elmin yeniliklərindən söhbət açır, fikir mübadiləsi aparırıq.
Yeddi günlük istirahətimizdə bizim qazancımız yenidən fəaliyyət üçün enerji toplamaq, yeni dostlar qazanmaq və cansağlığıdır.
Hörmətli redaksiya, sizin vasitənizlə bu rahatlığı bizim üçün yaradan bütün "Şəfa"çılara təşəkkür edirik. Var olsunlar!
Sevinc ƏHMƏDOVA,
Qusar rayonu
