Bakıda "Formula-1" həyəcanı yenidən başlayır. 2026-cı il "Formula-1" Qatar Airways Azərbaycan Qran-prisi mövsümün 15-ci yarışı olacaq və bu dəfə Bakı həftəsonunun ən böyük fərqliliyi yarışın bazar günü deyil, şənbə günü - 26 sentyabrda keçirilməsidir.
"Formula-1"in rəsmi təqviminə əsasən, bütün proqram bir gün əvvələ çəkilib. Bunun səbəbi sentyabrın 27-nin Azərbaycanda Anım günü kimi qeyd olunmasıdır. "Formula-1" və FIA Azərbaycan tərəfinin müraciətindən sonra yarışın tarixini dəyişib. "Formula-1" 24 sentyabr, cümə axşamı başlayacaq. Yarışın yerli vaxtla proqramı belədir:
* 24 sentyabr, 12:30 - "Formula-1", I sərbəst yürüş
* 24 sentyabr, 16:00 - "Formula-1", II sərbəst yürüş
* 25 sentyabr, 12:30 - III sərbəst yürüş
* 25 sentyabr, 16:00 - Təsnifat mərhələsi
* 26 sentyabr, 15:00 - Azərbaycan Qran-prisi
Əsas yarış 51 dövrədən ibarət olacaq və "Formula-1"in rəsmi məlumatına görə, ümumi məsafə 306,049 kilometrdir.
Baku City Circuit "Formula-1" təqvimində ən qeyri-adi şəhər traslarından biridir. Dövrənin uzunluğu 6,003 kilometrdir və tras həm çox sürətli düzlükləri, həm də son dərəcə dar və texniki hissələri birləşdirir.
Xüsusilə dənizkənarı uzun düz xətt sürücülərə yüksək sürət və ötmə imkanları yaradır. Daha sonra bolidlər İçərişəhərin dar küçələrinə daxil olur. Burada səhvin qiyməti çox yüksəkdir: divarlar trasın kənarına olduqca yaxındır.
Trasın əsas xüsusiyyətlərindən biri də komandaların sazlama baxımından seçim qarşısında qalmasıdır. Sürətli hissələrdə yüksək maksimal sürət üçün daha az müqavimət, dar döngələrdə isə daha çox yerəbasma qüvvəsi tələb olunur. Bu kompromis Bakını mühəndislər üçün də xüsusi çətinlik yaradan traslardan birinə çevirir.
Bakıya gələn "Formula-1" pelotonunda diqqətin əsas mərkəzində Kimi Antonelli və onun çempionatdakı liderliyi dayanır. Məlumata görə, Antonelli Madriddə son yarışdakı qələbəsindən sonra ən yaxın rəqibi üzərində üstünlüyünü 81 xala çatdırıb.
Digər tərəfdən Madrid yarışında poul mövqeyindən başlayan Lando Norris potensial qələbəni reallaşdıra bilməmişdi. Buna görə Bakıda McLaren sürücüsünün nəticəsi də çempionatın gedişi baxımından əsas izləniləcək məqamlardan biridir.
Bakının xüsusiyyəti isə odur ki, burada yarışın gedişinə yalnız sürət deyil, strategiya, təhlükəsizlik avtomobili, təkər seçimi və trasdakı kiçik səhvlər də ciddi təsir göstərə bilər.
Azərbaycan Qran-prisi 2017-ci ildən keçirilir. Ondan əvvəl 2016-cı ildə Bakı "Formula-1" təqviminə Avropa Qran-prisi adı ilə daxil olmuşdu. Bakı trasında bir neçə dəfə qalib gələn sürücülər arasında Sergio Perez və Max Verstappen var - hər ikisi bu trasda iki dəfə qalib olub. 2025-ci il Azərbaycan Qran-prisinin qalibi isə Max Verstappen olub.
"Formula-1"dən başqa, Bakı həftəsonunda "Formula-1" yarışları da keçiriləcək. F2-nin ikinci feature yarışı şənbə günü saat 11:00-da, "Formula-1" isə saat 15:00-da start götürəcək.
Beləliklə, sentyabrın 24-dən 26-dək Bakı yenidən dünyanın ən böyük avtoidman tədbirlərindən birinin mərkəzinə çevriləcək. Uzun düzlüklər, İçərişəhərin dar küçələri, divarlara yaxın sürüşlər və çempionatdakı gərgin mübarizə Azərbaycan Qran-prisinin əsas gözləntilərini formalaşdırır.
Dönməz ABBASOV
677jpg_1790033437.jpg)
