Qusar Dövlət Ləzgi Dram Teatrı 1992-ci il iyul ayının 3-dən fəaliyyət göstərir. Teatrın yaradılmasının maraqlı bir tarixi var.
Həsən Seyidbəylinin ssenarisi əsasında quruluşçu rejissor Lətif Səfərovun çəkdiyi "Qızmar günəş altında" filmində çəkilmiş həmyerlimiz Əkbər Fərzəliyev 1963-cü ildə rayonumuzda Ləzgi Xalq Teatrının təşkili üçün Mədəniyyət Nazirliyi tərəfindən Qusara göndərilir. 1965-1970-ci illər Qusar Ləzgi Xalq Teatrının inkişafında parlaq dövr olmuş, Əskər Əmirəhmədov, Nora Əlimova, Qiyafəddin Hacıyev, Pəri Həbibullayeva, Həsən Əhmədov, Bünyam Zalov və onlarca sənət ustaları respublikamızın mədəniyyət tarixində öz adlarını yaradıcılıqları ilə yazmışlar. Şərəfli bir tarixə malik olan Qusar Dövlət Ləzgi Dram Teatrı zəngin sənət ənənələrinə malik bir kollektivdir.
1992-ci ildən bu günədək teatrda 170-dən çox dram əsəri səhnələşdirilmişdir. Teatrın səhnəsində yerli yazarların əsərlərindən hazırlanan tamaşalara sevilə-sevilə baxılır. Ümumiyyətlə, teatr gündən-günə inkişaf edir. Səhnələşdirilən hər bir tamaşa bədii tərtibatı, dolğun rejissor işi, aktyor oyunu ilə seçilir. Azərbaycan mədəniyyətində özünəməxsus rolu olan bir çox sənət adamının adı bu teatrın səhnəsində minnətdarlıqla çəkilir. Onlardan Yalçın Qaraxanov, Lalə Qurbanova, Rəhilə Hacıbəyova, Rübabə Qasımova, Kəmalə Səfərova, Tacir Şahbazov, Yuri Kərimov, Tofiq Mustafayev, Elnur Hacıyev, Həsrət Nəsrullayev, Sədaqət Əlimuradova, Diana Cəfərova, Arzu Məmmədrzayeva, Emma Xeyirbəyova və başqaları yaratdıqları obrazlarla teatrsevərlərin rəğbətini qazanmışlar.
Bu gün kollektiv qusarlılara Mirzə Fətəli Axundzadənin əsəri əsasında "Hekayəti xırs quldurbasan", Torqut Özakmanın "Adət" tamaşalarını təqdim edir. Zəfər bayramına isə kollektiv yeni bədii kompozisiyalar hazırlayacaq. Burada qusarlı şəhid və qazilərimizin göstərdikləri qəhrəmanlıqlar yer alacaq.
Kollektiv uşaqları da yaddan çıxarmayıb. Yeni il bayramında "Qırmızıpapaq nağılı", "Dovşanın ad günü" və digər tamaşalar uşaqlara hədiyyə ediləcək. Tamaşalara təkcə rayon mərkəzinin təhsil müəssisələri deyil, növbə ilə kənd məktəblərinin şagirdləri də dəvət olunur.
Bu gün Qusar Dövlət Ləzgi Dram Teatrı Azərbaycan və ləzgi dillərində tamaşaları ilə mədəniyyətimizin inkişafına xidmət edir. Hər iki dildə göstərilən tamaşalar sevilərək izlənilir.
Bağır ƏHMƏDOV,
teatrın quruluşçu rejissoru, Qusar rayon sakini
19 (1)jpg_1771885865.jpg)
