Azərbaycan-Gürcüstan əlaqələri uzun illərdir yalnız qonşuluq münasibəti deyil, həm də regionun enerji təhlükəsizliyi və tranzit arxitekturasının əsas sütunlarından biri hesab olunur. Son günlər imzalanan sənədlər və verilən açıqlamalar göstərir ki, tərəflər əməkdaşlığı yeni mərhələyə çıxarmağa çalışır. Xüsusilə dəmir yolu əlaqələrinin bərpası və Bakı-Supsa xətti ilə bağlı qərarlar strateji məna daşıyır.
Milli Məclisin deputatı Müşfiq Məmmədli qəzetimizə açıqlamasında bildirib ki, pandemiyadan sonra dayandırılmış qatar reysinin yenidən fəaliyyətə başlaması iki ölkə arasında insan əlaqələrinin güclənməsi, turizmin canlanması, ticarət dövriyyəsinin artması,Gürcüstandakı azərbaycanlıların sosial bağlarının asanlaşması, Orta Dəhliz boyunca logistikanın genişlənməsi baxımından əhəmiyyətlidir: “Bu qərar həm də siyasi etimad göstəricisidir. Bu regionda geosiyasi dəyişikliklər fonunda Bakı ilə Tbilisinin strateji yaxınlığının qorunduğunu nümayiş etdirir. Tərəflər gündəlik sərnişin dəmir yolu əlaqəsinin bərpasını və Bakı-Tbilisi-Qars xəttinin yeni hissəsinin tam işləməsini razılaşdırıblar. Gürcüstanın Baş naziri İrakli Kobaxidzenin Bakı-Supsa boru kəməri ilə bağlı açıqlaması da çox önəmlidir. O bildirib ki, faktiki dayanmış Bakı-Supsa neft kəmərinin fəaliyyəti bərpa olunacaq və bu, Gürcüstan büdcəsinə hər il milyonlarla gəlir gətirəcək. Bu qərarın strateji əhəmiyyəti də var. Belə ki, marşrutların diversifikasiyası Azərbaycan neftinin ixracında alternativ çıxışları artıracaq, Qara dəniz xəttinin aktivləşməsi isə Avropaya çıxış imkanlarını genişləndirəcək”.
Deputat qeyd edib ki, enerji təhlükəsizliyi regionun Rusiyadan asılılığının azaldılması baxımından əlavə üstünlük yaradır. Azərbaycan-Gürcüstan tandeminin güclənməsi ilə enerji əməkdaşlığı yenidən dərinləşir.
Bakı-Supsa xəttinin 1999-cu ildə istifadəyə verildiyini xatırladan M.Məmmədli bildirib ki, bu, Xəzər hövzəsini Qara dənizlə birləşdirən ilk böyük ixrac marşrutlarından olub.
Deputat qeyd edib ki, WUF-13 zamanı İ.Koboxidzenin Azərbaycana səfəri çərçivəsində iki ölkə arasında bir sıra istiqamətlərdə razılaşmalar əldə olunub: “ Bunlar Gürcüstana Azərbaycan qazının 20 il müddətinə tədarükünün uzadılması, elektrik enerjisinin ötürülməsi və tranziti üzrə yeni mexanizmlər, Bakı-Supsa kəmərinin fəaliyyətinin bərpası, dəmir yolu və regional nəqliyyat əlaqələrinin genişləndirilməsidir. Bu paket, əslində, iki ölkənin münasibətlərini qonşuluq əməkdaşlığından çıxarıb enerji-logistika ittifaqı səviyyəsinə yaxınlaşdırır. Hazırkı proseslər göstərir ki, Azərbaycan və Gürcüstan əməkdaşlığı yeni mərhələyə keçir. Əgər əvvəl əsas xətt enerji layihələri idisə, indi bura nəqliyyat, logistika, elektrik ötürülməsi, regional bağlantılar, Orta Dəhliz, Avropa ilə Asiya arasında körpü rolu əlavə olunur”.
M.Məmmədli vurğulayıb ki, Bakı və Tbilisi yalnız iki qonşu dövlət kimi deyil, Cənubi Qafqazın geoiqtisadi mərkəzi kimi çıxış etməyə çalışırlar. Bu fonda qatar reyslərinin bərpası və Bakı-Supsa xəttinin yenidən işə düşməsi simvolik deyil, regionun gələcək iqtisadi xəritəsinə təsir edə biləcək addımlar hesab oluna bilər.
Əsmər QARDAŞXANOVA,
“Azərbaycan”
jpg_1779707872.jpg)
