Universitetlər gələcəyin liderlərini yetişdirməklə kifayətlənməməli, həm də real layihələrin və innovasiyaların məkanı olmalıdır.
AZƏRTAC xəbər verir ki, bu fikri Qırğızıstan Dövlət Texniki Universitetinin layihə meneceri Nazarbek Cünusalıyev Bakıda keçirilən “Qlobal Gənclər Günü” çərçivəsində təşkil olunan panel sessiyada çıxışı zamanı səsləndirib.
O, universitetlərin “təhsil–biznes–dövlət” modelinə uyğun üçtərəfli əməkdaşlıq qurmasının vacibliyini vurğulayıb. Bildirib ki, təhsil müəssisələri yalnız nəzəri biliklə kifayətlənməməli, gənclərə yaradıcılıq, sınaq və innovasiya imkanları təqdim etməlidir: “Bugünkü gənclər yalnız akademik nəzəriyyə ilə kifayətlənmir. Onlar yaratmaq, qurmaq, sınaqdan keçirmək və ideyalarını gerçəkləşdirmək istəyirlər. Universitetlər həm tədris, həm də eksperiment məkanı və eyni zamanda, ideyaların real məhsul və xidmətə çevrildiyi mühit olmalıdır”.
Nazarbek Cünusalıyev qeyd edib ki, bu modeli həyata keçirmək üçün hər tərəfin özünəməxsus rolu var. ”Universitetlər bilik, araşdırma və gənc istedadları təmin edir. Dövlət effektiv siyasət, rəqəmsal infrastruktur və innovasiya təşəbbüslərinə dəstək verir. Biznes isə real praktiki tapşırıqlar, maliyyə, mentorluq və bazar imkanları təqdim edir. Bu üç tərəf birlikdə çalışdıqda tələbələr tədqiqat nəticələrini praktik həllərə çevirmək üçün lazım olan bütün dəstəyə sahib olurlar. Universitetlər gənc innovatorlara güvənməli, onlara eksperiment üçün şərait yaratmalı, dövlət və biznes strukturları ilə birləşdirərək imkanları daha da genişləndirməlidir”, – deyə o vurğulayıb.
jpg_1772558171.jpg)
19 (1)jpg_1771885865.jpg)
