Forumlar, yeni layihələr və beynəlxalq tədbirlər
Azərbaycanın beynəlxalq iqtisadi əlaqələri ötən həftə biznes forumlarla genişlənib. Oktyabrın 12-də Bakıda keçirilən Azərbaycan-Çexiya biznes forumu bu qəbildəndir. Tədbirdə hər iki ölkənin dövlət və biznes nümayəndələri iqtisadi əməkdaşlığın genişləndirilməsi, yeni tərəfdaşlıqların qurulması və qarşılıqlı investisiya imkanlarını müzakirə ediblər. Forum çərçivəsində şirkət nümayəndələri arasında B2B formatında görüşlər təşkil olunub.
Azərbaycan-Kamboca biznes forumunda isə ticarət və investisiya əməkdaşlığının inkişafı müzakirəyə çıxarılıb. Tədbirdə müxtəlif sahələri təmsil edən 100-ə yaxın iş adamı iştirak edib. Forum çərçivəsində Azərbaycan Ticarət və Sənaye Palatası ilə Kamboca Ticarət Palatası arasında əməkdaşlığa dair Anlaşma Memorandumu mübadilə olunub.
***
Azərbaycanın logistika imkanları Türkiyənin İzmir şəhərində keçirilən “LOGISTECH 2026” beynəlxalq sərgisində təqdim edilib. Tədbirdə Azərbaycan Gömrük Təmsilçiliyi, eləcə də Logistika Şirkətlərinin Assosiasiyası və üzv şirkətləri daxil olmaqla, ölkəmiz 16 şirkət və 32 nəfərlik nümayəndə heyəti ilə təmsil olunub. Sərgi çərçivəsində logistika, yükdaşıma, anbar və gömrük xidmətləri üzrə əməkdaşlıq imkanları, Azərbaycanın tranzit potensialı və Zəngəzur dəhlizinin yaratdığı perspektivlər diqqətə çatdırılıb. Azərbaycan və Türkiyə şirkətləri arasında B2B formatında görüşlər keçirilib, yeni tərəfdaşlıqların qurulması və birgə layihələrin həyata keçirilməsi imkanları dəyərləndirilib.
***
Ötən həftə logistika sahəsində beynəlxalq əməkdaşlıq imkanlarının təqdimatı ilə yanaşı, ölkə daxilində biznes və istehsal potensialının nümayişinə də yer verilib. Oktyabrın 14-16-da Bakı Ekspo Mərkəzində keçirilən 6-cı “Rebuild Garabagh” sərgisində Azərbaycanın biznes və investisiya imkanları “Made in Azerbaijan” stendi ilə tanıdılıb. Yerli şirkətlər tikinti materialları, mebel, ayaqqabı və digər sənaye məhsullarını nümayiş etdirib, həmçinin potensial tərəfdaşlarla işgüzar görüşlər keçiriblər.
Burada “AzerGold” QSC-nin fəaliyyəti xüsusi stenddə sərgilənib. Ziyarətçilər virtual reallıq texnologiyası vasitəsilə Çovdar İnteqrəolunmuş Regional Emal Sahəsinin istehsal prosesi ilə tanış olublar. Eləcə də Kəlbəcərin tarixi və mədəni irsinə həsr edilmiş qızıl və gümüş sikkələr ilk dəfə ön plana çıxarılıb.
***
Aqrar sahədə beynəlxalq əməkdaşlıq çərçivəsində qadın sahibkarlığının inkişafı məsələləri də diqqət mərkəzində olub. Oktyabrın 15-də Astanada İslam Ərzaq Təhlükəsizliyi Təşkilatının kənd təsərrüfatında qadınların iqtisadi imkanlarının genişləndirilməsinə həsr olunan beynəlxalq seminarı baş tutub. İki gün davam edən tədbirdə Azərbaycan nümayəndələri ilə yanaşı, Mərkəzi Asiya və ərəb ölkələrinin təmsilçiləri iştirak ediblər. Müzakirələrdə qadın sahibkarlığının dəstəklənməsi, müasir aqrar texnologiyaların tətbiqi, maliyyə resurslarına və bazarlara çıxış imkanlarının artırılması məsələləri nəzərdən keçirilib.
***
Arxada qoyduğumuz həftədə rəqəmsal iqtisadiyyatın inkişafı istiqamətində Azərbaycanda süni intellekt texnologiyalarının tətbiqinin tənzimlənməsi üçün də addımlar atılıb. Cari ildə bu sahə üzrə 5 dövlət standartı qüvvəyə minib. Standartlar süni intellektin etik prinsipləri, idarəetmə, təsirin qiymətləndirilməsi, audit və sınaq məsələlərini əhatə edir. Yeni tələblər süni intellekt sistemlərinin təhlükəsiz, məsuliyyətli və şəffaf tətbiqinə, eləcə də onların daha düzgün qiymətləndirilməsinə və idarə olunmasına yönəldilib.
***
Ötən həftənin ən mühüm beynəlxalq hadisələrindən biri oktyabrın 15-də Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Görüşü olub. Tədbirdə Prezident İlham Əliyev çıxış edərək, Azərbaycanın təşkilata sədrliyi dövründə nəqliyyat bağlantıları, rəqəmsallaşma, ətraf mühit və digər sahələrdə əməkdaşlığın inkişafına diqqət yetirildiyini vurğulayıb. Zirvə Görüşündə Bakı Bəyannaməsi qəbul olunub və Azərbaycanın AQEM-ə sədrliyinin 2028-ci ilədək uzadılması qərara alınıb. Laosun təşkilata üzv qəbul edilməsi də toplantının mühüm nəticələrindəndir.
***
İcmalın sonunda ötən həftə ictimaiyyətə təqdim edilən doqquz aylıq iqtisadi nəticələrə nəzər salaq. 2026-cı ilin yanvar - sentyabr aylarında ölkənin ümumi daxili məhsulu (ÜDM) 102 milyard manatı ötüb. İqtisadi artım 1,5 faiz, qeyri-neft-qaz sektorunda isə 2,6 faiz təşkil edib. Ən yüksək artım informasiya və rabitə sahəsində 11,1 faiz, nəqliyyat və anbar təsərrüfatında isə 10 faiz səviyyəsində qeydə alınıb.
Züleyxa ƏLİYEVA,
“Azərbaycan”
