G7 liderləri Ukraynanı hava hücumundan müdafiə sistemləri və uzaqmənzilli silahlar da daxil olmaqla daha çox silahla təchiz etməyə söz veriblər və Rusiyanın neft və qaz sektoruna qarşı sanksiyaları sərtləşdirməyə hazır olduqlarını bildiriblər.
Fransanın Evian şəhərində 2 gün davam edən görüşlərin yekununda G7 liderləri Ukraynaya hava hücumundan müdafiə sistemləri və uzaqmənzilli silahlar da daxil olmaqla silah təchizatını artırmağa söz verən birgə bəyanat yayıblar və həmçinin Rusiyanın enerji sektoruna təzyiqi daha da artırmaq üçün "vaxtın əlverişli olduğuna" işarə ediblər. Onlar "Ukraynanın azadlığını, suverenliyini və ərazi bütövlüyünü müdafiə etməsində sarsılmaz dəstəyi" ifadə edən bəyanatı təsdiqləyiblər.
Avropa Ukraynaya maliyyə və hərbi dəstəyin əsas hissəsini təmin etməyə davam edir. Son hesablamalara görə, RF-nin 2022-ci ildə tammiqyaslı işğala başlamasından bəri Ukraynaya təxminən 200 milyard avro ayrılıb. Əlavə 90 milyard avro kredit planlaşdırılır və bu kreditin cari aydan etibarən verilməsinə başlanacaq. Ümumi yardımın təxminən 115 milyard avrosu ABŞ-nin payına düşür.
Eyni zamanda, G7 liderləri təcili olaraq Amerikanın "Patriot" hava hücumundan müdafiə sistemlərinə ehtiyacı olan Ukrayna üçün hərbi istehsalın lisenziyalaşdırılmasını genişləndirməyi nəzərdən keçirməyə hazır olduqlarını bildiriblər. Birgə bəyanatda deyilir: "Biz Rusiya hərbi iqtisadiyyatına təzyiqi artırmağa sadiqik. Bu kontekstdə neft və qaz sektoruna qarşı da daxil olmaqla sanksiyaları gücləndirəcəyik".
Bu arada ABŞ Prezidenti Donald Tramp bildirib ki, Vaşinqton əvvəllər müvəqqəti olaraq dayandırılmış Rusiya enerji ixracına qarşı sanksiyaları tezliklə yenidən tətbiq edə bilər. O vurğulayıb ki, ABŞ və İran arasında bu yaxınlarda bağlanmış çərçivə sazişi Hörmüz boğazından gəmiçiliyin bərpasına və qlobal enerji bazarındakı gərginliyin azalmasına kömək edə bilər.
Avropa İttifaqı artıq Rusiyaya qarşı 21-ci sanksiya paketini təsdiqləyib. Bu ayın əvvəlində qəbul edilmiş sonuncu sənəd Rusiya neft tədarükünü və "kölgə donanmasını" hədəfləyir.
G7 bəyanatında həmçinin enerji dayanıqlığının vacibliyi vurğulanır və Rusiyanın ənənəvi olaraq soyuq mövsümdə enerji infrastrukturuna hücum etdiyi nəzərə alınmaqla növbəti qışda Ukraynaya kömək etmək vəd olunur.
Rusiya isə Ukraynaya edilən hər hansı bir hərbi yardımı pisləyir. Moskva vurğulayır ki, bu cür hərəkətlər hərbi əməliyyatın gedişini dəyişdirməyəcək və yalnız münaqişəni uzadacaq.
Rizvan CƏFƏROV,
"Azərbaycan"
677jpg_1781134810.jpg)
