Kəndli üçün təqvim ili şərti xarakter daşıyır. Əgər toxum bu il səpilib məhsulu gələn il biçilirsə, burada hansı təqvim ilindən söhbət gedə bilər?!
Yaxud cari ilin payızından başlayan məhsul yığımı yeni ilin ilk aylarında davam edirsə, dekabrda hansı nəticə barədə danışmaq olar?! Ona görə də kənd adamı üçün mövsüm olur, məsələn, biçin mövsümü, meyvə mövsümü, bostan mövsümü və s. Amma bütün hallarda il ildir və ona yekun vurmaq lazımdır.
Hazırda Göygöl rayonunun kənd təsərrüfatına yararlı torpaq sahəsi 58 min 652, o cümlədən əkinəyararlı torpaq sahəsi 13 min 27 hektardır. Mövcud əkin sahələrinin 7441 hektarı suvarılan, 5586 hektarı dəmyə ərazilərdir. Həmin torpaq sahələrinin 9614 hektarında taxıl, tərəvəz, bostan, çoxillik və yem bitkiləri əkilir.
Rayonda taxılçılıq ənənəvi sahədir. 2023-cü ildə bu ilin məhsulu üçün 4382,5 hektarda dənli bitkilərin əkini aparılmışdır. Onun 2310,5 hektarı buğda, 2016,5 hektarı arpa, 55,5 hektarı isə xəsil olmuşdur. Cari mövsüm 431,7 hektar taxıl sahəsindən 12328 ton məhsul yığılmışdır. Məhsuldarlıq ötən mövsümə nisbətən 12 sentner artmışdır. Hazırda gələn ilin məhsulu üçün əkin işləri aparılır. İndiyəcən 5228 hektarda payızlıq şum qaldırılmış, 4407 hektarda payızlıq taxıl səpini aparılmışdır. Onun 2507 hektarı buğda, 1870 hektarı arpa, 30 hektarı xəsildir.
Bu il həmçinin rayon üzrə 488 hektarda tərəvəz, 322 hektarda kartof, 20,2 hektarda şəkər çuğunduru, 539 hektarda dən üçün günəbaxan, 57 hektarda dən üçün yazlıq qarğıdalı, 83,5 hektarda yem üçün qarğıdalı, 40 hektarda darı və 421,7 hektarda yem bitkiləri əkilmişdir. Bundan əlavə, rayon ərazisində 718,7 hektar üzüm, 806,4 hektar meyvə və 138,5 hektar giləmeyvə bağları var. Məhsula gəldikdə, sahə və bağlardan 3094 ton kartof, 4881 ton tərəvəz, 4184,6 ton meyvə və 178,4 ton giləmeyvə yığılmışdır.
Göygöl rayonunda taxıl əkini sahələrinin suvarılması əsasən Gəncə çayı, Kürəkçayı, Qoşqar çayı və "Şəmkirçay" su anbarı, eləcə də 20 kənd ərazisindəki subartezian quyuları vasitəsilə həyata keçirilir. Yeri gəlmişkən qeyd edək ki, rayondakı 220 subartezian quyusunun 50-si bilavasitə əkin, o cümlədən taxıl sahələrinin suvarılmasında istifadə olunur. 45 subartezian quyusu isə həm məişətdə, həm də suvarmada əhalinin dadına çatır. Qalan 125 subartezian quyusu kommunal məqsədlə istifadə olunur.
Kənd təsərrüfatı məhsullarının yetişdirilməsində və yığılmasında istifadə olunan texnika rayonun özününküdür. Bu gün Göygölün təsərrüfatlarında 17 taxılbiçən kombayn, 48 şum traktoru, 48 kotan, 34 toxumsəpən,10 gübrəsəpən, 11 çiləyici, 2 kartofsəpən və digər texnikalar mövcuddur. Bundan əlavə, rayonda "Aqroservis" ASC-nin Şəmkir Regional Nümayəndəliyinin Göygöl-Daşkəsən bölməsi də fəaliyyət göstərir.
Göygöl təbiəti və iqlim şəraiti sarıdan heyvandarlığın inkişafı üçün əlverişli rayondur. Dağlıq və dağətəyi ərazi, mülayim iqlim burada heyvandarlığın inkişafı üçün geniş imkanlar açır. İnsafən, rayon heyvandarları da bu imkanlardan səmərəli istifadə etməyi bacarırlar. Onlar hətta kənd təsərrüfatı və heyvandarlıq sahəsində bilik və bacarıqlarını artırmaq üçün təlim və seminarlarda iştirak edirlər. Statistikaya gəldikdə, hazırda rayonda 20,2 min baş qaramal (o cümlədən 100 min baş ana inək), 115,2 min baş qoyun-keçi, 157 min baş müxtəlif növ ev quşları və 8605 arı ailəsi var. Mövsüm ərzində ət istehsalı 2794,8, süd istehsalı 21901,2, yun istehsalı 166 ton olmuşdur.
Göygöldə mal-qaranın cins tərkibinin yaxşılaşdırılması üçün süni mayalanmanın əhəmiyyəti geniş təbliğ olunur. Rayon Dövlət Aqrar İnkişaf Mərkəzinin mütəxəssisləri bu məqsədlə heyvandarlar arasında tez-tez maarifləndirmə işləri aparırlar. Nəticə olur. Cari ilin 9 ayı ərzində 1574 baş inək və düyə süni yolla mayalandırılmış, süni mayalanma yolu ilə 760 baş bala alınmışdır ki, bu da əvvəlki illərə nisbətən xeyli çoxdur.
Son illər rayonda moruqçuluğa maraq xeyli artıb. Hətta bu il ilk dəfə olaraq rayonun dağlıq ərazisində yerləşən Köşkü kəndində Moruq festivalı keçirilib. Festivalda 50 mindən artıq yerli və xarici qonaq iştirak edib. Tədbirin keçirilməsi həm də rayonda turizmin inkişafına təkan verib. İndi Göygöldə kənd turizminin inkişafı üçün geniş imkanlar açılıb.
Sabir ƏLİYEV,
"Azərbaycan"
