Türkiyə və Azərbaycan arasında münasibətlər təkcə siyasi və hərbi əməkdaşlıqdan ibarət deyil, həm də tarixi, mədəni və mənəvi köklərə söykənir. Türkiyənin Silahlı Qüvvələrinin Quru Qoşunları komandanı ordu generalı Mətin Tokelin rəhbərlik etdiyi nümayəndə heyətinin Naxçıvana səfəri hər şeydən əvvəl strateji məna daşıyır. Bu gün regionda baş verən hadisələr fonunda bu səfər regionun xüsusi geosiyasi mövqeyindən xəbər verir. Naxçıvanın Türkiyə ilə birbaşa quru sərhədi var, həmçinin Azərbaycan üçün bu bölgə əhəmiyyətli strateji məntəqə, dayaq nöqtəsidir.
Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev qəzetimizə açıqlamasında deyib ki, səfərdən bir neçə nəticə əldə etmək olar. Bu səfər həm də regional aktorlara mesajdır. "Türkiyəli ordu generalının Naxçıvana səfəri Türkiyə və Azərbaycanın təhlükəsizlik məsələlərində bir yerdə olduğunu, koordinasiyalı şəkildə hərəkət etdiyini bir daha göstərir. Təbii ki, hərbi əməkdaşlığın davam etməsi, birgə təlimlər, müdafiə sahəsində koordinasiyalı iş təcrübəsi mübadiləsinin davamlı şəkildə aparılmasını təsdiqləyir. "Yəni bu gün Türkiyə regionda sabitliyin qorunmasında Azərbaycanın yanında olduğunu göstərir. Ordu generalının səfəri zamanı Şuşa Bəyannaməsinin əhəmiyyəti bir daha vurğulanıb. 2021-ci ildə imzalanan bəyannamə iki ölkə arasında münasibətlərin strateji müttəfiqlik səviyyəsinə çatdığını təsdiqləyən sənəddir. Regionda yeni təhlükəsizlik şəraiti yaranarsa, qarşısının alınması istiqamətində birgə addımlar, müdafiə və təhlükəsizlik sahəsində bir-birinə yardım, iqtisadi cəhətdən əməkdaşlığın genişlənməsi nəzərdə tutulur. Bu bəyannamənin bir daha xatırlanması istənilən bir dövlətə diplomatik mesajdır. Türkiyə müxtəlif sahələrdə - istər birgə hərbi təlimlər, istərsə də Azərbaycan Silahlı Qüvvələrinin NATO standartlarına uyğun qurulması istiqamətində Azərbaycana dəstək verir. Eyni zamanda beynəlxalq təşkilatlarda Azərbaycanın mövqeyini müdafiə edir. Azərbaycan da analoji addımları atır", - deyə deputat bildirib.
A.Nağıyev qeyd edib ki, Türkiyə generalının Naxçıvana səfəri çərçivəsində Şuşa Bəyannaməsinin xatırlanması Azərbaycan və Türkiyənin yalnız dost deyil, strateji təhlükəsizlik tərəfdaşları olduqlarını da bir daha göstərdi. Bu münasibətlər ancaq iki dövlət arasında ümumi maraqlardan deyil, daha dərin - hərbi müttəfiqlikdən, iqtisadi inteqrasiyadan irəli gəlir. Bu cür səylər regionda sabitliyin bərqərar olması üçün bir mesajdır, həmçinin regionun təhlükəsizliyi və iqtisadi inkişafın mühüm amillərindən biridir. Bu proseslərdə Azərbaycan və Türkiyə liderlərinin rolu danılmazdır. Onların bir-birinə səmimi münasibəti əlaqələrin dərinləşməsinə mühüm təsir göstərir.
Komitə sədri vurğulayıb ki, Türkiyə tərəfindən verilən son mesajlar da iki dövlətin yalnız iqtisadi, siyasi cəhətdən deyil, "bir millət, iki dövlət" prinsipindən çıxış etdiyini göstərir. Azərbaycanın əsas prinsipləri suverenlik, ölkənin ərazi bütövlüyü və hər bir vətəndaşın rifahıdır. Prezident İlham Əliyevin də yürütdüyü siyasət xətti buna əsaslanır.
Əsmər QARDAŞXANOVA,
"Azərbaycan"
jpg_1776873230.jpg)
