Bu gün Yaxın Şərqdə baş verən hərbi əməliyyatlar dünyada enerji böhranı yaradıb ki, bu vəziyyətdə Azərbaycan ilə Türkiyənin Avropa üçün əhəmiyyətini artırıb. Azərbaycanın enerji resursları, xüsusilə təbii qazı Cənub Qaz Dəhlizi ilə Türkiyə üzərindən Avropaya ixrac olunur. Azərbaycan istehsalçı, Türkiyə isə tranzit ölkə kimi üzərinə düşən öhdəliyi layiqincə yerinə yetirir.
Bu sözləri AZƏRTAC-a açıqlaması zamanı Türkiyənin “Haber 365” media qrupunun rəhbəri, siyasi ekspert Yakub Aslan deyib.
Onun sözlərinə görə, Azərbaycanın enerji istehsalı və tranziti potensialı bu gün onun dünyada söz sahibi olmasına və siyasətinin uğurla həyata keçməsini təmin edir.
“Bakıda Cənub Qaz Dəhlizi Məşvərət Şurası çərçivəsində nazirlərin 12-ci iclası və Yaşıl Enerji Məşvərət Şurası çərçivəsində nazirlərin 4-cü iclası keçirildi. Toplantıya Azərbaycan və Avropa İttifaqı daxil olmaqla 27 ölkə, 11 beynəlxalq maliyyə institutu və təşkilat, eləcə də 49 enerji şirkəti qatılması onu deməyə əsas verir ki, Azərbaycan Avropanın enerji təhlükəsizliyindəki rolunu artırmaqla yanaşı siyasi dəstək qazanıb. Gələcək illərdə qaz ixracını 20 milyard kubmetrə çatdırmağı planlaşdıran Azərbaycan öz istehsalı ilə yanaşı Mərkəzi Asiyada istehsal olunan alternativ enerjini də tranzit olaraq Avropa bazarına çıxarmağa çalışır və bu istiqamətdə mühüm infrastruktur layihələri həyata keçirir
Avropanın enerji təhlükəsizliyində iştirak edən Azərbaycan yalnız iqtisadi deyil, eyni zamanda, siyasi dividend də əldə edir ki, bu da çox vacib məsələdir. İqtisadi əməkdaşlıq siyasi əlaqələrin artmasına qarşılıqlı dəstək və yardımlaşmaya imkan verir. Martın 5-də İranın Naxçıvana pilotsuz uçuş aparatları ilə (PUA) təcavüzü cavabsız qalmadı. Belə ki, Avstriya, Albaniya, Monteneqro, İspaniya, İtaliya, Böyük Britaniya, Gürcüstan, Türkiyə və digər dövlətlərin Xarici İşlər nazirliklərinin Azərbaycanı dəstəkləyən bəyanatlarla çıxış etmələri təsadüfi xarakter daşımır. Bu ölkələr enerji təhlükəsizliyini və təminatlarını ödəmək üçün Azərbaycanı müdafiə edəcək, hər zaman dəstəkləyəcəklər”, - deyə Y. Aslan nəzərə çatdırıb.
jpg_1775472819.jpg)
