Bu il dünya neft bazarında 3,06 milyon barel profisit yaranıb. Dünya bazarının neftə olan tələbatı sutkada 104,79 milyon bareldir. Lakin dünya üzrə neft hasilatının 1,56 milyon barel artması bazara 107,79 milyon barel neftin çıxarılmasına səbəb olur ki, bu da qiymətlərin azalmasında özünü büruzə verir.
AZƏRTAC xəbər verir ki, ABŞ-ın Enerji Nazirliyinin aylıq hesabatında deyilir ki, cari ildə bazarın əlavə tələbatı 1,56 milyon barel olduğu halda bazara 3,06 milyon barel təklif olunur.
Beləliklə, bazara ixrac olunan neftin həcmi artıb və qiymətlər tədricən enməyə başlayıb. Lakin buna baxmayaraq, hazırda “Brent” markalı neftin 1 barelinin qiyməti 69,18 dollara satılır ki, bu da 2025-ci ilin sentyabr ayından bu günə kimi ən yüksək göstərici sayılır. İlk baxışdan bazara artıq həcmdə neftin ixrac edilməsi qiymətlərin enməsi ilə müşahidə olunmalı idi.
Hesabatda qeyd olunur ki, qiymət artımı əlverişsiz hava şəraiti səbəbindən qlobal neft tədarükündə yaranmış fasilələr, həmçinin İran ətrafında gərginliyin artması ilə əlaqədar olub və bazara əlavə təzyiq göstərilib. Bu amillərə baxmayaraq, 2026-cı ildə neft qiymətlərinin azalacağı gözlənilir. Belə ki, qlobal istehsal qlobal tələbi üstələyəcək və bu da neft ehtiyatlarının artmasına gətirib çıxaracaq. Proqnozlara görə, qlobal ehtiyatlar 2027-ci ildə də artmaqda davam edəcək. Proqnoza əsasən, “Brent” markalı neftin orta qiyməti 2026-cı ildə bir barel üçün 58 dollar, 2027-ci ildə isə 53 dollar təşkil edəcək.
Hesabatın Azərbaycana aid hissəsində bildirilib ki, Azərbaycanda neft və digər maye karbohidrogen hasilatının 2026 və 2027-ci illərdə orta hesabla günə 0,54 milyon barel təşkil edəcək. Hazırda İtaliyanın “Auqusta” limanında Azərbaycanın "Azeri Light" markalı neftinin qiyməti əvvəlki göstərici ilə müqayisədə 0,07 dollar və ya 0,1 faiz azalaraq 71,14 dollar təşkil edib.
Türkiyənin Ceyhan limanında isə “Azeri Light” markalı neftin bir barelinin qiyməti 0,07 dollar və ya 0,1 faiz ucuzlaşaraq 68,65 dollar təşkil edib.
jpg_1770813987.jpg)
19 (1)jpg_1771885865.jpg)
