“Azərkosmos” kosmos sahəsində innovasiya və startap ekosisteminin inkişafına dəstək məqsədilə ilk “Milli Kosmik İnkubasiya” proqramına start verib.
AZƏRTAC xəbər verir ki, proqram ötən il kosmosda innovasiyalar və startapların inkişafına yönəlmiş layihələrdə uğurlu nəticə göstərmiş komandaların ideyalarının inkişafının davamı kimi həyata keçirilir. Layihəyə “Azərkosmos”un ilk “Milli Kosmik Hakaton”unun iştirakçıları, “Vistar” Mükəmməllik Mərkəzinin məzunları, həmçinin Yerin məsafədən müşahidəsi üzrə müsabiqənin iştirakçıları qatılıblar.
Bildirilib ki, İnnovasiya və Rəqəmsal İnkişaf Agentliyi və “SABAH.HUB” İnnovasiya Mərkəzi proqramda ekosistem üzrə icma tərəfdaşları qismində iştirak edir.
“Milli Kosmik İnkubasiya” proqramı Yerin müşahidəsi üzrə tətbiqlər və rəqəmsal platformalar sahəsində ilkin mərhələdə olan kosmik startap ideyalarının bazara hazır məhsul səviyyəsinə qədər inkişafını dəstəkləmək məqsədi daşıyır. Altı ay davam edəcək proqram çərçivəsində 8 komanda kosmik sahədə rəqəmsal həllər üzrə texniki və kommersiya təlimlərinə cəlb olunacaq. Komandalar yerli və beynəlxalq mentorların dəstəyi ilə startap ideyalarının inkişafı üzərində çalışacaqlar. Proqramın ilk mərhələsində iştirakçılar ideyalarının konseptinin formalaşdırılması, bazar araşdırması, biznes modelinin qurulması, prototipləşdirmə və investorlara təqdimat bacarıqları istiqamətində fəaliyyət göstərəcəklər. Növbəti mərhələdə isə startaplar məhsulun inkişafı və test olunmasını əhatə edən intensiv inkişaf fazasına keçəcəklər.
Proqram iştirakçılara texniki və biznes təlimləri, sənaye ekspertlərindən mentorluq, beynəlxalq kosmik ekosistemə çıxış imkanı, eləcə də məhsulu hazır olan startaplar üçün yerli və qlobal investisiya imkanlarından faydalanmaq imkanı yaradacaq.
Qeyd olunub ki, kosmik fəaliyyət sahəsində sahibkarlığın təşviqi, gücləndirilməsi və dayanıqlı inkişafının dəstəklənməsi “Azərkosmos”un əsas fəaliyyət istiqamətlərindən biridir. “Milli Kosmik İnkubasiya” layihəsinin məqsəd və hədəfləri “Azərbaycan Respublikasında rəqəmsal iqtisadiyyatın inkişafına dair 2026–2029-cu illər üçün Strategiya” ilə də uyğunluq təşkil edir.
