İrandakı səfirliyimizin fəaliyyətinin bərpa edilməsi rəsmi Bakının diplomatik dialoqa böyük töhfəsidir
Azərbaycan Respublikası beynəlxalq münasibətlər sistemində hər zaman qarşılıqlı hörmət, suverenlik və mehriban qonşuluq prinsiplərinə sadiq qalan məsuliyyətli tərəfdaş kimi tanınır. Aprelin 12-də Azərbaycanın İran İslam Respublikasındakı səfirliyinin fəaliyyətini bərpa etməsi rəsmi Bakının regional sülhə və diplomatik dialoqa verdiyi növbəti strateji töhfədir.
Milli Məclisin deputatı Kamran Bayramov "Azərbaycan" qəzetinə açıqlamasında bildirib ki, xüsusilə diqqətçəkən məqam səfirliyimizin fəaliyyətə başlamasının regionda hərbi əməliyyatların dayandırılmasından və ikihəftəlik atəşkəsin elan olunmasından dərhal sonraya təsadüf etməsidir: "Bu zamanlama təsadüfi olmayıb, Azərbaycanın çətin anlarda humanitar və siyasi dəstəyini əsirgəməyən, qonşuluq münasibətlərinə xüsusi önəm verən dövlət olduğunun bariz nümunəsidir. Azərbaycan bir daha sübut etdi ki, o, təkcə xoş günlərin deyil, həm də sınaq anlarının etibarlı qonşusudur".
Deputat diqqətə çatdırıb ki, səfirliyin fəaliyyəti hazırkı mərhələdə təhlükəsizlik və təşkilati məsələlər nəzərə alınmaqla, mərhələli şəkildə tənzimlənir. İlkin dövrdə məhdud sayda diplomatik və inzibati heyətlə işə başlayan missiyanın əsas məqsədi tərəflər arasında etimad mühitini möhkəmləndirmək və birbaşa ünsiyyət kanallarını rəsmi müstəvidə canlandırmaqdır. Bu yanaşma prosesin tam sabit və sistemli şəkildə idarə olunmasına xidmət edir. "Ölkəmiz regionda davamlı sülhün və sabitliyin təmin olunması istiqamətində irəli sürülən bütün təşəbbüsləri dəstəklədiyini bir daha qətiyyətlə bəyan edir. Səfirliyin açılması, sadəcə, diplomatik binanın fəaliyyətinin bərpası deyil, həm də regiondakı gərginliyin azaldılmasına, iqtisadi-tranzit əlaqələrinin gələcək inkişafına və təhlükəsizlik mühitinin möhkəmlənməsinə yönəlmiş iradənin göstəricisidir", - deyə deputat əlavə edib.
K.Bayramov qeyd edib ki, Azərbaycanın bu strateji addımı regionun gələcək simasını müəyyən edən yeni əməkdaşlıq formatlarının formalaşması üçün münbit və etibarlı zəmin hazırlayır. Onun sözlərinə görə, diplomatik münasibətlərin bərpası təkcə iki ölkə arasındakı bağları deyil, həm də bütün bölgədə qarşılıqlı etimada söykənən inteqrasiya proseslərini stimullaşdırır. Bu qərar rəsmi Bakının Cənubi Qafqazda və onun hüdudlarından kənarda davamlı sülhün əldə olunması, gərginlik ocaqlarının aradan qaldırılması və konstruktiv dialoqun qurulması istiqamətindəki aparıcı rolunu bir daha qətiyyətlə təsdiqləyir. Beləliklə, Azərbaycan növbəti dəfə nümayiş etdirir ki, o, regionda sabitliyin əsas təminatçısı və sülh quruculuğu proseslərinin mərkəzi aktoru qismində çıxış edir.
Əsmər QARDAŞXANOVA,
"Azərbaycan"
