Nepalda baş verən dağıdıcı sel və torpaq sürüşməsi buzlaqlarla bağlı hadisələrin yaratdığı təhlükələri yenidən gündəmə gətirib.
AZƏRTAC xəbər verir ki, fransız buzlaqşünaslar Alp dağlarında bununla bağlı təhlükələrin mövcudluğu barədə xəbərdarlıq edirlər. Mütəxəssislərin sözlərinə görə, buzun sürüşən qayalarla birlikdə hərəkəti fəlakətin təsirini daha da gücləndirə bilər. Bununla belə, alimlər konkret hadisə ilə iqlim dəyişikliyi arasında dəqiq səbəb-nəticə əlaqəsi yaratmaq üçün hələlik kifayət qədər əsas olmadığını bildirirlər.
Qeyd edək ki, 2024-cü ilin iyununda Fransanın Alp dağlarındakı Berard kəndi güclü sel nəticəsində ciddi dağıntıya məruz qalıb. Buzlağın altında yaranan gölün qəflətən boşalması, güclü yağışlar və qarın sürətli əriməsi selin təsirini artırıb.
2025-ci ilin mayında isə İsveçrənin Vale kantonunda “Birch” buzlağının çökməsi Blatten kəndinin təxminən 90 faizini buzun, qaya parçalarının və palçığın altında qoyub. Əvvəlcədən aparılan təxliyə nəticəsində insan itkisi az olsa da, hadisə daşqın təhlükəsi yaradan buzlaq gölünün formalaşmasına səbəb olub.
Mütəxəssislər hesab edirlər ki, qlobal istiləşmə qarşıdakı onilliklərdə Alp dağlarında vəziyyəti daha da mürəkkəbləşdirə bilər. Mon-Blan massivində yerləşən “Taconnaz” buzlağının qeyri-sabitləşməsi, eləcə də “Bossons” buzlağının sürətlə dəyişən ön hissəsi alimlərin xüsusi diqqətindədir.
Mütəxəssislərin fikrincə, Alp vadilərinin daha sıx məskunlaşması və yaşayış məntəqələrinin buzlaqlara yaxın yerləşməsi riski artırır. Bu səbəbdən buzlaq uçqunları və buzlaqla əlaqəli daşqınlar Alp regionunda insan həyatı üçün real təhlükə olaraq qalır.
