İlham Əliyevin müasir idarəçiliyə xidmət edən siyasi islahatları ölkənin hərtərəfli tərəqqisinin təminatçısıdır
İkinci Qarabağ müharibəsindəki şanlı Zəfər regionda yeni reallıqların formalaşması ilə yanaşı, ölkəmizin ictimai-siyasi həyatında, o cümlədən idarəetmə sistemində də mühüm dəyişikliklərin tətbiqinə real zəmin yaratmışdır.
Qlobalmiqyaslı təşəbbüsləri, mütərəqqi siyasi-iqtisadi islahatları, sosial layihələri ilə Azərbaycanı tarixinin ən qüdrətli dövlətinə çevirən İlham Əliyev yaranmış yeni reallıqlar fonunda müasir idarəetmə modelini dəyərləndirərək ilk növbədə işğaldan azad edilmiş Qarabağ və Şərqi Zəngəzur iqtisadi rayonlarının zamanın tələblərinə uyğun hərtərəfli tərəqqisi naminə modern siyasi islahatların təməlini formalaşdırdı.
Bu il yanvarın 10-da yerli televiziya kanallarına müsahibəsində İlham Əliyev müvafiq məsələyə toxunaraq vurğulayıb ki, Qarabağ və Şərqi Zəngəzurda tətbiq edilən yanaşma, eyni zamanda yeni idarəetmə mexanizmi bütün ölkəni əhatə edəcək: "İndi biz yeni idarəetmə modeli üzərində işləyirik. Əlbəttə, kadr potensialı çox önəmlidir. Həmçinin eyni zamanda azad edilmiş torpaqlarda daha çevik, daha operativ, bürokratiyaya, xoşagəlməz hallara qurşanmamış yeni strukturlar yaradılıb. Yəni bu təcrübəni biz sonra tədricən ölkəmizin digər hissələrinə keçirəcəyik".
Ümumiyyətlə, İlham Əliyev tərəfindən həyata keçirilən genişmiqyaslı islahatlar, o cümlədən kadr islahatları cəmiyyət həyatı üçün böyük əhəmiyyət kəsb edir. Çünki hansı sahədə kadr islahatları aparılırsa, o sahədə pozitiv dəyişikliklər baş verir və bu da vətəndaşlar tərəfindən rəğbətlə qarşılanır. Şübhəsiz ki, müasir dövrün çağırışlarına cavab verən bu islahatlar ölkəmizin ümumi inkişafına, məmur-vətəndaş münasibətlərinin sağlam ruhda qurulmasına xidmət edir. Hələ illər öncə Azərbaycanda kadr islahatlarına ehtiyacın olduğunu deyən İlham Əliyev bu prosesləri dəyərləndirərkən vurğulayırdı ki, islahatlar təkmilləşmə, yeni dövrə uyğunlaşma deməkdir. Dünya miqyasında uğurlar əldə etmiş ölkələrin təcrübəsinə nəzər salsaq görərik ki, bu nailiyyətlər məhz tərəqqi hesabına əldə edilib. Əlbəttə ki, Azərbaycanda da gedən çoxşaxəli islahatlar, o cümlədən idarəetmə sahəsində yeniliklər, həmçinin kadr islahatları dövlətin siyasətini və niyyətini göstərir.
Yeni idarəetmə modeli də Azərbaycan Prezidentinin mütərəqqi islahatlarının tərkib hissəsidir. Belə ki, İlham Əliyev işğaldan azad edilmiş rayonlara xüsusi nümayəndələrini təyin edir və həmin şəxsləri qəbul edərək tapşırıqlarını, göstərişlərini verir.
Bir müddət sonra isə verdiyi tapşırıqların icrası ilə maraqlanmaq üçün həmin rayonlara səfər edib mövcud vəziyyətlə yerində tanış olur. Ona görə də deyə bilərik ki, Prezidentin rayonlara təyin etdiyi xüsusi nümayəndələrlə görüşlər keçirməsi və onlara tapşırıqlarını verməsi ölkənin hərtərəfli inkişafında əsas rol oynayan bölgələrin tərəqqisi ilə yanaşı, vətəndaş amilinə verilən yüksək dəyəri nümayiş etdirir.
Martın 28-də İlham Əliyevin Şərqi Zəngəzur iqtisadi rayonuna daxil olan Laçın rayonuna təyin etdiyi xüsusi nümayəndəsi Məsim Məmmədova tapşırıq və göstərişlərini verməsi və eyni zamanda yeni idarəetmə modelinin tətbiqini dəyərləndirməsi də deyilənlərin əyani təzahürüdür. Prezident bildirdi ki, dövlət öz üzərinə düşən vəzifəni icra edir. Demək olar ki, indi işğaldan azad edilmiş əksər rayonlarda (hələlik Kəlbəcər rayonu istisna olmaqla) Prezidentin xüsusi nümayəndələri fəaliyyət göstərirlər.
Prezident həmçinin yeni idarəetmə modelinin tətbiqi məsələsinə də toxunaraq vurğuladı ki, artıq hər bir sahədə yeni idarəetmə üsulu tətbiq edilməlidir və edilir. Gələcəkdə bu, yeni idarəetmə modeli kimi ölkəmizin bütün digər hissələrində də tətbiq edilməlidir: "Yəni bu həm böyük quruculuq işləridir, həm də yeni idarəetmə üsuludur. Əminəm ki, bu təkcə azad edilmiş ərazilərin yox, bütövlükdə ölkəmizin hərtərəfli inkişafına böyük töhfə verəcəkdir".
Prezidentin verdiyi tapşırıqarın uğurlu icrası, işğladan azad edilən ərazilərdə aparılan yenidənqurma işləri də göstərir ki, xüsusi nümayəndəlik modeli indiki gerçəklikdə uğurlu üsuldur. Bütün bunlar isə İlham Əliyevin islahatlarının mükəmməlliyinin göstəricisidir desək, yanılmarıq. Çünki idarəçilik sisteminin zamanın tələblərinə uyğun təkmilləşdirilməsi gələcəyə daha böyük inamla addımlamağa, yeni-yeni hədəflərin müəyyənləşdirilməsinə əsas verir. Azərbaycan Prezidentinin mütərəqqi islahatları ölkəmizin dinamik inkişafının gətirdiyi yeni keyfiyyət mərhələsində baş tutur və kompleks xarakter daşıyır.
Hazırda azad edilmiş ərazilərə əhalinin qayıdışının təmini Azərbaycanın yeni inkişaf magistralının ideoloji nüvəsini təşkil edir. İşğaldan azad edilmiş ərazilərimizdə yeni idarəetmə üsulunun tətbiqi isə işin səmərəliliyinin artırılmasında əhəmiyyətli rol oynayır. Prezidentin söylədiyi kimi, yeni model gələcəkdə təkcə azad edilmiş ərazilərin yox, ölkəmizin hərtərəfli inkişafına mühüm töhfəsini verəcək.
Dövlət idarəçiliyi sistemini daim təkmilləşdirən və bu istiqamətdə düşünülmüş addımlar atan İlham Əliyev, əlbəttə ki, bu qərarları verərkən ilk növbədə xalqın və dövlətin maraqlarını, milli mənafeləri nəzərə alır. Bütün islahatlar, yeniliklər Azərbaycanın daha da qüdrətlənməsini şərtləndirir.
Bütün bunları həm ölkə ictimaiyyəti, həm də beynəlxalq təşkilatlar görürlər. Ona görə də hazırlanan hesabatlarda Azərbaycanda sosial-iqtisadi islahatların uğurla aparıldığı qeyd olunur. Dünya Bankının "Doing Business" hesabatında da Azərbaycanın dünyanın ən çox islahat aparan 20 ölkəsindən biri kimi qeyd edilməsi, aparılan rəy sorğularında əhalinin mütləq əksəriyyətinin Prezident İlham Əliyevi - islahatların rəhbərini dəstəkləməsi söylənilənlərin real təsdiqidir.
Bir sözlə, ən islahatçı Prezidentin verdiyi qərarlar Azərbaycanın hərtərəfli inkişafına mühüm töhfələr verir. İslahatlara şahidlik edən ölkə ictimaiyyəti də dövlət idarəetmə sistemində həyata keçirilən yenilikləri təqdirəlayiq hal kimi qiymətləndirir.
Rəşad BAXŞƏLİYEV,
"Azərbaycan"
