1949-cu ildə Gədəbəy rayonunun Qaraməmmədli kəndində ziyalı ailəsində doğulmuşam. 1971-ci ildə keçmiş Azərbaycan Politexnik İnstitutunu tikinti mühəndisi ixtisası üzrə bitirdikdən sonra 3 il indiki Bişkekdəki "Qırğızyollayihə" İnstitutunda layihəçi mühəndis işləmişəm. 
Sonra Vətənə - Azərbaycana qayıdıb uzun müddət dəmir yolu sistemində işləmişəm. Azərbaycanın Fəxri dəmiryolçusuyam. Amma məqsədim özümü təqdim etmək deyil. Bu məktubu "Azərbaycan" qəzetinə yazmaqla son illər ölkəmizdə baş verən qürurlu hadisələrə münasibət bildirmək, ürək sözlərimi çatdırmaqdır. 
Təcavüzkar Ermənistanın hiyləgərliyi, riyakarlığı, "böyük Ermənistan" yaratmaq xülyası, nəhayət, ona çox baha başa gəldi. Prezident, Müzəffər Ali Baş Komandan İlham Əliyevin rəhbərliyi ilə Azərbaycanın rəşadətli Silahlı Qüvvələri mənfur düşmənin "yenilməz ordu"sunu darmadağın etdi. 30 il ərzində erməni separatçılarının işğal etdikləri ərazilərimizdə yaratdıqları hərbi bazalardan, yeraltı tunellərdən, istehkamlardan əsər-əlamət qalmadı. Bununla əsgər və zabitlərimizin qəhrəmanlığı, xalqımızın birliyi, Ali Baş Komandanın uzaqgörən və qətiyyətli siyasəti nəticəsində tarixi ərazilərimiz işğalçıların tapdağından azad olundu, üçrəngli bayrağımız qədim və əzəli torpaqlarımızda dalğalandı.
Mən bu yaşda qürur hissi keçirirəm ki, müstəqil Azərbaycanın bütün ərazisində ilk dəfə keçirilən prezident seçkisində iştirak etdim. Etiraf edim ki, indiyə qədər iştirak etdiyim seçkilərin heç birində fevralın 7-də gördüyüm qədər qələbəliyin şahidi olmamışdım. Gədəbəylə əlaqə saxladım, dedilər orada da əhali seçkiyə kütləvi surətdə qatılıb. Bu, əsl xalq dəstəyi, xalq həmrəyliyi idi. Həmin dəstəyin ünvanı, həmrəyliyin səbəbkarı isə qalib Prezident İlham Əliyevdir. Amma bu qələbə təkcə İlham Əliyevin deyil, bütün xalqımızın, ölkəmizin, dövlətimizin qələbəsidir. Bu, Zəfər ardınca zəfərdir. 

Ələddin ŞİRİNOV,
Azərbaycanın Fəxri dəmiryolçusu