Azərbaycanda həyata keçirilən bütün sosial-iqtisadi layihələr sülh məramlıdır
Azərbaycan bu gün yol infrastrukturunu mükəmməl inkişaf etdirən ölkələrdən hesab olunur. Son misal. Xəbər verildiyi kimi, Prezident İlham Əliyev avqustun 7-də dövlət sərhədi magistral avtomobil yolunun Gəncə-Qazax-Gürcüstan ilə dövlət sərhədi (130,15 km) hissəsinin 4 zolağa genişləndirilməsi sayəsində yenidən qurulan, ümumi uzunluğu 102 kilometr olan Gəncə-Qazaxbəyli hissəsinin açılışında iştirak etmişdir.
"Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı" çərçivəsində yenidən qurulan yolun bu hissəsində 67 alt keçid, 17 qovşaq və 20 körpünün tikintisi başa çatdırılmışdır. Yol iri yaşayış məntəqələrindən kənar keçir ki, bu da təhlükəsizlik baxımından vacib şərtdir.
Qeyd edək ki, Bakı-Qazax-Gürcüstan ilə dövlət sərhədi magistral avtomobil yolu beynəlxalq nəqliyyat dəhlizinin Azərbaycandan keçən tərkib hissəsi kimi xüsusi əhəmiyyət daşıyır və Avropa-Asiya və Yaxın Şərq ölkələri ilə, həmçinin respublika ərazisində bu istiqamətdə əlaqələrin inkişafında mühüm rol oynayır. Böyük İpək yolunun Azərbaycandan keçən hissəsi kimi bu yol Avropa ilə Asiya arasında avtomobillə beynəlxalq və daxili yükdaşımaların artmasına müsbət təsir etmək imkanına malikdir.
Artıq Azərbaycan yeni saldığı yollar vasitəsilə şimalla cənubu, şərqlə qərbi bir-birinə bağlayan, kommunikatıv əlaqələri yüksək səviyyədə qura bilən ölkədır. Vaxt var idi bütün supergüclərin maraqlarının kəskin qarşılaşdığı ölkəmiz ağır münaqişələrin mərkəzinə çevrilmişdi. Azərbaycan Prezidentinin gücü ondadır ki, o, müharibələrə köklənən yollardan sülh körpülərini sala bilmiş və Azərbaycanın yeni imicini formalaşdırmışdır. İlham Əliyev qarşıya yalnız müasir, beynəlxalq standartlara cavab verən yolların çəkilməsini yox, həm də bu yollardan ölkəmizin milli maraqlarına maksimum istifadə etmək vəzifəsini qoymuşdur.
Bədnam qonşumuz isə ərazisində yollara artan tələblərin öhdəsindən gələ bilmir, bu məqsədə ayrılan qəpik-quruşla böyük dəyişikliklər əldə etmək mümkün olmadığından ağ yalanların hesabına xal qazanmaq istəyir. Biz iqtisadiyyatımızın istənilən sahəsində Ermənistandan qat-qat öndəyik. Dövlət başçısının regionlara son səfəri zamanı eyni gündə bir neçə mühüm obyektin açılışında iştirakı da bunu təsdiq edir.
Qeyd etdiyimiz avtomobil yolunun, "Venzana" mebel fabrikinin və bir neçə digər obyektin açılışının bir gündə baş tutması ölkədə atılan zəruri iqtisadi addımların nə dərəcədə sanballı olduğunu göstərir. "Venzana" "Saloğlu" mebel istehsalı müəssisəsinin nəzdində yaradılıb. 2000-ci ildən mebel istehsalı və satışı ilə məşğul olan "Saloğlu" ölkəmizdə kifayət qədər tanınır. Şirkətin istehsal etdiyi məhsullar daxili bazarın tələbatını ödəməklə yanaşı, həm də ixrac edilir. 425 nəfərin çalışdığı müəssisənin illik istehsal gücü 14 min 260 mebel dəstidir. "Saloğlu"nun bu səviyyəyə çatmasında dövlətin də dəstəyi olmuşdur. İndiyəcən müəssisəyə istehsal fəaliyyətini genişləndirmək üçün Sahibkarlığın İnkişafı Fondundan 10 milyon manat güzəştli kredit ayrılmışdır. Nəticədə "Saloğlu" müəssisəsi işini daha uğurla qura bilmiş, dünyanın aparıcı mebel şirkətləri ilə sıx əməkdaşlıq yaratmış, mebel istehsalı sahəsində innovativ həllərin, qabaqcıl texnologiyaların və iş təcrübəsinin Azərbaycana gətirilməsi və tətbiqi istiqamətində önə çıxmışdır.
Yeni açılan "Venzana" mebel fabrikinə gəldikdə onun da məhsullarının daxili bazarda satışı ilə yanaşı, Rusiya, Qazaxıstan, Gürcüstan, Almaniya və digər ölkələrə ixracı nəzərdə tutulur. Layihənin davamı olaraq 20 hektar ərazidə ümumi dəyəri 27,2 milyon manat olan 4 yeni fabrikin (masa və oturacaq, süngər, metal məmulatları və döşək istehsalı fabrikləri) tikilməsi nəzərdə tutulur. Digər mebel istehsalı müəssisələrinin xammal tələbatının yerli istehsal hesabına təmin edilməsinə hesablanan bu layihə 2025-ci ildə tamamlanacaq.
Bu baxımdan Ermənistanın bizimlə rəqabət aparmaq cəhdləri gülüncdür, hərçənd erməni təbliğat maşını öz halvasına şirin deməkdən yorulmur. Nə deyə bilərik. Ermənilər hələ "halva-halva" taktikası ilə iqtisadiyyatlarını "canlandırmaqla" başlarını qatırlar. Onların politoloqları min hoqqadan çıxır, qaranlıqlara kəllə vurub heç kimin ağlına gəlməyən uydurma faktlarla "təbliğat yallısı" gedirlər. İşğal yuxusundan ayıla bilməyən bu ölkə bütün regional layihələrdən, beynəlxalq dəhliz və yol qovşaqlarından kənarda qalıb, Azərbaycan və Türkiyə ilə bütün iqtisadi əlaqələri sıfırlayıb. Ona görə ermənilər inkişafdan danışanda uydurmalarsız, saxta rəqəmlərsiz ötüşə bilmirlər. Fərqinə varmırlar ki, həmin saxta rəqəmlər olsa-olsa onların iqtisadi xəyallarının göstəricisidir.
Bahadur İMANQULİYEV,
"Azərbaycan"
