Rusiyada ənənəvi olaraq digər xalqlara qarşı şovinist əhvali-ruhiyyə hökm sürür və diskriminasiya geniş yayılmış praktikadır. Görünür, artıq müsəlman xalqlarına, bu ölkədə yaşayan və ya oraya gedən müsəlmanlara qarşı da açıq təzyiqlərə start verilib. Bu, Rusiyada islamofobiyanın alovlandırılması deməkdir.
AZƏRTAC xəbər verir ki, bu fikirləri Milli Məclisin Səhiyyə komitəsinin sədri, akademik Əhliman Əmiraslanov səsləndirib.
O qeyd edib ki, son zamanlar Rusiyada baş verən hadisələr bu ölkədə şovinizm, diskriminasiya və milli ayrı-seçkiliyin açıq nümunəsidir. Xüsusilə Yekaterinburqda baş verənlər prosesin məqsədyönlü şəkildə idarə olunduğunu aydın göstərir. Müharibədə ciddi insan çatışmazlığı ilə üzləşən Rusiya hakimiyyəti miqrantları müxtəlif təzyiq, şantaj və məcburetmə üsulları ilə cəbhəyə göndərməyə çalışır. Miqrantlar narkotik ittihamları, törətmədikləri cinayətlər və ailə üzvləri ilə təhdid edilərək, müharibəyə getməyə məcbur olunurlar. Onlara vəd edilən kompensasiyalar isə ya ümumiyyətlə verilmir, ya da aldadıcı xarakter daşıyır. Döyüşdən qayıdanlar yenidən təzyiq və şantajla üzləşir, ikinci dəfə müharibəyə getməyə məcbur edilirlər.
Akademikin sözlərinə görə, miqrantlarla yanaşı, Rusiya vətəndaşı olan qeyri-ruslar da milli kimliyinə görə bu cür təqib və təzyiqlərin qurbanına çevrilirlər. Lakin baş verənlər təkcə Yekaterinburqla məhdudlaşmır, proseslər demək olar ki, Rusiyanın bütün regionlarını əhatə edir. Ümumiyyətlə, Rusiya tarixən Azərbaycanın suverenliyini qəbul etməyib. 20 Yanvar faciəsi, Xocalı soyqırımı, torpaqlarımızın işğalı və həmin ərazilərin 30 il ərzində işğalda saxlanılması kimi proseslərdə Moskvanın açıq və dolayı dəstəyi danılmazdır. Bu gün də Azərbaycanın strateji qərarlarına və beynəlxalq müstəqilliyinə qarşı Rusiyanın təzyiqləri, informasiya və kiberhücumları, eyni zamanda, Rusiya ərazisində Azərbaycan vətəndaşlarının hüquqlarının kobud şəkildə pozulması həmin siyasətin davamıdır.
“Son olaraq, Həştərxanda keçirilən tədbirə dəvət olunmuş deputatlarımızın Rusiya ərazisinə buraxılmaması da bu ölkənin Azərbaycana qarşı formalaşdırdığı münasibətin bariz nümunəsidir. Rusiyada azərbaycanlıların heç bir əsas olmadan saxlanılması həm beynəlxalq hüquq, həm də insan haqları baxımından ciddi pozuntudur. Bu, yalnız Azərbaycan vətəndaşlarına deyil, ümumilikdə region xalqlarına qarşı yürüdülən təzyiq siyasətinin tərkib hissəsidir. Xüsusilə Yekaterinburq şəhərində Azərbaycan vətəndaşlarının ardıcıl şəkildə saxlanılması və bu barədə ictimaiyyətə şəffaf məlumat verilməməsi rəsmi Moskvanın digər xalqlara qarşı aqressiv və sayğısız münasibətini bir daha nümayiş etdirir. Artıq bu hadisələr Rusiyanın daxili məsələsi olmaqdan çıxıb. Avropa və dünya ictimaiyyəti belə hallara qarşı daha sərt və prinsipial mövqe sərgiləməli, digər xalqların hüquqlarının pozulmasına biganə qalmamalıdır. Rusiyanın dövlət orqanları tərəfindən törədilən etnik zəmində cinayətlər BMT və digər beynəlxalq təşkilatların gündəminə çıxarılmalı, bu zorakılıqlar beynəlxalq hüquq çərçivəsində lazımi qiymətini almalıdır. Əks halda, yaranmış cəzasızlıq mühiti regionda daha böyük humanitar fəlakətlərə yol aça bilər”, - deyə Əhliman Əmiraslanov vurğulayıb.
