19 Dekabr 2021 00:25
1137
CƏMİYYƏT
A- A+

Yaralı olsa da, savaş meydanına dönən igid

 

Məhəmmədəli İbrahimli elmdə də şəhidliyi kimi zirvələrə yüksəlirdi

 

44 günlük Vətən müharibəsində ordumuz ərazilərimizi işğaldan azad etməklə tarixə qəhrəmanlıq salnaməsi yazdı. Birinci Qarabağ savaşındakı kimi, gənclərimiz Vətən müharibəsində də örnək oldular. Onlar göstərdikləri misilsiz şücaətləri, bitib-tükənməyən Vətən sevgiləri ilə dillərdə dastana çevrildilər.

Həmin gənclərdən biri də Məhəmmədəli Mütəllim oğlu İbrahimlidir. O, 1996-cı ildə Beyləqan rayonunda anadan olmuşdu. 44 günlük Vətən müharibəsinədək işğal altında qalan Füzuli rayonunun Cuvarlı kəndindən idi. 2003-2014-cü illərdə 215 saylı orta məktəbdə oxumuşdu. Dörd il Azərbaycan Dövlət Neft və Sənaye Universitetində bakalavr, sonra isə Azərbaycan Texniki Universitetində magistr təhsilini başa vurmuşdu. Məhəmmədəli vətənpərvərliyi ilə seçilən, hər kəsin dərin hörmət və sevgisini qazanan şəxsiyyət kimi tanınmışdı.

Düşmən səngərinə kəşfiyyatçı kimi girən Məhəmmədəlinin 2020-ci ilin yayında doktorantura səviyyəsində təhsil almaq fikrindən imtina edərək, həqiqi hərbi xidmətə yollanması da vətənpərvərliyinin bariz nümunəsi idi. O, Vətən müharibəsində Azərbaycan Ordusunun kəşfiyyatçısı kimi işğal altında olan ərazilərimiz uğrunda gedən döyüşlərə qatıldı. Oktyabrın 3-dən 4-nə keçən gecə ağır yaralansa da, bir həftə hospitalda müalicə aldıqdan sonra təkid və tövsiyələrə baxmayaraq, yenidən cəbhəyə qayıtdı. 13 oktyabr 2020-ci ildə Ağdərə istiqamətində gedən döyüşlərdə şəhid oldu.

Qəhrəmancasına döyüşüb, düşmənə layiqli cavab verən igidlərin şəhidliyi müqəddəsdir. Lakin elə məsələlər olur ki, o, ürək ağrısı ilə xatırlanır. Şəhid Məhəmmədəlinin nəşinin döyüş bölgəsindən düz 63 gündən sonra götürülməsi yalnız doğmalarına deyil, silahdaşlarına da ağır mənəvi-psixoloji zərbə oldu. 2020-ci il dekabrın 15-də Bakının Sabunçu rayonundakı Şəhidlər xiyabanında dəfn edilən, xalq arasında qəhrəmanlığı dillərdə gəzən Məhəmmədəlini hər kəs, xüsusən də döyüş dostları əsl qəhrəman kimi dəyərləndirir, sayğı, ehtiramla xatırlayırlar. O, Azərbaycan Respublikasının ərazi bütövlüyünün təmin edilməsi uğrunda gedən döyüş əməliyyatlarında fəal iştirak etdiyinə və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə “Vətən uğrunda” və “Suqovuşanın azad olunmasına görə” medalları ilə təltif olundu.

Yalnız onu deyək ki, yaralı-yaralı döyüşlərə dönən igid Məhəmmədəli İbrahimli elmdə də şəhidliyi kimi zirvələr fəth edəcəkdi, təəssüf ki, amansız düşmən buna aman vermədi, yolları da ömrü kimi yarımçıq qaldı...

Əlbəttə, Məhəmmədəli kimi igidlərin Vətən qarşısındakı xidmətlərinin mükafatı xalqın sevgisi, bir də qazandıqları şəhidlik zirvəsidir!

 

Məhəmməd NƏRİMANOĞLU,

“Azərbaycan”

 

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video