Əşyaların uzaqdan idarə edilməsində əvəzsiz rolu olan düyməli idarəetmə cihazının - “pult”un icadı ilə bir çox işlər asanlaşdırılıb. Müəyyən düymələrə toxunmaq kifayət edir ki, cihaza komanda verilsin və müvafiq əmr yerinə yetirilsin.
Pultun ilk təsviri Nikola Teslaya aiddir. O, 1898-ci ildə hərəkət edən gəmilərin və quru nəqliyyat vasitələrinin mexanizmlərinin naqilsiz idarə edilməsi üçün cihaz kəşf etmişdi. Həmin ildə bu ideyanı patentləşdirərək sərgidə ilk dəfə pult ilə idarə olunan qayıq maketini ictimaiyyətə göstərmişdi.
Daha sonra - 1903-cü ildə İspaniyada Leonardo Torres de Kevedo elektromaqnit dalğalı siqnalla verilən əmrləri yerinə yetirən “Telekin” cihazını təqdim etdi. O, ixtirasını
3 ölkədə patentləşdirmişdi. Bu cihazın hərbi texnikalarda istifadəsi nəzərdə tutulsa da, maliyyə çatışmazlığı səbəbindən həyata keçirilmədi. İkinci Dünya müharibəsi illərində almanlar uzaqdan idarə olunan hərbi raketlər üzərində müntəzəm işləyirdilər. Nəticədə Almaniyada dünyanın ilk uzaqdan idarə olunan zenit raketi olan “Wasserfall” yaradıldı.
İlk naqilsiz televizor pultuna gəldikdə isə o, 1955-ci ildə “Zenith Radio Corporation”da işləyən amerikalı Eugene Polley tərəfindən hazırlanıb. Bir düyməli “Flash-Matic” adlandırılan pult siqnalı işıq şüası ilə ötürürdü. Görünüşcə fanara bənzəyən cihaz televizorun 4 küncündə yerləşdirilən müvafiq hissələrə tutularaq tənzimlənirdi, yalnız yandırıb-söndürmək funksiyasına malik idi. Lakin işığın qeyri-dəqiqliyi istifadəçilər üçün çətinlik yaradırdı.
Şirkətin bir il sonra hazırladığı nümunə isə kütləvi istehsalın başlanmasına səbəb oldu. Mühəndis Robert Adler cihazı ultrasəs texnologiyası əsasında ərsəyə gətirmişdi. 4 düyməli bu pultlar bazarda uzun müddət dominant olaraq qaldı. Lakin belə cihazla satılan televizorların qiyməti çox baha idi. 1960-cı illərin əvvəllərində şirkət yeni təqdim etdiyi pultların ölçü və funksiyasında dəyişiklik etdi. Onlar daha kiçik ölçülü idi və batareyadan istifadə mexanizmi ilə işləyirdi.
