Hazırda Ermənistan milli maraqları baxımından Azərbaycan siyasəti ilə üst-üstə düşən bir mərhələyə daxil olub. Ermənistan tərəfindən baxıldıqda, Türkiyənin əsas hədəfi əvvəlcə Azərbaycan və Ermənistan arasında sülh sazişinin imzalanmasıdır. Növbəti mərhələdə isə Türkiyə–Ermənistan quru sərhədinin açılması nəzərdə tutulur. Bu, Azərbaycan və Orta Asiyaya gedən yükdaşımaların Ermənistan ərazisindən həyata keçirilməsinə, nəticədə isə ölkənin əlavə iqtisadi gəlir əldə etməsinə şərait yaradacaq.
Bu fikirləri AZƏRTAC-a açıqlamasında türkiyəli siyasi ekspert Engin Özer bildirib.
Onun sözlərinə görə, bu gəlir Ermənistanın milli təhlükəsizliyini möhkəmləndirə, iqtisadi asılılığını azalda və Avropa İttifaqı ilə ticarət əlaqələrini genişləndirməsinə şərait yarada bilər.
Ekspertin fikrincə, Prezident İlham Əliyevin son illərdə həyata keçirdiyi balanslı siyasət məhz bu məqsədlərlə uzlaşır. Azərbaycanın Ermənistan üçün təqdim etdiyi bütün imkanlar, - istər sülh sazişinin imzalanması, istərsə də Türkiyə ilə sərhədin açılması, - Paşinyan hökumətinin strateji planlarında yer alan addımlardır. Bu isə qarşılıqlı maraqlara əsaslanan əməkdaşlıq modelidir.
Engin Özer Ermənistan daxilindəki çətinliklərə də diqqət çəkib. O, ölkədəki daşnakların və hələ də ölkə ərazisində mövcud olan Rusiya hərbi bazalarının Paşinyan hökumətinə ciddi təzyiq göstərdiyini bildirib. “Belə bir şəraitdə Paşinyanın Qərbə yönəlməsi böyük cəsarət tələb edir. Amma proses hələ başa çatmayıb. Xarici müdaxilə nəticəsində yaxın həftələrdə Ermənistanda siyasi böhran mümkündür. Əgər hökumət bu mərhələni uğurla keçsə, sazişin şərtlərinə əməl olunacağına şübhə etmirəm”, - deyə siyasi ekspert qeyd edib.
O vurğulayıb ki, Ermənistanın Türkiyə ilə sərhədin açılmasına ciddi ehtiyacı var. Hazırda Ermənistan dünya ilə əsasən Gürcüstan üzərindən əlaqə saxlayır ki, bu da həm böyük gəlir itkisi, həm də iqtisadi asılılıq yaradır. İnkişaf edən Cənubi Qafqazda Ermənistan üçün də yol var və bu, uzunmüddətli sülhdən keçir. Əgər daxildə destabilizasiya baş verməsə, Ermənistan sazişə əməl edəcək.
19 (1)jpg_1771885865.jpg)
