Ortaq tarix, mədəniyyət, dil və dini dəyərlər əsasında formalaşmış Azərbaycan-Türkiyə münasibətləri tarixin bütün sınaqlarından uğurla çıxaraq dünyaya qardaşlıq nümunəsini təqdim edir. Müasir müstəqil Azərbaycan dövlətinin qurucusu, Ulu Öndər Heydər Əliyevin "Bir millət, iki dövlət" çağırışı bütün dövrlərdə aktuallığını qorumaqla bərabər, bu əlaqələrin hər sahədə uğurlu inkişafına bələdçilik edir.
Milli Məclisin deputatı Vüqar Rəhimzadə bildirib ki, bu günlərdə imzalanmasının 4 illiyini böyük qürur və coşqu hissi ilə qeyd etdiyimiz Şuşa Bəyannaməsi iki dost, qardaş, müttəfiq ölkənin münasibətlərinin dünəni, bu günü və gələcəyi barədə aydın təsəvvür yaradır. Bu bəyannamənin qəbulundan sonra hər il sənədin imzalanması günündə Qarabağın tacı Şuşanın evsahibliyi ilə keçirilən beynəlxalq konfranslar günümüzün əsas çağırışlarını özündə ehtiva etməklə yanaşı, iki dost ölkənin həmin məsələlərə birgə yanaşmasını, qarşıya qoyduğu hədəfləri açıqlayır.
Deputat qeyd edib ki, Azərbaycan-Türkiyə birliyi, həmrəyliyi regionda sabitliyin, təhlükəsizliyin qarantı kimi dəyərləndirilir. Hazırda dünya bu birliyin fonunda ümumilikdə türk dünyasının həmrəyliyinin şahididir. Yeni dünya düzəninin formalaşdığı hazırkı dövrdə bu birliyin daha da möhkəmləndirilməsinə, Türk Dövlətləri Təşkilatının beynəlxalq nüfuzunun artmasına böyük ehtiyac var. Bu gün Türkiyə-Azərbaycan birliyi təkcə bölgə deyil, bütövlükdə Avrasiya üçün önəmli amilə çevrilib. Dövlət başçısı İlham Əliyevin çıxışlarında qeyd etdiyi kimi, Türkiyə bu gün dünya çapında söz sahibidir. Təkcə bölgəmizdə deyil, dünya çapında bir çox məsələlərin necə həll edilməsi Türkiyənin mövqeyindən asılıdır. Türkiyə regionda əmin-amanlığın, sülhün və işbirliyinin qarantıdır. Qardaş ölkənin güclü sənaye potensialı, güclü iqtisadiyyatı, o cümlədən hərbi gücü türk dünyasına mənsub olan hər bir insanı sevindirir. Təbii ki, Azərbaycan dost ölkənin nailiyyətlərinə öz uğurları kimi sevinir. İkinci Qarabağ müharibəsi zamanı da Türkiyə Azərbaycanın yanında idi. Bu, siyasi və mənəvi dəstək Azərbaycana yetərli oldu və 30 il ərzində danışıqlar vasitəsilə həll edə bilmədiyimiz tarixi məsələmizi savaş meydanında cəmi 44 gün ərzində həll etdik.
Deputat söyləyib ki, iki dost, qardaş ölkənin birgə siyasi iradəsi əsasında reallığa çevrilən enerji layihələri dünya ölkələrini, xalqlarını birləşdirir, yeni əməkdaşlıq formatlarının yaradılmasına stimul verir. Ölkəmiz Cənubi Qafqazın ən böyük enerji ixracatçısı kimi Türkiyə ərazisindən Avropa bazarına enerji tədarükündə mühüm mövqeyə malikdir. Xüsusilə Bakı-Tbilisi-Ceyhan (BTC) neft kəməri və Bakı-Tbilisi-Ərzurum qaz kəməri kimi layihələr iki ölkə arasında enerji sahəsində əməkdaşlığın təməl sütunlarına çevrildi. Bu layihələr təkcə iqtisadi baxımdan deyil, həm də regional siyasi sabitlik və enerji təhlükəsizliyi üçün strateji əhəmiyyət kəsb edir. 2020-ci ildən tam fəaliyyətə başlayan Trans-Anadolu Qaz Boru Kəməri (TANAP) isə Azərbaycanın təbii qazını Türkiyə vasitəsilə Avropaya çatdırmaqla Cənubi Qafqazı Avropa enerji bazarına birləşdirən əsas dəhlizə çevrilib. TANAP yalnız iqtisadi tərəfdaşlığı gücləndirməklə kifayətlənmir, həm də Avropanın enerji təhlükəsizliyi siyasətində Azərbaycanın və Türkiyənin rolunu əhəmiyyətli dərəcədə artırır. Bu tərəfdaşlığın daha bir nümunəsi isə İğdır-Naxçıvan qaz kəməri layihəsidir. Uzun illər Ermənistanın blokadada saxladığı Naxçıvan Muxtar Respublikası üçün bu kəmər həyati əhəmiyyət daşıyır. Azərbaycan və Türkiyə prezidentlərinin uzaqgörən siyasəti nəticəsində ərsəyə gələn bu layihə Naxçıvanın enerji təminatında yeni mərhələ açıb.
Deputat qeyd edib ki, Azərbaycan və Türkiyə şad günlərdə də, dar günlərdə də bir-birinin yanında olub. 2023-cü il fevralın 6-da Türkiyənin Kahramanmaraş şəhərində baş vermiş dəhşətli zəlzələ qardaş ölkə üçün növbəti sınaq oldu. Bu fəlakət Azərbaycanı da dərindən sarsıtdı. Xalqımız həmin ağır günlərdə qardaş Türkiyə xalqı ilə birgə faciənin ağrı-acısını bölüşdü, sonsuz kədərini birlikdə yaşadı. Bu dəhşətli zəlzələnin ilk dəqiqələrindən Azərbaycan xalqı və dövləti öz qardaşlıq borcunu yerinə yetirmək üçün bütün imkanlarını səfərbər etdi. Rəsmi Ankara qardaş dəstəyini yüksək dəyərləndirdi. Zəlzələnin bütün mənfi təsirlərinə, çətinliklərə baxmayaraq, Türkiyə bu problemin də öhdəsindən gəldi. Kahramanmaraşda yenidənqurma işləri başlandı. Azərbaycan dağıdıcı zəlzələnin nəticələrinin aradan qaldırılmasında da fəal iştirak etdi. Prezident İlham Əliyevin xüsusi tapşırığı ilə Azərbaycanın qardaş ölkəyə uzunmüddətli dəstəyi üçün Kahramanmaraşda "Azərbaycan məhəlləsi"nin inşasına start verildi. İyunun 19-da isə bu möhtəşəm layihənin açılış mərasimi keçirildi. İki qardaş prezidentin - cənab İlham Əliyev və cənab Rəcəb Tayyib Ərdoğanın iştirakı ilə keçirilən mərasimdə böyük sevinc və qürur hissləri yaşandı: "İyunun 19-da Kahramanmaraşda ucaldılan Azərbaycan-Türkiyə dostluq abidəsi bu sarsılmaz qardaşlığın rəmzinə çevriləcək. Bu layihə təkcə bir tikinti layihəsi deyil, eyni zamanda Azərbaycan və Türkiyə qardaşlığının, ağır günlərdə bir-birinə dayaq olmağın, dostluq və həmrəyliyin əyani nümunəsidir. Azərbaycan-Türkiyə qardaşlığının əyani nümunəsi olan "Azərbaycan" məhəlləsi artıq ilk sakinlərini qəbul etdi. Azərbaycan və Türkiyə bu gün regionda və beynəlxalq müstəvidə bir-birinin ən etibarlı tərəfdaşı kimi çıxış edir. Gələcəkdə də bu strateji müttəfiqliyin daha da güclənəcəyini, ölkələrimizin türk dünyasının və regionun rifahı, sabitliyi və inkişafı naminə mühüm layihələrə imza atacaqlarını əminliklə söyləyə bilərik".
Ə.QARDAŞXANOVA,
"Azərbaycan"
