Ermənistanın artan müdafiə xərcləri, Hindistan da daxil olmaqla müxtəlif ölkələrdən aktiv silah alması və nəhayət, ABŞ-la müdafiə və təhlükəsizliyə xüsusi diqqət yetirməklə “Strateji Tərəfdaşlıq haqqında Xartiya”nın imzalanması regional təhlükəsizlik üçün artan narahatlıq doğurur.
AZƏRTAC xəbər verir ki, bu fikri Ankarada yerləşən Avrasiya Araşdırmaları Mərkəzinin (AVİM) analitiki Selenay Erva Yalçın ifadə edib.
Onun sözlərinə görə, hazırda İrəvan fəal şəkildə təhlükəsizlik sahəsində Moskvaya “alternativ” axtarır və bu məqsədlə həm din kartından, həm də siyasi və hərbi kanallardan istifadə edir.
Ekspert yanvarın 14-də Vaşinqtonda imzalanmış ABŞ ilə Ermənistan arasında strateji tərəfdaşlıq haqqında sənədin mətninə diqqət çəkib. “Sənədin İrəvan üçün zəif cəhəti ABŞ-ın hərbi dəstəyi, o cümlədən Amerika silahlarının satışı ilə bağlı bəndin olmaması idi”, - deyən türkiyəli ekspert qeyd edib ki, Ermənistanın xarici işlər naziri Ararat Mirzoyan tələm-tələsik ABŞ-ın regionda sülhün təmin edilməsində rolunun “İrəvan üçün vacib olduğunu” bəyan edib. Halbuki, elə həmin İrəvanda Moskvanın vasitəçilik təkliflərinə cavab olaraq daim “danışıqlar prosesində üçüncü tərəflərin iştirakını istəmədiklərini” bildirirlər.
Ekspert, həmçinin Vaşinqtonun Ermənistan Konstitusiyasının hazırkı variantının dəyişdirilməsi tələblərinə, Əsas Qanunun mətnindən qonşu ölkələrə qarşı ərazi iddialarını özündə əks etdirən Müstəqillik Bəyannaməsinə istinadın çıxarılmasına qərəzli münasibətini diqqətə çatdırıb. “Təsadüfi deyil ki, Ermənistan Konstitusiyasının dəyişdirilməsi məsələsində ABŞ nümayəndələri yalnız ədalət və demokratiyanın vacibliyindən danışırlar”, - deyə AVİM analitiki qeyd edib.
Onun fikrincə, Ermənistanın Rusiyadan uzaqlaşmasının digər göstəricisi İrəvanın nüvə enerjisi sahəsində Moskva ilə deyil, Qərblə əməkdaşlığı inkişaf etdirmək istəyidir.
AVİM ekspertinin sözlərinə görə, Qərblə yaxınlaşma tendensiyası Ermənistanın Avropa İttifaqına daxil olması prosesinin başlanması ilə bağlı qanun layihəsi kontekstində də özünü göstərib.
“Eyni zamanda, aydın şəkildə dərk etmək lazımdır ki, Qərbin Cənubi Qafqazla bağlı planları uzunmüddətli sülh və sabitliyə töhfə verməkdən uzaqdır. O cümlədən, Ermənistan-Azərbaycan münasibətləri məsələsində Qərb dövlətlərinin ermənipərəst mövqeyi tamamilə aydındır. “Xarici agentlərin qeydiyyatı haqqında” qanun layihəsi ilə bağlı ABŞ-ın Gürcüstana təzyiqi də Qərbin regional proseslərə yanaşmasının konstruktivliyi ilə bağlı nikbinlik yaratmır”, - deyə ekspert bildirib.
Analitik vurğulayıb ki, Qərb dövlətləri nümayəndələrinin Cənubi Qafqazla bağlı birtərəfli və qərəzli bəyanatları onların regionda sabitliyə töhfə verməyə hazır olduğuna dair vədlərinin səmimiliyini şübhə altına alır.
jpg_1790976482.jpg)
