Lerikdə keçirilən müşavirədə rayon icra hakimiyyətinin başçısı Əkbər Abbasov çıxış edərək YAP-ın VIII Qurultayında Prezident İlham Əliyevin nitqində müəyyənləşdirilən prioritetlər və qarşıya qoyulan vəzifələrdən danışıb.
Bildirib ki, dövlət başçısının müəyyən etdiyi strateji hədəflərin reallaşdırılması, dövlətçilik ənənələrinin daha da möhkəmləndirilməsi, milli həmrəyliyin qorunması və ölkəmizin davamlı inkişafının təmin olunması istiqamətində qarşıya qoyulan vəzifələrin icrası dövlət orqanlarının, müvafiq qurumların və ictimaiyyət nümayəndələrinin üzərinə mühüm məsuliyyət qoyur.
Daha sonra müşavirədə rayon Ağsaqqallar Şurasının sədri Elxan Qənbərov, Təhsil sektorunun müdiri Ülviyyə Əliyeva, Gənclər və İdman sektorunun müdiri Natiq İsaqov, şəhid atası Mükafat Yaqubov və I qrup Qarabağ müharibəsi əlili Veysəl Məlikov çıxış edərək qurultayda səsləndirilən fikirlərin əhəmiyyətindən, müəyyən edilmiş vəzifələrin yerinə yetirilməsində ictimai həmrəyliyin, vətəndaş məsuliyyətinin və birgə fəaliyyətin vacibliyindən danışıblar.
***
Yardımlıda keçirilən müşavirədə rayon icra hakimiyyəti başçısının birinci müavini Azər Xamiyev, YAP rayon təşkilatının sədri Anar Alışov, hüquq-mühafizə orqanlarının, idarə, müəssisə, təşkilatların rəhbərləri, ümumtəhsil məktəblərinin direktorları və ictimaiyyət nümayəndələri iştirak ediblər.
Müşavirəni giriş sözü ilə açan Azər Xamiyev Prezident İlham Əliyevin YAP-ın VIII Qurultayındakı nitqinin tarixi əhəmiyyətindən danışıb. Qeyd edib ki, Ulu Öndər Heydər Əliyevin müəyyən etdiyi dövlətçilik strategiyasının Prezident İlham Əliyev tərəfindən uğurla davam etdirilməsi Azərbaycanın siyasi, iqtisadi və sosial sahələrdə əldə etdiyi nailiyyətlərin əsasını təşkil edir. Ölkəmizdə təmin olunmuş sabitlik, milli birlik və həmrəyliyin qarşıya qoyulan strateji hədəflərin reallaşdırılması üçün möhkəm zəmin yaratdığını deyən natiq vurğulayıb ki, dövlət başçısının qurultaydakı nitqindən irəli gələn vəzifələrin yerinə yetirilməsi, dövlət siyasətinin ardıcıl həyata keçirilməsi, vətəndaş məmnunluğunun təmin olunması və sosial-iqtisadi inkişafın sürətləndirilməsi mühüm əhəmiyyət daşıyır.
Çıxış edən rayon Ağsaqqallar Şurasının sədri Etibar Əməşov isə vurğulayıb: "Ağsaqqallarımız hər zaman dövlətçilik ideyalarına, Ulu Öndər Heydər Əliyev irsinə sadiq qalıblar. Bu gün Yeni Azərbaycan Partiyasının ətrafında sıx birləşən cəmiyyətimiz Prezident İlham Əliyevin rəhbərliyi ilə böyük tarixi qələbələrə imza atır. Partiyanın VIII Qurultayı xalqımızın həmrəyliyinin və gələcəyə olan böyük inamının daha bir təzahürüdür".
Şəhid ataları Ədalət Qarayev və Vaqif Zeynalov çıxışlarında şəhid ailələrinə göstərilən qayğını yüksək qiymətləndiriblər: "Şəhid ailələrinə, qazilərə və müharibə veteranlarına göstərilən diqqət dövlətimizin və Yeni Azərbaycan Partiyasının fəaliyyətinin mərkəzində dayanır. Biz şəhid valideynləri olaraq Müzəffər Ali Baş Komandanımızla, şanlı ordumuzla və dövlətimizlə qürur duyuruq".
Əməkdar müəllim Heybət Qədirov isə nitqində ziyalıların rolunu ifadə edib: "Yeni Azərbaycan Partiyasının sıralarında olmaq hər bir ziyalı üçün şərəfdir. Partiyanın keçdiyi zəngin yol ölkəmizin mədəni, elmi və ictimai tərəqqisinə təkan verən ən mühüm amillərdən biridir".
Seyran CAVADOV,
“Azərbaycan”
jpeg_1792665417.jpeg)
