Öz xalqına xidmət edib əbədiyaşarlıq ömrü qazanan müdrik insanlar illər, əsrlər keçsə də, unudulmurlar. Onların xatirəsi həmişə hörmətlə yad edilir... Görkəmli ictimai-siyasi və dövlət xadimi Nəriman Nərimanov da adını tarixin yaddaşına yazan böyük səxsiyyətlərdəndir. Vəfatından, eləcə də yeganə övladı Nəcəfə ünvanladığı "Bitməmiş məktub"u yazmasından bir əsr ötür...
Nəriman Nərimanovun anım günündə xatirə muzeyində keçirilən tədbir də belə adlanırdı - "Bitməmiş məktub və nakam ömür"...
N.Nərimanovun həyatı mənalı və keşməkeşli olub. Savad, bilik əldə etmək arzusundan doğan təhsil illərindən maarif və mədəniyyətin tərəqqisi uğrunda mübarizəyə, müstəqil fəaliyyət göstərə bilmək üçün həkimlik sənətinə yiyələnmək cəhdindən, siyasi mübarizəyə aparan yolun hər addımı anbaan kamilliyə doğru can atmanın bariz nümunəsidir. Elə bu səbəbdən də Nəriman Nərimanovun Bakıda fəaliyyət göstərən xatirə muzeyi tarixi şəxsiyyətin doğum və anım günlərində onun şəxsiyyətinə və zəngin irsinə dəyər verən insanların görüş yerinə çevrilib.
Tədbirdə Azərbaycan Respublikası Prezidenti yanında DİA-nın professoru, tarix üzrə elmlər doktoru Həvva Məmmədova, AMEA-nın Fəlsəfə, Sosiologiya və Hüquq İnstitutunun şöbə müdiri, fəlsəfə elmləri doktoru Arzu Hacıyeva, Azərbaycan Respublikası Prezidenti yanında DİA-nın Tarix kafedrasının müdiri, Əməkdar müəllim, tarix üzrə fəlsəfə doktoru Firdovsiyyə Əhmədova, akademiyanın dosenti, tarix üzrə fəlsəfə doktoru Rəna Bayramova, N.Nərimanov irsinin tədqiqatçısı, professor Teymur Əhmədovun oğlu Füzuli Əhmədov, Azərbaycan Milli Tarix Muzeyinin Beynəlxalq əlaqələrlə iş şöbəsinin müdiri Zümrüd İsmayılova, eyni zamanda həmin muzeyin baş fond mühafizi Afət Kərimova, Əməkdar mədəniyyət işçisi Nailə Rəhimova, A.Şaiqin mənzil-muzeyinin müdiri Ülkər Talıbzadə, KİV nümayəndələri, tələbələr və digər qonaqlar iştirak edirdilər.
Giriş sözü ilə tədbiri açan xatirə muzeyinin direktoru Ləman Hüseynova qonaqları salamlayaraq sözü tarix üzrə fəlsəfə doktoru Firdovsiyyə Əhmədovaya verdi. O, öz çıxışında N.Nərimanovun ömrünün mühüm hissəsinin qəlbən inandığı və həyatının başlıca vəzifəsi sayaraq müqəddəs amala çevirdiyi xalq işi uğrunda ardıcıl mübarizələrdə keçməsindən, milli maraqları daim üstün tutan rəhbər kimi taleyüklü problemlərə münasibətindən xalqımızın mənafeyini ömrünün son anınadək müdafiə etməsindən bəhs etdi.
Tədbirdə ilk dəfə olaraq qonaqlara N.Nərimanovun oğlu Nəcəfə və onun simasında gələcək nəsillərə xitabən yazılmış "Bitməmiş məktub" - əlyazmasının əsli təqdim edildi. Həmin həyəcanlı dəqiqələrdə dahi mütəfəkkirin qələmi ilə yazılmış, zaman keçdikcə saralıb solmuş əlyazmanın məzmunu 189-190 nömrəli orta məktəbin 9-cu sinif şagirdi Ləman Hacıyevanın ifasında səsləndi.
Dahi mütəfəkkirin və oğlu Nəcəfin həyatının mühüm mərhələsini özündə əks etdirən videoçarxı tədbir iştirakçıları maraqla seyr etdilər.
Çıxış edənlər tədbirin tariximizi öyrənmək, şəxsiyyətlərimizin miras qoyub getdikləri zəngin irsdən düzgün faydalanmağın əhəmiyyətindən danışdılar.
Tədbirdə muzeyin fonduna yeni daxil olan tədqiqat əsərləri, kitab, qəzet, jurnallar və N.Nərimanovun müxtəlif illərdə çəkilmiş portretlərindən ibarət sərgi nümayiş etdirildi.
Elşən QƏNİYEV,
"Azərbaycan"
