Kiyevlə Moskva arasında növbəti danışıqlar Vatikanda keçirilə bilər
Xəbər verildiyi kimi, bazar ertəsi axşam Rusiya və ABŞ liderləri Vladimir Putin və Donald Tramp arasında telefon danışığı olub. Söhbət iki saatdan çox davam edib.
Britaniyanın "Financial Times" nəşri xəbər verir ki, Donald Tramp Vladimir Putinlə söhbətin təfərrüatlarını onlarla bölüşəndə Avropa liderləri təəccübləniblər. Tramp bildirib ki, Putinlə zəngdən dərhal sonra söhbətin mahiyyətini Böyük Britaniya, Fransa, Almaniya, İtaliya, Finlandiya və Avropa Komissiyası liderləri ilə birlikdə Ukrayna Prezidenti Volodimir Zelenskiyə çatdırıb. Söhbətlə tanış olan mənbə bildirib ki, liderlər Trampın onlara dediklərindən məəttəl qalıblar. "The Economist" narazılıq edib ki, Tramp Putinlə kifayət qədər sərt davranmır. "The Guardian" qəzeti isə qeyd edir ki, Putin hazırda güclü mövqedədir: "Putin güvən və laqeydlik nümayiş etdirərək bazar ertəsi Soçidə musiqi məktəbinə səfəri zamanı Trampa zəng edib. Onun cəsarətinə Rusiyanın döyüş meydanında ləng, lakin davamlı üstünlüyü və buna Avropanın dağınıq reaksiyası, eləcə də uzun sürən silahlı münaqişəyə getdikcə daha çox uyğunlaşan daxili iqtisadiyyat səbəb olub".
Bloomberg agentliyi, həmçinin Avropa liderlərinin yarımçıq ümidlərindən danışır: "11 gün əvvəl Avropa liderlərini Prezident Donald Trampın Ukraynada 30 günlük atəşkəs çağırışı və Rusiyaya qarşı yeni sanksiyalarla hədələməsi sevindirib. Bazar ertəsi Vladimir Putinlə telefon danışığı bu ümidlərin puç olduğunu göstərib". Qərb mediası onu da qeyd edir ki, ABŞ danışıqlar prosesindən çıxa bilər: "Putinlə iki saatlıq söhbətdən sonra Tramp sosial mediada deyib ki, Ukrayna və Rusiya atəşkəslə bağlı dərhal danışıqlara başlayacaqlar. Lakin güman ki, ABŞ-nin iştirakı olmadan... Nə sanksiya təhdidi, nə vaxt qrafiki tələbi, nə də Rusiya liderinə təzyiq olub".
Öz növbəsində, "Washington Post" qəzeti münaqişə tərəflərini danışıqlara çağırdığı üçün Trampı tərifləyir və görüşün Vatikanda keçirilə biləcəyini qeyd edir: "Qoy proses başlasın!", - deyə Prezident Donald Tramp bazar ertəsi Prezident Vladimir Putinlə telefon danışığından sonra Rusiya və Ukrayna arasında münaqişəyə son qoymaq üçün danışıqların başlandığını bəyan edib. Papa XIV Leo danışıqları Vatikanda keçirməyə hazırdır".
"The New York Times" nəşri isə Trampın Rusiyaya qarşı hədələrindən əl çəkdiyinə diqqət çəkir: "Prezident Tramp bazar ertəsi Rusiyanın Ukraynada dərhal atəşkəs elan etməsi tələbindən geri çəkilərək Prezident Vladimir Putinin Kiyev və Moskva arasında danışıqlara çağırışını dəstəkləyib. Beləliklə, Tramp Rusiyaya təzyiqləri artırmaqla bağlı son hədələrindən geri çəkilib - məsələn, apreldə o, yeni sanksiyalar perspektivi haqqında danışmışdı". Qəzet yazır ki, yeni sanksiyalar gözlənilmir, əksinə, Rusiya ilə ticarət əlaqələrinin bərpasından danışılır: "Prezidentin bəyanatında Rusiyanın ABŞ ilə irimiqyaslı iqtisadi fəaliyyəti bərpa etmək istədiyi vurğulanıb və Trampın əvvəllər Kremlə tətbiq etməyi düşündüyü sanksiyalar barədə heç nə deyilməyb. Tramp bildirib: "Rusiya bu qırğın bitdikdən sonra ABŞ ilə genişmiqyaslı ticarət etmək istəyir və mən bununla razıyam".
Bu arada Putin Trampla söhbətini dəyərləndirib. Rusiya Prezidentinin sözlərinə görə, Amerika lideri ilə dialoq faydalı olub. Məsələn, o qeyd edib ki, amerikalı həmkarı Rusiyanın da Ukraynada baş verənlərin sülh yolu ilə nizamlanmasının tərəfdarı olduğunu anlayır. Bundan əlavə, tərəflər Ukrayna ilə mümkün sülh müqaviləsi üzrə memorandum üzərində işə başlamaq barədə razılığa gəliblər.
Avropada, məsələn, Almaniyada Putinlə Trampın söhbətinin nəticələri gözlənilən reaksiyalarla qarşılanıb. Almaniya Nazirlər Kabineti bəyan edib ki, Avropa İttifaqı ölkələri Rusiyaya qarşı sanksiya təzyiqlərini artırmağa razılaşıblar.
Rizvan CƏFƏROV,
"Azərbaycan"
jpg_1765544597.jpg)
