Təkcə ilin əvvəlindən ötən 4 ay ərzində ƏƏSMN-in bu sahədəki uğurları 55 beynəlxalq mükafata və sertifikata layiq görülüb
Əhaliyə dövlət xidmətlərinin vətəndaş məmnunluğuna yönəlik yüksək keyfiyyət və şəffaflıq səviyyəsinə çatdırılmasında, xidmətlərin vətəndaşlara əlçatanlığının və onlardan rahat istifadənin, nəticə etibarilə vətəndaş məmnunluğunun təmin edilməsində rəqəmsallaşmanın geniş tətbiqi ən effektiv vasitələrdən biridir.
Son illər əmək, məşğulluq, sosial müdafiə və sosial təminat sahələrində də rəqəmsal xidmətlərin tətbiqinə geniş yol verilir. Aparılan ardıcıl tədbirlər və genişmiqyaslı islahatlar sayəsində Əmək və Əhalinin Sosial Müdafiəsi Nazirliyinin göstərdiyi 159 xidmətdən 145-i və ya 90 faizindən çoxu elektronlaşdırılıb. Bununla yanaşı, 55-dən çox proaktiv xidmət yaradılıb. Təkcə bu ilin 4 ayında nazirliyin fəaliyyət sahələri üzrə elektron sistemlər üzərindən e-sorğu, müraciət və xidmət sayı 135 milyon olub ki, onlardan da 29 milyonunu vətəndaş müraciəti təşkil edib.
2019-cu ildən ölkəmizdə ilk proaktiv xidmət kimi pensiya, müavinət və təqaüdlərin avtomatlaşdırılmış qaydada təyinatı mexanizmi həyata keçirilib. Görülən işlər sayəsində hüququ yaranmış şəxsə özü müraciət etmədikdə və sənəd təqdim olunmadığı halda məmur-vətəndaş təması olmadan pensiya, müavinət və təqaüd təyin edilir, həmçinin elektron qaydada ona bu barədə məlumat verilir. İndiyədək bu qayda ilə artıq 930 minədək şəxsə e-qaydada pensiya, müavinət və təqaüd təyin olunub.
Nazirlik tərəfindən əmək, məşğulluq və sosial müdafiə sahələrində e-xidmətlərin dairəsi getdikcə genişləndirilir və əlavə bir sıra yeni proaktiv xidmətlər qurulur. Hazırda məcburi dövlət sosial sığorta sistemi ilə əlaqəli bir sıra müavinətlərin təyinatı üzrə də proaktiv xidmətlər yaradılır.
Ölkənin sosial reyestri olan e-sosial.az portalı vasitəsilə hər kəs ona dair əmək müqaviləsi, fərdi uçot, pensiya kapitalı, sosial təminat və s. üzrə bütün sosial məlumatlara real vaxt rejimində çıxış və yaranan sosial-əmək hüquqlarının təminatına mütəmadi nəzarət etmək imkanına malikdir. Bununla yanaşı, "e-sosial" portalının mobil tətbiqi də mövcuddur ki, onunla həmçinin əmək müqavilələrini e-qaydada imzalamaq mümkündür. Onu da qeyd edək ki, əmək müqavilələrinin elektron sənəd formasına keçirilməsi əmək qanunvericiliyinə riayət olunması, əmək münasibətlərində şəffaflığın təmin edilməsi və işçilərin hüquqlarının müdafiəsi baxımından mühüm əhəmiyyət kəsb edir.
2022-ci ildən istifadəyə verilən "Əmək və Məşğulluq" altsistemi (ƏMAS) isə bütün işəgötürənlər və işə qəbul olunanlar üçün vahid elektron əmək münasibətləri platforması, həmçinin əmək bazarının bütün iştirakçılarına yeni ciddi dəstək mexanizmi formalaşdırıb. Bu altsistem vasitəsilə əmək müqavilələrinin kağız üzərində deyil, e-qaydada bağlanması, rəqəmsal kadr uçotuna keçilməsi, əmək münasibətləri zamanı kağız üzərində aparılan digər əməliyyatların rəqəmsal müstəviyə keçirilməsi təmin olunub.
Nazirlik tərəfindən son illər geniş elektronlaşma proqramı çərçivəsində bir çox e-arayış xidməti yaradılıb. Bu e-xidmətlər vətəndaşlara iş yeri, əlillik, pensiya, müavinət, təqaüd, maddi yardım, ünvanlı yardım, dövlət tərəfindən mənzil və avtomobillə təmin edilmə, fərdi şəxsi hesab, həmçinin e-qaydada arayış əldə etmələrinə imkan yaradır. Təkcə bu ilin 4 ayı ərzində nazirliyin fəaliyyət sahələri üzrə 150 minə yaxın elektron arayış verilib.
Ölkəmizdə dövlət sosial xidmətlər sisteminin son illər sürətlə rəqəmsallaşdırılması, sosial sahədə modern və çevik idarəetmə və xidmətlərin qurulmasına imkan verən innovativ həllərin geniş tətbiqi artıq beynəlxalq səviyyədə də qabaqcıl təcrübə kimi tanınaraq yüksək qiymətləndirilir. Bu istiqamətdə görülən işlər sayəsində nazirliyin rəqəmsal uğurlarının bir çox beynəlxalq müsabiqədə mükafata layiq görülməsi bunun sübutudur. Təkcə bu ilin 4 ayı ərzində nazirlik və qurumları 55 beynəlxalq mükafat və sertifikatla təltif olunub ki, onların da mühüm hissəsi rəqəmsallaşma sahəsində qabaqcıl təcrübəyə görə verilib.
Rüstəm KAMAL,
"Azərbaycan"
