Siyasi şərhçi: Azərbaycan ədaləti təkbaşına bərpa etməyin mümkün olduğunu sübut edərək beynəlxalq presedent yaratdı  

Azərbaycan mövcud beynəlxalq reallıqlar fonunda ədalətin bərpa edilməsi uğrunda sona qədər mübarizə aparmağın və bunu təkbaşına təmin etməyin mümkünlüyünü nümayiş etdirən nadir nümunə yaradıb.

Bu fikirləri AZƏRTAC-a açıqlamasında siyasi şərhçi Asif Nərimanlı bildirib.

Onun sözlərinə görə, indiyədək dünyada münaqişələrin həlli və müharibələrin dayandırılması, bir qayda olaraq, ya daha güclü üçüncü tərəflərin vasitəçiliyi, ya da beynəlxalq ictimaiyyətin birbaşa dəstəyi ilə baş tutub. Müharibə cinayətləri törətmiş şəxslərin cəzalandırılması da əksər hallarda beynəlxalq mexanizmlər və xüsusi tribunal formatları çərçivəsində mümkün olub.

“Keçmiş Yuqoslaviya münaqişələri zamanı hərbi cinayətkarların bir qisminin ədalət qarşısına çıxarılması yalnız beynəlxalq dəstək hesabına reallaşıb və tarixdə bu qəbildən olan nümunələr kifayət qədərdir. Bu baxımdan tamamilə fərqli və unikal yol seçən Azərbaycan nadir ölkələrdəndir ki, öz torpaqlarını heç bir kənar hərbi yardım almadan, yalnız öz gücünə arxalanaraq azad etdi, münaqişəyə son qoydu və həm Birinci, həm də İkinci Qarabağ müharibələrində xalqımıza qarşı hərbi cinayətlər törətməkdə günahlandırılan şəxsləri ədalət qarşısına çıxardı”, - deyə o bildirib.

Siyasi şərhçi qeyd edib ki, bu nəticələrin əldə olunmasında Prezident İlham Əliyevin qətiyyətli və ardıcıl siyasəti həlledici rol oynayıb. Dövlət başçısı hələ müharibədən əvvəl torpaqlarımızın azad ediləcəyini, Azərbaycanın dövlət bayrağının Qarabağda ucaldılacağını və xalqımıza qarşı cinayətlər törətmiş şəxslərin layiqli cəzalarını alacaqlarını açıq şəkildə bəyan etmişdi. Prezident İlham Əliyev verdiyi bütün vədləri həyata keçirdi: “44 günlük Vətən müharibəsində torpaqlarımız işğaldan azad olundu, sonrakı mərhələdə ölkənin tam suverenliyi bərpa edildi və nəhayət, xalqımıza qarşı hərbi cinayətlər törətmiş şəxslər ədalət məhkəməsi qarşısına çıxarıldı. Açıq və ədalətli məhkəmə proseslərinin nəticəsində bu şəxslər layiqli cəzalarını aldılar”.

Siyasi şərhçinin fikrincə, bu proses ədalətin bərqərar olması ilə yanaşı, beynəlxalq müstəvidə mühüm presedent yaradıb. “Azərbaycan sübut etdi ki, beynəlxalq ictimaiyyət tərəfindən yerinə yetirilməyən beynəlxalq hüquq normalarını icra etmək, hərbi cinayətkarları məsuliyyətə cəlb etmək mümkündür. Əgər beynəlxalq məhkəmələr bunu edə bilmirsə və ya etmək istəmirsə, milli məhkəmələr də ədaləti təmin edə bilər”, – deyə Asif Nərimanlı vurğulayıb.

Sonda o əlavə edib ki, hazırda münaqişə vəziyyətində olan, ərazi bütövlüyü pozulmuş ölkələr, eləcə də gələcəkdə bu kimi hallarla üzləşə biləcək dövlətlər Azərbaycanın yaratdığı bu presedentə istinad edəcək və ən azı bu modelə nail olmağa çalışacaq.