Liseydə 40-a yaxın gənc müxtəlif sahələr üzrə ixtisaslara yiyələnir
Əvvəllər Salyanda iki peşə təhsili məktəbi fəaliyyət göstərirdi. 104 №-li texniki məktəb onlardan biri idi. Həmin təhsil ocağı keçən əsrin 50-ci illərində açılmışdı.
Burada Salyan, Neftçala, Sabirabad, Biləsuvar və respublikanın digər rayonlarından olan gənclər təhsil alır, müxtəlif peşələrə yiyələnirdilər. Onların arasından adlı-sanlı kənd təsərrüfatı işçiləri, mexanizatorlar, sürücülər, ekskavatorçular, buldozerçilər, maşinistlər, elektriklər çıxmışdır.
Yaşlı nəslin nümayəndələrinin yaxşı yadındadır - həmin təhsil və peşə ocağında təhsil alanlara xüsusi geyimlər, yataqxana, pulsuz yemək, təqaüd verilirdi. O zamanlar SSRİ-nin müharibədən təzəcə çıxmasına baxmayaraq, həmin məktəblər ən yaxşı texnikalar və avadanlıqlarla təchiz edilmişdi. Həmin maşın və mexanizmlər köhnəlmiş olsa da, bu gün də qalmaqdadır.
1974-cü ildə Salyanda daha bir texniki peşə məktəbi - 76 saylı məktəb fəaliyyətə başladı. Burada da çoxlu sayda oğlan və qızlar müxtəlif peşələrə yiyələnirdilər. Sovetlər Birliyinin süqutundan bir neçə il sonra, daha dəqiq desək, 1996-cı ildə həmin məktəblər birləşdirilərək Salyan Peşə Liseyi yaradıldı. Təhsil ocağı hazırda keçmiş 76 saylı texniki peşə məktəbinin binasında yerləşir.
Vətən Müharibəsi Qəhrəmanı şəhid Sübhan Cəbrayılovun adını daşıyan liseydə bu gün 338 gənc təhsil alır və onların təlim-tərbiyəsi ilə 40-a yaxın müəllim-usta kollektivi məşğuldur. Liseydə 9 peşə - "Geniş profilli traktorçu-maşinist, təmirçi-çilingər, avtomobil sürücüsü", "Elektrik avadanlıqlarına xidmət və onların təmiri üzrə elekrtik montyoru", "Əməliyyatçı-mühasib", "Aqroservis mütəxəssisi", "Mebel ustası", "Əl elektrik qaynaqçısı", "Kompüter operatoru", "Heyvandarlıq mütəxəssisi", "Dərzi" ixtisasları üzrə 18 qrup fəaliyyət göstərir. Kurslar ixtisasdan asılı olaraq 6 aydan 3 ilə kimi zaman kəsiyini əhatə edir. Liseyin 63 hektar təlim-təcrübə sahəsi də var. Həmin sahə Çuxanlı kəndində yerləşir. Tələbələrin 55 nəfəri ödənişli, qalanları isə dövlət hesabına təhsil alırlar. Yaxşı oxuyanlara hər ay 80, qalan tələbələrə 66 manat təqaüd verilir.
"Bu günün şagirdi, tələbəsi sabahın ustasıdır" deyiblər. Çox çəkməyəcək, liseydə müxtəlif peşələrə yiyələnən gənc oğlan və qızlar əmək fəaliyyətinə başlayacaq, istehsalatın müxtəlif sahələrində çalışıb, nəyə qadir olduqlarını göstərəcəklər. Uğurlar olsun!
Seyran CAVADOV,
"Azərbaycan"
jpg_1766066117.jpg)
