Bu, dövlət başçısının insan həyatına verdiyi yüksək dəyərdir
Azərbaycan Prezidenti növbəti amnistiyanın elan edilməsi təşəbbüsü ilə çıxış edib. Bir neçə gündür Azərbaycanı şəhərbəşəhər, kəndbəkənd, evbəev dolanan bu şad xəbər on minlərlə ailəyə amnistiya tətbiq ediləcək məhkumların yaxınlarına, dost və tanışlarına sevinc bəxş edib.
Dövlət başçısının bu il mayın 25-də imzaladığı "Məhkumların şəxsiyyətini, səhhətini, ailə vəziyyətini, törətdikləri cinayətlərin xarakterini və ictimai təhlükəlilik dərəcəsini, cəza çəkdikləri müddəti və həmin müddətdə davranışlarını nəzərə alaraq, humanizm prinsiplərinə əsaslanaraq, qəbul edilmiş "Məhkum edilmiş bir sıra şəxslərin əfv olunması haqqında" sərəncam ölkə ictimaiyyəti tərəfindən məmnunluqla qarşılanıb.
Əsası Ulu Öndər Heydər Əliyev tərəfindən qoyulmuş bağışlamaq, əfv etmək, hansısa səhvi və ya günahı üzündən əzizlərindən ayrı düşmüş insanların ailəsinə qovuşmasını təmin etmək xalqımızın milli ruhundan gələn rellıqdır.
Azərbaycan dövlət müstəqilliyini bərpa etdikdən sonra ötən 34 il ərzində ölkədə 12 dəfə amnistiya aktı qəbul edilib. Qürurverici haldır ki, ölkəmizdə indiyədək 70-ə yaxın əfv sərəncamı həyata keçirilib ki, bunların da əksəriyyəti məhz Prezident İlham Əliyevin hakimiyyəti dövrünə təsadüf edir.
"Konstitusiya və Suverenlik İli"nin uğurlarla başa çatacağı ərəfədə reallaşacaq bu amnistiya aktının 20 mindən çox məhkuma şamil olunacağı gözlənilir. Bu aktın icrası zamanı 5 min nəfərdən çox insan azadlıqdan məhrumetmə cəzasından qurtulacaq, habelə azadlıqdan məhrum edilmiş daha 3 min nəfərin cəzası azaldılacaq. Üstəlik, 7 mindən çox məhkumun azadlığın məhdudlaşdırılması cəzasından, 4 minə yaxın məhkumun azadlıqdan məhrumetmə ilə bağlı olmayan digər cəzalardan və ya şərti tətbiq edilmiş cəzalardan, eləcə də mindən çox şəxsin cinayət məsuliyyətindən azad ediləcəyi bildirilir. Bundan başqa, dövlət başçısının növbəti humanist təşəbbüsü ilə "böyük ictimai təhlükə törətməyən və ya az ağır cinayət, habelə ehtiyatsızlıqdan cinayət törətdiklərinə görə azadlıqdan məhrumetmə cəzasına məhkum olunmuş bir sıra şəxslər cəzadan azad ediləcək və ya cəzalarının çəkilməmiş hissəsi azaldılacaq.
Ulu Öndər xatırladırdı ki, hər bir insanın özünəməxsus, çoxsaylı arzuları ola bilər. Həbsxanada olanların isə ən ümdə arzusu məhz azadlığa çıxmaq, əzizlərinə qovuşmaqdır. Prezident İlham Əliyev də bu məsələdə böyük həssaslıq nümayiş etdirir. Dövlət başçımız dönə-dönə xatırladıb ki, bizim siyasətimizin təməlində insan amili dayanır.
"Konstitusiya və Suverenlik İli" münasibətilə Prezident İlham Əliyevin amnistiya elan edilməsi təşəbbüsü ilə çıxış etməsinin təməlində ilk növbədə insan amilinə yüksək dəyər verməsi dayanır. Məhz bu dəyərin nəticəsidir ki, xalqımız bu il on minlərlə məhkuma şamil ediləcək humanizmin sevincini yaşayır.
Hər zaman nəcib, humanist təşəbbüsləri ilə ali insani dəyərlərə yüksək qiymət verən Birinci vitse-prezident, Heydər Əliyev Fondunun prezidenti Mehriban xanım Əliyevanın bu istiqamətdəki fəaliyyəti xüsusi qeyd edilməlidir. Mehriban xanım Əliyeva Milli Məclisin deputatı olarkən onun təşəbbüsü ilə 2007-ci, 2009-cu, 2013-cü və 2016-cı illərdə amnistiya aktları qəbul edilib. Bu təşəbbüslər xeyirxahlıq və mərhəmət ideallarının təcəssümünə çevrilib.
Ali Baş Komandanın təşəbbüsü ilə 2021-ci il noyabrın 5-də Milli Məclis tərəfindən "8 Noyabr - Zəfər Günü münasibətilə amnistiya elan edilməsi haqqında" qərar qəbul edilmişdi ki, bu da dövlətin öz siyasətində insan ləyaqətinə hörmətin bariz nümunəsi kimi qəbul edilir. Bu amnistiya aktı 17 min 267 şəxsə şamil olunub. Amnistiyanın tətbiq olunduğu şəxslərdən 733-ü Vətən müharibəsinin iştirakçısı, 837-si qadın, 65-i yetkinlik yaşına çatmayanlardır. Amnistiya qərarı azadlıqdan məhrumetmə yerlərində cəza çəkən 5971 məhkuma tətbiq edilib. Onlardan 2710 məhkum azadlıqdan məhrumetmə cəzasından azad olunub, 3261 məhkumun cəzasının çəkilməmiş müddəti 6 ay azaldılıb. Həmçinin azadlıqdan məhrumetmə ilə əlaqədar olmayan cəzalara məhkum edilmiş 8559 şəxsə amnistiya tətbiq edilib.
Prezident İlham Əliyevin, eləcə də Birinci vitse-prezident, Heydər Əliyev Fondunun prezidenti Mehriban xanım Əliyevanın bu istiqamətli təşəbbüsləri ildən-ilə artır. Həmin təşəbbüslərin - əfv sərəncamı və amnistiya aktlarının icrası zamanı on minlərlə soydaşımız, eləcə də ölkəmizdə həbs edilmiş əcnəbi şəxslər də öz azadlıqlarına qovuşublar.
Tanınmış hüquqşünas, Konstitusiya Araşdırmaları Fondunun rəhbəri Əliməmməd Nuriyev mətbuata açıqlamasında Prezident İlham Əliyevin amnistiya aktının qəbul edilməsi ilə bağlı təşəbbüslə çıxış etməsini alqışladığını bildirərək demişdir: "Bu, olduqca humanist bir addımdır. Ümumiyyətlə, Prezidentin apardığı siyasətin mərkəzində Azərbaycan vətəndaşı dayanır və humanizm, mərhəmət prinsipləri onun əsas istiqamətlərindən biridir".
Özlüyündə ölkə həyatının siyasi, iqtisadi, mədəni, habelə humanizm sahəsindəki uğurları ehtiva edən bu amnistiya aktı ehtimal olunur ki, "Konstitusiya və Suverenlik İli"nin sonlarında - Yeni il və Dünya Azərbaycanlılarının Həmrəylik Günü bayramı ərəfəsində reallaşacaq və xalqımıza ikiqat bayram sevinci bəxş edəcək.
Rəhman SALMANLI,
"Azərbaycan"
