"Global Terrorism Index 2025" sıralamasında ölkəmizin irəlidə olması bunu təsdiqləyən reallıqdır
"Global Terrorism Index 2025" (GTI) sıralamasında Azərbaycanın məhz bir pillə yuxarı qalxaraq yüzlüyə daxil olması mühüm əhəmiyyət kəsb edir".
Bu sözləri "Azərbaycan" qəzetinə Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev deyib. Komitə sədri bildirib ki, Afrika ölkələri Suriya terrorçuluq fəaliyyətinin geniş yayıldığı və terror təhlükəsi olan dövlətlər sırasında yer alıblar. Terror qorxusu daim var və bunu yaradan müvafiq qüvvələr mövcuddur. Bu, istər Avropa, istər Afrika, istərsə də digər regionlarda ciddi məsələ kimi gündəmdə qalır. 11 sentyabr hadisələrinə qədər ABŞ də inanmırdı ki, dini radikalizm terrora qədər inkişaf edə və nəticədə belə hadisələr törədə bilər. Bundan sonra onlar da dərk etdilər ki, bu mübarizədə mütləq şəkildə koordinasiya yaratmaq, məlumat mübadiləsi apararaq birgə hərəkət etmək lazımdır. "Azərbaycana gəldikdə istər Dövlət Təhlükəsizlik Xidməti, istər Daxili İşlər Nazirliyi və digər qurumlar terror təhdidinin qarşısını almaq üçün lazımi işlər görürlər və onlar əməliyyat şəraitinə tam nəzarət edərək bu problemlərin həllində birgə fəaliyyət göstərirlər. Dini radikalizmə qarşı atılan addımların qarşısının necə alındığı məlumdur. Müxtəlif xarici dövlətlərin xüsusi xidmət orqanlarının Azərbaycanda terror təhdidi ilə bağlı çıxışlarının, Ermənistan xüsusi xidmət orqanlarının istər 44 günlük müharibədə, istərsə də sonrakı dövrdə müxtəlif vətəndaşları cəlb etməklə məkrli siyasətlərini həyata keçirməyə çalışmaları - bütün bunların qarşısı alınıb", - deyə A.Nağıyev əlavə edib.
Heç bir dövlətin terrorla tam şəkildə mübarizə aparmaq iqtidarında olmadığını deyən komitə sədri bildirib ki, terrorla mübarizə çətin məsələdir, qarşısını almaq istiqamətində mütləq birgə fəaliyyət göstərmək vacibdir. Son vaxtlar Azərbaycanın hüquq-mühafizə orqanlarının, birbaşa DTX-nin apardığı əməliyyatlar göstərir ki, Ali Baş Komandan İlham Əliyev başda olmaqla, Azərbaycanda bu istiqamətdə çox ciddi addımlar atılır. Dövlət başçısının da qeyd etdiyi kimi, bu gün Azərbaycan sabitlik, təhlükəsizlik adasıdır. Bu gün Azərbaycanda səfərdə ola hər kəs - turistlər, iş adamları bunu təsdiq edə bilər. Bu indeks də elə-belə tərtib olunmayıb. Burada beynəlxalq təşkilatların hesabatları var. Azərbaycanın geosiyasi baxımdan mürəkkəb ərazidə yerləşməsinə baxmayaraq, təhlükəsizlik xidmətləri əmin-amanlığı qoruya, terrorçuluğa qarşı qətiyyətlə mübarizə apara bilirlər.
Komitə sədri vurğulayıb ki, təhlükəsizlik orqanlarının gördüyü hər bir iş nəticə verir: "Bu, çox mühüm məsələdir, Prezident İlham Əliyevin apardığı daxili və xarici siyasətin müstəqilliyidir. Digər dövlətlərin xüsusi xidmət orqanları ilə əlaqələrimizin yüksək səviyyədə qurulmasıdır. Dini, etnik və digər zəmində pozucu planları həyata keçirmək üçün müxtəlif sığınacaqlarda gizlənənlər və digərləri başa düşməlidirlər ki, Azərbaycan dövləti hüquq-mühafizə orqanları, Dövlət Təhlükəsizlik Xidməti vasitəsilə əməliyyat şəraitinə tam nəzarət edir. Mütəmadi olaraq bu cür terror və təxribat əməllərinin qarşısı alınır və alınacaq. Azərbaycanın bu indeksdə irəliləməsi də görülən işlərin təzahürüdür".
Əsmər QARDAŞXANOVA,
"Azərbaycan"
