Rusiyada azərbaycanlılara qarşı etnik ayrı-seçkilik son zamanlar artıb. Soydaşlarımız səbəbsiz yerə təqib olunur. Yekaterinburq şəhərində törədilmiş zorakılıq və işgəncə nəticəsində həmyerlilərimizin amansızlıqla qətlə yetirilməsi və müxtəlif dərəcəli xəsarət alması insan hüquqlarının kobud şəkildə pozulmasıdır.
Mili Məclisin deputatı Nigar Məmmədova qəzetimizə açıqlamasında bildirib ki, Rusiya hüquq-mühafizə orqanlarının soydaşlarımıza qarşı bu qəddar davranışına heç bir halda haqq qazandırıla bilməz: "Bu cür aqressiv və irqçi davranışlar Bakı ilə Moskva arasında münasibətlərə zərbə vurur. Azərbaycanlılara qarşı törədilən zorakılığa görə Rusiya baş nazirinin müavini Aleksey Overçukun bu ay ölkəmizə nəzərdə tutulan səfərinin ləğvi də göstərir ki, Azərbaycan hökuməti yaranmış vəziyyətdə Overçukun və ya digər rəsmi şəxslərin səfərində heç bir əhəmiyyət görmür.
Ümumiyyətlə, Rusiyada bəzi qüvvələr Azərbaycana qarşı yersiz qəzəb və qərəzlərini gizlədə bilmirlər. Biz bunu Rusiya Kütləvi İnformasiya Vasitələrində, bəzi rus ekspertlərin müxtəlif platformalarda ikrah hissi ilə səsləndirdikləri fikirlərdə də zaman-zaman müşahidə edirik. Bəzi aqressiv dairələr azərbaycalıların ölkədən qovulması iddialarını tez-tez gündəmə gətirirlər.
Halbuki dünyanın hər yerində olduğu kimi, Rusiyada yaşayan soydaşlarımız da heç vaxt destruktiv mövqedə olmayıb. Əksinə, yaşadıqları ölkənin qanunlarına, milli-mənəvi dəyərlərinə hörmətlə yanaşıblar. Bəzi etniklər kimi yaşadıqları ölkəyə qarşı ərazi iddiası ilə çıxış etmirlər".
Deputat qeyd edib ki,Azərbaycanda bütün etnik azlıqlar kimi ruslar da dinc şəraitdə yaşayırlar. Onlara qarşı heç bir halda milli-etnik zəmində təzyiq, ayrı-seçkilik yoxdur. Biz eyni tolerant münasibətin öz soydaşlarımıza qarşı da sərgilənməsini istəyirik.
Azərbaycan tərəfi bu qəddar cinayətin hərtərəfli, obyektiv və şəffaf şəkildə araşdırılmasını, təqsirkar şəxslərin məsuliyyətə cəlb olunmasını, eyni zamanda, zərərçəkən ailələrə hüquqi və psixoloji dəstək göstərilməsini gözləyir. N.Məmmədova sonda vurğulayıb ki, məsələyə ədalətli hüquqi qiymət verilməlidir.
Əsmər QARDAŞXANOVA,
"Azərbaycan"
jpeg_1766065291.jpeg)
jpeg_1766054270.jpeg)
