Rusiya Çinə ixrac etdiyi neftin həcmini rekord həddə, sutkada 1,7 milyon barelə çardırıb. Bununla da Rusiya Hindistanın neftayırma zavodlarının neft almaqdan imtinasını kompensasiya edib. Lakin Çin Rusiyanın “Urals” markalı neftini çox ucuz qiymətə alır.
AZƏRTAC xəbər verir ki, Çinin Rusiyadan neft ixracını artırması beynəlxalq birjalarda qiymətlərin düşməsinə səbəb olub.
Beynəlxalq Enerji Agentliyinin məlumatına əsasən, cari ilin yanvar ayında Rusiya Hindistana sutkada 1,1 milyon barel neft ixrac edirdi. Lakin ABŞ-ın Rusiya neftini alacağı təqdirdə Hindistan mallarına əlavə 25 faiz gömrük rüsumu tətbiq edəcəyini bəyan etdikdən sonra bu ölkənin neft şirkətləri ixracı sutkada 100 min barelə endirdilər. Çin əsasən Səudiyyə Ərəbistanı, İraq, Braziliya və Malayziyadan neft alır. Lakin Rusiya neftinin Çinə çatdırılması daha tez və ucuz başa gəlir. Bu gün Rusiya neftinin dünya bazarından sıxışdırılıb çıxarılması üçün Avropa İttifaqı (Aİ) və ABŞ tərəfindən tətbiq olunan sanksiyalar Rusiyanı daha ucuz neft satmağa vadar edib. Hazırda “Urals” markalı neftin 1 barelinin qiyməti 15 dollardan aşağıdır.
Aİ-nin Rusiyaya qarşı tətbiq etdiyi 20-ci paket sanksiyalar siyahısında Gürcüstanın Kulevi limanın adının olması da dünya bazarında neftin qiymətinə təsir edir. Rusiya və Mərkəzi Asiya respublikaları məhz bu liman vasitəsi ilə dünya bazarına neft ixrac edirlər. Limanın rezervuar parkının ümumi tutumu 320 min kubmetr təşkil edir və 380 min kubmetrədək artırılması mümkündür. Rusiya-Ukrayna müharibəsindən əvvəl bu limandan ildə 2 mindən çox tanker dünya bazarına neft nəql edirdi. Gürcüstan Kulevi limanına tətbiq olunan sanksiyanın aradan qaldırılmasını tələb edir.
İsveçrənin “UBS Group AG” maliyyə holdinqinin analitiki Covannı Stoun bildirib ki, hazırda ABŞ, Avropa və Səudiyyə Ərəbistanındakı neft anbarlarında saxlanılan neftin həcmi azalıb. Bununla yanaşı Yaxın Şərqdən neft nəqlində problemlər müşahidə olunmasa da İran ətrafındakı vəziyyət bazarın gərginliyini artırıb ki, bunlar da qiymətlərə təsir göstərir.
Ötən həftə Omanda ABŞ ilə İran arasında keçirilən görüşdən sonar bazarda nisbi sabitlik yarandı. Lakin danışıqlardan 1 gün sonra ABŞ-ın Körfəzə daha 3 hərbi gəmi göndərməsi bazarın gərginliyini artırdı, hətta “Brent” markalı neftin 1 barelinin qiyməti 70 dolları ötdü.
Bu gün Londonun ICE (“InterContinental Exchange Futures”) birjasında “Brent” markalı neftin bir barelinin qiyməti 0,16 dollar azalaraq 67,36 dollar olub. Nyu-Yorkun NYMEX (“New York Mercantile Exchange”) birjasında “Light” markalı neftin bir barelinin qiyməti isə 0,17 dollar azalaraq 62,67 dollar təşkil edib.
“UBS Group AG” analitiki hesab edir ki, qiymət ucuzlaşsa da bazarda gərginlik davam edir.
19 (1)jpg_1771885865.jpg)
