Romada “Sonsuz dəhliz” filminin təqdimatı olub

Heydər Əliyev Fondunun vitse-prezidenti Leyla Əliyevanın təşəbbüsü ilə keçirilən “Xocalıya ədalət” beynəlxalq təbliğat-təşviqat kampaniyası çərçivəsində Romada yerləşən “Grand Hotel Plaza”da “Sonsuz dəhliz” sənədli filminin təqdimatı olub.

Azərbaycanın İtaliyadakı səfirliyinin və Avropa Azərbaycan Cəmiyyətinin (TEAS) birgə təşkilatçılığı ilə keçirilən tədbirdə səfir Vaqif Sadıqov xalqımızın tarixində qanlı iz buraxmış Xocalı soyqırımının 23-cü ildönümü ərəfəsində belə bir tədbirin keçirilməsinin İtaliya ictimaiyyətinə Xocalı həqiqətlərini çatdırmaq baxımından önəmini vurğulayıb. Diqqətə çatdırıb ki, 23 il əvvəl – 1992-ci il fevralın 25-dən 26-na keçən gecə Ermənistan silahlı qüvvələri Xocalı şəhərinə hücum edərək azərbaycanlılara qarşı soyqırımı törədiblər. Şəhər darmadağın edilib və talanıb, dinc əhaliyə amansızlıqla divan tutulub, 613 nəfər qətlə yetirilib. İnsan hüquqlarına dair beynəlxalq “Human Rights Watch” təşkilatı bu faciəni Dağlıq Qarabağ münaqişəsinin ən böyük qətliamı adlandırıb. Bu günədək bir çox ölkələrdə Xocalı faciəsinə hüquqi-siyasi qiymət verilib. Əminik ki, belə ölkələrin sayı daha da artacaq.

Xocalı faciəsinin Ermənistan-Azərbaycan, Dağlıq Qarabağ münaqişəsinin ən qanlı və faciəli səhifəsi olduğunu qeyd edən V.Sadıqov bildirib ki, bu soyqırımı təkcə Azərbaycanın keçmişinə aid deyil. Çünki Azərbaycan xalqı münaqişənin acı nəticələrini bu gün də yaşamaqdadır. Ermənistan Dağlıq Qarabağ və ona bitişik 7 rayon daxil olmaqla, Azərbaycan ərazisinin 20 faizini işğal edərək beynəlxalq hüquq normalarını tamamilə pozub. BMT Təhlükəsizlik Şurası Ermənistan silahlı qüvvələrinin Azərbaycanın işğal olunmuş ərazilərindən dərhal, tamamilə və qeyd-şərtsiz çıxarılmasını tələb edən qətnamələr, eləcə də digər beynəlxalq təşkilatlar münaqişənin həlli ilə bağlı sənədlər qəbul edib. Lakin bu sənədlərə hələ də əməl olunmur.

Səfir qeyd edib ki, Xocalı hadisələrinə bütün dünyada lazımı hüquqi qiymətin verilməsi istiqamətində yorulmadan səylər göstərən “Xocalıya ədalət” kampaniyası çərçivəsində keçirilən tədbirlər təqdirəlayiqdir.

Mərasimdə çıxış edən TEAS-ın direktoru Lionel Zetter "Xocalıya ədalət" beynəlxalq təbliğat-təşviqat kampaniyası ilə əməkdaşlıq etməkdən qürur duyduğunu bildirib. Vurğulayıb ki, 100-dən artıq ölkəni əhatə edən kampaniya 2008-ci ildə elan olunub. Kampaniya Dağlıq Qarabağ regionunda sülhün və ədalətin bərpa olunmasına böyük dəstək göstərir.

L.Zetter diqqətə çatdırıb ki, Xocalı hadisələrini daha dərindən anlamaq üçün bu sənədli film əvəzsiz imkandır: “Filmin qəhrəmanları o dəhşətli gecəni yaşayan real obrazlardır. Bu ekran əsəri beş il müddətində böyük əmək sərf edilərək hazırlanıb”. TEAS-ın direktoru ümidvar olduğunu bildirib ki, film Xocalıya ədalətin bərpa olunmasında önəmli rol oynayacaq.

“Sonsuz dəhliz” filminin layihəsi litvalı jurnalist, 1992-ci ilin fevralında Xocalıda baş vermiş qətliamın ertəsi gün hadisə yerində olan Riçard Lapaitisin xatirələri əsasında ərsəyə gəlib. Filmdə Riçard Lapaitis o vaxtdan bəri unuda bilmədiyi Xocalı faciəsini uzun illər sonra hərbi müxbir kimi ictimaiyyətə çatdırır. O, Xocalı soyqırımından sağ çıxanlarla yenidən görüşür və ermənilərin atəşi altındakı “sonsuz dəhliz”də özünə nicat yolu axtararkən yaxınlarını itirənlərin ürək dağlayan hekayələrini dinləyir. Filmdə əlli qonşusunun həyatını xilas etmiş, lakin həyat yoldaşını itirmiş və aylarla işgəncələrə dözməli olduğu əsirlikdə qalmış bir musiqiçinin təsirli hekayəsi tamaşaçıların diqqətinə çatdırılır.

Filmi seyr edən tədbir iştirakçıları Xocalı hadisələri nümunəsində erməni faşizminin əsl simasını bir daha görüblər.
Sonda Xocalı faciəsi zamanı lentə alınmış şəkillərdən ibarət fotosərgi nümayiş etdirilib.



Maqsud Dadaşov
AzərTAc-ın xüsusi müxbiri
Roma