Üstəgəl, dupduru su və tərtəmiz hava... Bol və keyfiyyətli məhsul  yetişdirmək üçün əsas şərtlərdən olan bunların hamısı Qusarda var. O üzdən rayonda məhsuldarlıq getdikcə yüksəlir, kənd təsərrüfatının  rayonun iqtisadi inkişafında rolu artır.
Təbiətin verdiyi bütün imkanlardan səmərəli şəkildə bəhrələnən  qusarlılar həm yerli   bazarın  ərzaq  məhsulları ilə təmin olunmasına,  həm də ölkənin ərzaq  təhlükəsizliyinə  töhfələrini   davam etdirirlər. Dövlətin  hərtərəfli dəstəyi, eləcə də    yeni  texnika  və texnologiyaların tətbiqi ilə rayonda aqrar sektor ildən-ilə inkişaf edir. Bunun bir səbəbi də rayonda iqtisadi islahatların sürətlənməsi, ümumiyyətlə, kənd təsərrüfatına xüsusi diqqət verilməsidir. Sahənin qarşısında dayanan mühüm məsələlərlə bağlı vaxtaşırı tədbirlərin keçirilməsi bu məqsədə xidmət edir. 
Bu günlər yerli sahibkarların iştirakı ilə daha bir tədbir keçirilmişdir. Tədbir  rayonun Kuzunqışlaq kəndi ərazisində yerləşən iri meyvəçilik təsərrüfatı -   "Soyuzaqrokontrakt" MMC-nin fəaliyyəti ilə tanışlıq məqsədi daşıyırdı. Əslində, fermerlərlə görüş kimi təşkil olunan tədbirdə təsərrüfat haqqında geniş məlumat verilmişdir. Dövlətin göstərdiyi dəstək qeyd olunmuş, həyata keçirilən islahatlar və qarşıda duran vəzifələr haqqında danışılmışdır. 
 Rayon İcra Hakimiyyətinin başçısı Sahir Məmmədxanov meyvə yığımı prosesi, soyuducu anbar və kalibrlənmə xəttinin işi ilə tanış olmuş, məhsuldarlıq, məhsulun satışı və qiymətləri ilə maraqlanmış, təsərrüfat rəhbərləri ilə onları maraqlandıran məsələlər mövzusunda söhbət aparmışdır. "Soyuzaqrokontrakt" MMC-nin ərazisində tikilmiş 21 min  tonluq soyuducu anbara baxış zamanı rayon rəhbərliyinə və qonaqlara tikilinin funksiyası, iş üsulu və texniki göstəriciləri barədə məlumat verilmişdir.
Təşkil olunan  "Dəyirmi masa"  ətrafında isə rayon ərazisində fəaliyyət göstərən iri fermer və sahibkarlarla mövcud çətinliklər, problemlər, həyata keçiriləcək tədbirlər haqqında müzakirələr aparılmışdır.  Görüşə dəvət olunmuş "İSFA" MMC-nin təsisçisi, Qusar və Yevlax rayonlarında intensiv bağ və tingçilik təsərrüfatlarının rəhbəri Samir Xeyirbəyov, heyvandar fermerlər Sabir Fərzəliyev və Fikrət Ağamirzəyev, "Manner Azerbaycan" və "Ata-baba" MMC-nin direktoru Sudabə Orucova, kartofçu fermer Obayat Mirzağayev təsərrüfatları haqqında ətraflı məlumat vermiş, gələcək planları barədə fikirlərini və təkliflərini  bildirmişlər.
Sonda  görüş zamanı  səsləndirilən məsələlərin həlli istiqamətində müvafiq tədbirlərin görüləcəyi,  fermerlərin  və təsərrüfat rəhbərlərinin işində yeni qaydaların tətbiq ediləcəyi vurğulanmışdır.

Akif ƏLİYEV,
"Azərbaycan"