Bakıda “Gənclərin dialoqu: təsirin ön plana çıxarılması” mövzusunda sessiya təşkil olunub
“Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumu çərçivəsində “Gənclərin dialoqu: təsirin ön plana çıxarılması” adlı plenar sessiya keçirilib.
AZƏRTAC xəbər verir ki, tədbir BMT-nin Sivilizasiyalar Alyansı (UNAOC), Azərbaycanın Gənclər və İdman Nazirliyi və Mədəniyyət Nazirliyinin tərəfdaşlığı ilə təşkil olunub.
Sessiyada çıxış edən BMT Baş katibinin müavini, Sivilizasiyalar Alyansının ali nümayəndəsi, BMT-nin İslamofobiya ilə mübarizə üzrə xüsusi elçisi Migel Anxel Moratinos müasir dünyanın üzləşdiyi qlobal çağırışlardan danışıb.
O bildirib ki, iqlim dəyişmələri, müharibələr və süni intellektin inkişafı dövrümüzün əsas çağırışları sırasındadır. Bu problemlərin bir-biri ilə əlaqəli olması onların həllini daha da mürəkkəbləşdirir.
Gənclərə müraciət edən M.A.Moratinos mövcud çağırışların öhdəsindən gəlməkdə gənc nəslin üzərinə böyük məsuliyyət düşdüyünü vurğulayıb: “Çalışın, əzmkar olun və ümidinizi qoruyun. Özünüz, ailəniz, ölkəniz və bütün dünya üçün daha yaxşı gələcək qurmaq naminə bu ümidi yaşatmalısınız”.
Gənclər və idman nazirinin müavini Fərhad Hacıyev qeyd edib ki, gənclər dəyişən dünyaya uyğunlaşmaqla yanaşı, onun gələcək inkişaf istiqamətlərinin müəyyənləşdirilməsində də mühüm rol oynayırlar. Onun sözlərinə görə, müasir texnologiyalar coğrafi maneələri aradan qaldıraraq müxtəlif ölkələrdən olan gənclər arasında ünsiyyət, təcrübə mübadiləsi və əməkdaşlıq üçün geniş imkanlar yaradır. Bu baxımdan beynəlxalq forumlar yeni əlaqələrin qurulması, ideyaların bölüşülməsi və birgə təşəbbüslərin həyata keçirilməsi üçün mühüm platformadır.
Mədəniyyət nazirinin müavini Fərid Cəfərov isə forum çərçivəsində təşkil olunan gənclər düşərgəsinin müxtəlif ölkələrdən olan gənc liderlər arasında əlaqələrin qurulmasına və qarşılıqlı anlaşmanın gücləndirilməsinə xidmət etdiyini bildirib. Diqqətə çatdırıb ki, forumda beş qitəni təmsil edən 44 ölkədən 100-dən çox gənc iştirak edir.
Azərbaycan Respublikası Gənclər Təşkilatları Milli Şurasının (NAYORA) sədri Rafael Hacıbəyli çıxışında ölkəmizdə gənclərin inkişafına və onların təşəbbüslərinin dəstəklənməsinə xüsusi diqqət yetirildiyini vurğulayıb. Qeyd edib ki, gənclər üçün yaradılan imkanlar onların bilik və bacarıqlarının artırılmasına, liderlik potensialının gücləndirilməsinə və beynəlxalq əməkdaşlıq əlaqələrinin genişləndirilməsinə mühüm töhfə verir.
R.Hacıbəyli bildirib ki, hazırda 156 təşkilatı birləşdirən Gənclər Təşkilatları Milli Şurasının əsas məqsədi gənclərin potensialını inkişaf etdirmək, təşəbbüslərini dəstəkləmək və onların ictimai həyatda fəal iştirakını təşviq etməkdir.
Plenar sessiyada Fransa, Hindistan, Keniya və digər ölkələrdən olan gənclər də çıxış edərək mədəniyyətlərarası dialoq sahəsində qazandıqları təcrübələri bölüşüblər. Onlar müxtəlif ölkələrdən olan həmyaşıdları ilə birgə həyata keçirdikləri layihələrdən, bu təşəbbüslərin mədəni müxtəlifliyin təşviqinə və qarşılıqlı anlaşmanın möhkəmləndirilməsinə verdiyi töhfələrdən danışıblar.
Sessiya çərçivəsində, həmçinin gənclərin sülh quruculuğunda rolu, beynəlxalq əməkdaşlığın genişləndirilməsi və cəmiyyətdə müsbət dəyişikliklərin təşviqi istiqamətində fikir mübadiləsi aparılıb.
Qeyd edək ki, tədbirin əsas məqsədi BMT-nin Sivilizasiyalar Alyansının həyata keçirdiyi proqramların gənclərə təsirini nümayiş etdirmək, onların mədəniyyətlərarası dialoqun inkişafında və sülhün möhkəmləndirilməsində rolunu ön plana çıxarmaqdır.
jpeg_1793188453.jpeg)
