Dünya bazarlarında qızılın qiyməti ABŞ Prezidenti Donald Trampın İranla bağlı müharibənin davam edəcəyinə dair açıqlamalarından sonra kəskin eniş göstərib.
AZƏRTAC xəbər verir ki, aprelin 2-si qızılın bir troya unsiyasının qiyməti 180,9 dollar azalaraq 4 632,2 dollar səviyyəsinə düşüb. Qeyd edək ki, qızıl əvvəlki dörd gün ərzində artım tendensiyası nümayiş etdirmişdi.
ABŞ və İsrailin İrana qarşı başlatdığı hərbi əməliyyatların təsiri ilə qızıl əvvəlcə bahalaşsa da, sonrakı mərhələdə bazar dinamikası dəyişib. Bugünkü bahalaşma isə Donald Tramp aprelin 1-də etdiyi çıxışında “İranı çox sərt vuracağıq” bəyanatını səsləndirməsi ilə əlaqələndirilir.
Xatırladaq ki, mart ayının ortalarında qızılın qiyməti təxminən 10 faiz ucuzlaşıb, sonrakı həftələrdə isə aylıq itki 13 faizə çatdıqdan sonra yenidən bahalaşıb.
Həmçinin digər qiymətli metallar da ucuzlaşıb. Gümüşün qiyməti 2,9 faiz azalaraq 70,95 dollara, platinin qiyməti isə 1,8 faiz azalaraq 1928 dollar səviyyəsinə çatıb.
Ekspertlər bildirib ki, qızılın ucuzlaşmasının əsas səbəbi qlobal maliyyə sistemində baş verən dəyişikliklər və ABŞ dollarının möhkəmlənməsidir. Məlumata görə, qızılın “təhlükəsiz liman” funksiyası yeni iqtisadi şəraitdə müəyyən qədər zəifləyib.
Hazırda bazar qiymətləndirmələri daha çox müharibənin nə vaxt başa çatacağı ilə bağlı gözləntilərdən asılıdır. Bildirilir ki, Hörmüz boğazı üzərindən daşımaların faktiki dayanması və körfəz regionunda enerji obyektlərinə edilən hücumlar neft qiymətlərinin artmasına səbəb olub. Bu isə ABŞ-da istehsalçı qiymət indeksinin gözləntilərdən yüksək çıxmasına və ilin sonu üzrə inflyasiya proqnozlarının yüksəlməsinə gətirib çıxarıb.
Ekspertlər qeyd edir ki, bu amillər qızılı investorlar üçün daha az cəlbedici edir. Bazarlarda qeyri-müəyyənlik, aktivlərin ucuzlaşması və dolların möhkəmlənməsi fonunda investorlarda nağd vəsaitə tələbat artır və bu da qızıl satışlarını gücləndirir. Dollar tələbi artdıqca və real faiz dərəcələri yüksəldikcə qızıl investisiya aləti kimi əvvəlki cəlbediciliyini itirir. Həmçinin Hörmüz boğazının bağlı qalması və bunun yaratdığı iqtisadi nəticələr qızılın qiymətinə təzyiq göstərməkdə davam edə bilər. Lakin münaqişənin başa çatması və ya Hörmüz boğazının açılması ilə bağlı əlamətlər qızıl qiymətlərində yenidən artım üçün stimul yarada bilər.
jpg_1775133929.jpg)
jpg_1775133732.jpg)
jpg_1775133271.jpg)
jpg_1775133194.jpg)
