Qazaxıstanın aparıcı media orqanları Azərbaycan Prezidenti İlham Əliyevin IV Şuşa Qlobal Media Forumunda bəyanatlarını işıqlandırmaqda davam edir.
AZƏRTAC xəbər verir ki, “Kazinform”, “Tengrinews.kz”, “Zakon.kz”, “EL.kz”, “Kazakhstan Today”, “Liter.kz”, “Inbusiness.kz” və digər milli media orqanlarında Azərbaycan liderinin çıxışı ilə bağlı materiallar dərc olunub.
Dövlətimizin başçısının Azərbaycanın azad edilmiş ərazilərinin bərpasına Qazaxıstanın verdiyi töhfə ilə bağlı fikirlərinə geniş yer ayrılıb. Media orqanları Prezident İlham Əliyevin Füzulidə Uşaq Yaradıcılıq Mərkəzinin tikintisinə görə Prezident Kasım-Jomart Tokayevə və qazax xalqına minnətdarlıq ifadə edən sözlərini ön plana çıxarıb.
Qazaxıstan mediası Azərbaycan Prezidentinin Xəzər dənizinin sahillərində yerləşən ölkələr arasında nəqliyyat əməkdaşlığının inkişafı ilə bağlı açıqlamalarını da ətraflı işıqlandırıb. Materiallarda diqqətə çatdırılıb ki, Prezident İlham Əliyev Azərbaycan ilə Qazaxıstan arasında fəal əməkdaşlıq olmadan, Xəzər regionunda irimiqyaslı nəqliyyat layihələrinin həyata keçirilməsinin mümkün olmadığını bəyan edib.
Liman infrastrukturunun genişləndirilməsinə, həmçinin Azərbaycan, Qazaxıstan, Gürcüstan və Türkiyə arasında mövcud əməkdaşlıq formatına dair bəyanatlara xüsusi diqqət yetirilib. Qazaxıstan mediası dövlətimizin başçısına istinadla bildirib ki, tərəflər tarif siyasəti, nəqliyyatın rəqəmsallaşdırılması və gömrük administrasiyası prosedurlarının sadələşdirilməsi üzərində işləyir, həmçinin digər sahələrdə əməkdaşlığı inkişaf etdirirlər.
Materiallarda Prezident İlham Əliyevin 2024-cü ildə Bakıda Xəzər dənizinin dibi ilə enerji kabeli çəkilməsinə dair imzalanmış müqavilə haqqında fikirlərinə istinad edilir.
Məqalələrdə, həmçinin Qazaxıstan neftinin müəyyən həcmdə Azərbaycan ərazisindən nəqlinə başlanması qeyd olunur.
Qazaxıstan mediası Azərbaycan Prezidentinin tarixi Türküstan şəhərinə son səfəri ilə bağlı fikirlərinə istinadla qeyd edib ki, dövlət başçısı tarixi irsə və ulu əcdadların xatirəsinə göstərilən diqqəti yüksək qiymətləndirib.
