Prezident, Müzəffər Ali Baş Komandan İlham Əliyevin rəhbərliyi ilə Azərbaycanın əldə etdiyi tarixi Zəfər təkcə hərbi uğur kimi deyil, həm də ölkənin siyasi, iqtisadi və strateji inkişafında yeni mərhələnin başlanğıcıdır. Müharibədən sonrakı dövrdə dövlətin əsas prioriteti işğaldan azad edilmiş ərazilərin bərpası, həmin torpaqlarda həyatın yenidən qurulması və regionda uzunmüddətli sülhün möhkəmləndirilməsi olub.
Qarabağ və Şərqi Zəngəzurda həyata keçirilən genişmiqyaslı bərpa və yenidənqurma işləri Azərbaycanın müharibədən sonrakı inkişaf strategiyasının əsas istiqamətlərindən biridir. Ağalı kəndindən başlanan Böyük Qayıdış prosesi qısa müddətdə bütün azad edilmiş əraziləri əhatə edib. Prezident İlham Əliyevin təsdiq etdiyi Böyük Qayıdışa dair Dövlət Proqramı çərçivəsində bu günədək bərpa və quruculuq işlərinə 30 milyard manat vəsait ayrılması dövlətin bu məsələyə verdiyi xüsusi əhəmiyyətin göstəricisidir.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva söyləyib.
O bildirib ki, azad edilmiş ərazilərdə müasir yol-nəqliyyat infrastrukturu formalaşdırılır. Yeni avtomobil yollarının, o cümlədən Əhmədbəyli–Füzuli–Şuşa Zəfər yolu, Horadiz–Cəbrayıl–Zəngilan–Ağbənd magistralının və digər nəqliyyat layihələrinin inşası regionun iqtisadi potensialının reallaşdırılmasına, logistika imkanlarının genişlənməsinə və insanların rahat hərəkətinə xidmət edir. Dağlıq ərazilərdə tunellərin tikintisi isə bu layihələrin mühəndislik baxımından mürəkkəbliyini və əhəmiyyətini göstərir.
Füzuli, Zəngilan və Laçın beynəlxalq hava limanlarının istifadəyə verilməsi yalnız ölkədaxili nəqliyyat imkanlarını genişləndirmir, eyni zamanda, Azərbaycanın Orta Dəhlizdə mövqeyini daha da gücləndirən strateji addımlardan biri kimi qiymətləndirilir. Dəmir yolu infrastrukturunun yenilənməsi, xüsusilə Bakı–Xankəndi dəmir yolunun istifadəyə verilməsi istiqamətində görülən işlər də Qarabağın ölkənin ümumi iqtisadi və turizm məkanına inteqrasiyasını sürətləndirəcək.
"Qarabağ və Şərqi Zəngəzurun yaşıl enerji zonası elan edilməsi Azərbaycanın dayanıqlı inkişaf siyasətinin mühüm tərkib hissəsidir. Bölgədə Günəş və külək enerjisi üzrə həyata keçirilən layihələr gələcəkdə həm enerji təhlükəsizliyinin möhkəmlənməsinə, həm də ekoloji baxımdan davamlı inkişaf modelinin formalaşmasına xidmət edəcək.
Böyük Qayıdış Proqramının əsas istiqamətlərindən biri də əhalinin doğma torpaqlarına təhlükəsiz və layiqli şəkildə qayıdışının təmin edilməsidir. Köçürülən ailələr müasir yaşayış evləri ilə təmin olunur, məktəblər, xəstəxanalar və digər sosial obyektlər istifadəyə verilir. Eyni zamanda, yeni sənaye, emal və istehsal müəssisələrinin, sənaye parkları və aqroparkların yaradılması məşğulluğun artırılmasına və bölgənin iqtisadi fəallığının yüksəlməsinə xidmət edir.
İşğaldan azad edilmiş ərazilərin təsdiq olunmuş Baş planları əsasında şəhər və kəndlərin müasir şəhərsalma prinsiplərinə uyğun yenidən qurulması Qarabağ və Şərqi Zəngəzurun uzunmüddətli inkişaf konsepsiyasının əsas elementlərindən biridir", - deyə K.Əliyeva vurğulayıb.
Professor əlavə edib ki, dövlətimizin başçısının mütəmadi olaraq yeni yaşayış məntəqələrinin, sosial obyektlərin və istehsal müəssisələrinin açılışlarında iştirak etməsi bu prosesə verilən yüksək diqqətin göstəricisidir.
Bu gün Qarabağ və Şərqi Zəngəzurda həyata keçirilən quruculuq prosesi ümummilli həmrəyliyin mühüm nümunəsinə çevrilib. Ölkənin müxtəlif bölgələrindən gələn vətəndaşlar bu layihələrdə fəal iştirak edir. Hazırda bölgədə yaşayan, çalışan və təhsil alan insanların sayının 90 min nəfərə çatması, 2026-cı ilin sonunadək isə 140 min soydaşımızın doğma yurdlarına qayıdışının planlaşdırılması Böyük Qayıdış Proqramının uğurla həyata keçirildiyini göstərir. Bütün bunlar onu deməyə əsas verir ki, yaxın illərdə Qarabağ və Şərqi Zəngəzur Azərbaycanın iqtisadi inkişafının əsas hərəkətverici mərkəzlərindən birinə çevriləcək.
