Qarabağ Azərbaycandır!
Müzəffər Ali Baş Komandan İlham Əliyevin leksikonumuza gətirdiyi fəxarət dolu bu ifadəni bu gün hər birimiz qürurla söyləyirik.
Ucadan, ürəklə, ağızdolusu səsləndiririk!
Qalib ölkənin məğrur, xoşbəxt vətəndaşı kimi bütün dünyaya car çəkirik!
Ordusunu məhv etdiyimiz, özünü rəzil günə qoyduğumuz qorxaq düşmənə acıqla, qıcıqla eşitdiririk!
Bəli!
Müzəffər Ali Baş Komandan İlham Əli
yevin şücaəti və hünəri...
Azərbaycan Ordusunun, əsgər və zabitlərimizin qəhrəmanlığı...
Azərbaycan xalqının birliyi və dəyanəti, dövlətə və orduya dəstəyi sayəsində bütün dünyaya səslənirik:
Qarabağ Azərbaycandır!
***
Bu sözü söyləyə bilmək üçün çox uzun, sınaqlı və məşəqqətli yol keçdik.
Çadır şəhərciklərində yaşadıq, işsiz, çörəksiz, yayda istidə, qışda soyuqda qaldıq.
Bizim belə günə düşməyimizin səbəbkarlarından biri olan naşıların, şəxsi mənafeyini milli maraqlardan üstün tutanların, dövlət idarəçiliyindən xəbəri olmayanların yaratdıqları anarxiya, xaos və özbaşınalıq burulğanında boğulduq, olub-qalan ümidimizi itirdik.
Nə yaxşı ki, Ulu Öndərimiz geri qayıtdı, ölkəyə, dövlətə sahib çıxdı, ölmüş ümidlərimizi də diriltdi.
Təəssüf ki, əcəl Ümummilli Liderimiz Heydər Əliyevin öz planlarını tam həyata keçirməsinə imkan vermədi.
Bu siyasi kursu İlham Əliyev ləyaqətlə davam etdirdi, bütün ağırlığı və məsuliyyəti öz çiyinlərinə götürdü.
Beləliklə, müstəqil Azərbaycanın inkişafının İlham Əliyev erası başladı...
Cənab İlham Əliyev hakimiyyətə gəldiyi ilk günlərdən işğal altındakı torpaqların qaytarılması barədə düşünür, bu istiqamətdə əməli addımlar atırdı.
Amma məsələ o qədər də asan və sadə deyildi!
* BMT-nin Təhlükəsizlik Şurası qəbul etdiyi 4 məlum qətnaməsini yerinə yetirmək istəmirdi;
* ATƏT-in Minsk qrupu mənasız sülh danışıqları, boş turist səfərləri ilə baş qatırdı;
* Düşmən sülhə gəlmək, torpaqları danışıqlar yolu ilə qaytarmaq niyyətində olmadığını açıq-aşkar bəyan edirdi;
* Beynəlxalq hüquq işləmir, beynəlxalq təşkilatlar erməni mövqeyini müdafiə edir, ikili standartlar hökm sürürdü!
Belə bir məqamda Prezident İlham Əliyev ən doğru və uzaqgörən qərarını qəbul edərək Qarabağı hərbi yolla azad etmək üçün gərgin fəaliyyətə başladı, gizli və aşkar hazırlıqlara start verdi:
* Müstəqil Azərbaycanı tarixinin ən qüdrətli dövlətinə çevirdi;
* Hücum diplomatiyasının tətbiqinə başlanıldı və uğurlu nəticələrə nail olundu;
* Beynəlxalq qurum və təşkilatlarda Azərbaycanın haqq işinin müdafiəsi gücləndirildi, ölkəmiz özünə xeyli sayda yeni dostlar qazandı;
* Yeni gənclər nəsli tərbiyələndirilərək onların da iştirak etdiyi möhtəşəm ordu quruldu, ən yeni və müasir silahlarla silahlandırıldı;
* Xüsusi Təyinatlı Qüvvələr, yeni zabit kadrları korpusu hazırlandı;
* Azərbaycan xalqının milli birliyi yaradıldı, Azərbaycan cəmiyyəti bir yumruq halına gətirildi.
Ermənistanın yeni baş naziri Paşinyan "Qarabağ Ermənistandır və nöqtə" deyərək torpaqlarımızı geri verməyəcəklərini açıq şəkildə bəyan etdikdə isə Müzəffər Ali Baş Komandan İlham Əliyevin səbir kasası daşdı.
***
Azərbaycan Prezidenti cənab İlham Əliyev müasir dövrün ən müdrik, ən uzaqgörən, nəyi nə vaxt və necə edəcəyini yaxşı bacaran dövlət başçılarından sayılır.
İlham Əliyev Paşinyanın ağzından vurmağa, ona cavab verməyə tələsmədi, bunun üçün əlverişli məqam və məkan seçdi!
Diletant erməni baş nazirə bütün dünyanın eşidəcəyi yerdə cavab verdi.
Əvvəlcə "Valday" Beynəlxalq Diskussiya Klubunda Qarabağın kimə məxsus olduğunu ermənipərəstlərin də diqqətinə çatdırdı.
Münhen Təhlükəsizlik Konfransında isə Qarabağın məhz Azərbaycana məxsus olduğunu dünyaya bəyan etdi, tarixi faktlarla sübuta yetirdi.
Həm də Ermənistanın baş nazirinin yalanlarını ifşa etdi, hamının gözü qarşısında onu məsxərəyə qoydu!
Sonra isə "dəmir yumruğ"unu düyünlədi!
***
Qudurmuş Ermənistanı yerində oturtmaq, torpaqları azad etmək üçün 27 sentyabr 2020-ci ildə Müzəffər Ali Baş Komandan İlham Əliyevin əmri ilə əks-hücum əməliyyatına başlanıldı.
Sözü ilə əməli bir olan Azərbaycan Prezidenti İlham Əliyev Qarabağın həqiqətən Azərbaycana məxsus olduğunu əməli addımları, üç cəbhədə - hərbi əməliyyatlar, diplomatiya və informasiya savaşında möhtəşəm qələbələri ilə sübuta yetirdi!
Özünün qurduğu, strategiya və taktikasını müəyyən etdiyi qalib ordusu ilə!
XXI əsrin ən yeni müharibəsini aparan Azərbaycan Ordusu 44 gün ərzində möcüzələr yaratdı:
* Düşmənə göz açmağa imkan vermədi, yerdən, göydən başına od yağdırdı, bir-birinin ardınca şəhər və kəndləri, yaşayış məntəqələrini azad etdi.
* Erməni generallarını dabanlarına tüpürərək Azərbaycandan qaçmağa məcbur etdi, Ermənistan ordusunu fərarilər, qorxaqlar dəstəsinə çevirdi.
"Dəmir yumruğ"un qarşısında tab gətirməyən düşmən yalvara-yalvara kapitulyasiya aktına qol çəkdi!
***
Artıq bütün dünya bilir ki, Qarabağı Azərbaycana yenidən Müzəffər Ali Baş Komandan İlham Əliyev qaytardı!
Düşmənin "məğlubedilməz" ordusunu məhv edərək qaytardı!
Düşmənin başını əzərək, diz çökdürərək, qaranlıq bir yerdə kapitulyasiya aktına imza atdıraraq qaytardı!
Vətənpərvər, hünərli və qeyrətli Azərbaycan əsgər və zabitlərinin kütləvi rəşadəti və qəhrəmanlığı sayəsində qaytardı!
Yetişdirdiyi yeni nəsil gənclərin təmsil olunduğu Xüsusi Təyinatlı Qüvvələrin Şuşanı yalın əllə almaları hesabına qaytardı!
Qarabağ sözün həqiqi mənasında Azərbaycan oldu!
Qarabağ əbədi Azərbaycanın oldu!
Qarabağ əsl sahibinin, bu torpağa haqqı çatanların, onun uğrunda ölümə belə gedənlərin oldu!
Bu gün biz qalib millətik!
Bu gün biz məğrur millətik!
Bu gün biz birləşərək "dəmir yumruğ"a çevrilən millətik!
Müzəffər Ali Baş Komandan İlham Əliyevin yaratdığı "dəmir yumruğ"a!
***
Artıq bütün dünya bilir - Qarabağın əsl sahibləri geriyə, doğma yurdlarına qayıdıblar!
Artıq kimsədə şübhə yoxdur ki, Qarabağ Azərbaycandır!
Bəxtiyar SADIQOV
