Heydər Əliyev haqqında günlərlə danışa bilərəm. Xüsusilə vurğulamaq istəyirəm ki, o, yaddaşımda istər 12 dekabr, istər 10 may olsun, yalnız anım günlərində qalmayıb. O, həmişə mənimlədir.
Bunu AZƏRTAC-ın müxbiri ilə söhbətində Milli Məclisin deputatı, parlamentin Mədəniyyət komitəsinin sədri Polad Bülbüloğlu bildirib.
Bülbüloğlunun sözlərinə görə, dahi siyasətçi respublikaya rəhbərlik etməyə başladığı ilk vaxtlardan siyasətçi mədəniyyət və incəsənət xadimlərini dəstəkləyirdi.
Agentliyin müsahibi xatırladıb ki, 1960-cı illərin sonu elə bir dövr olub ki, çoxlu sayda azərbaycanlı bütün Sovet İttifaqında və onun hüdudlarından kənarda geniş şöhrət əldə edib və bu, daha çox Ümummilli Liderin diqqəti, tövsiyələri və real dəstəyi sayəsində baş verib.
“O, müstəqil Azərbaycanın prezidenti olanda mən artıq nazir işləyirdim. Məni bu vəzifədə saxlamaq və ya başqa bir yol təklif etmək onun iradəsində idi. Nəticədə mən onun komandasının tərkibində mədəniyyət naziri kimi on il çalışdım və bu, ən çətin illər idi. 1993-cü ildə xəzinə boş idi, respublika ağır vəziyyətdə idi, bir milyon qaçqın və köçkün vardı, Qarabağ işğal altında idi, bizə qarşı ədalətsiz müharibə başlamışdı və biz uzun müddət dünyaya aşkar həqiqəti çatdıra bilmirdik ki, təcavüzün qurbanı olmuşuq”, – deyə o, qeyd edib.
Bülbüloğlunun sözlərinə görə, məhz həmin dövrdə Heydər Əliyevin rəhbərliyi ilə yeni Azərbaycanın təməli qoyulub.
“Bu, bizim üçün böyük bir məktəb oldu, təkcə iş məktəbi yox, həyat məktəbi. O, bizə yalnız fəaliyyət göstərməyi deyil, düşünməyi də öyrədirdi: insanlara, problemlərə, məsuliyyətə doğru yanaşmağı. Ümummilli Lider bizə dürüst olmağı öyrədirdi və yəqin ki, elə ən vacibi də budur”, – deyə deputat vurğulayıb.
Parlament komitəsinin rəhbəri əlavə edib ki, həmin illər yaddaşında əbədi qalıb.
“Mən tez-tez Heydər Əliyevin sözlərini, məsləhətlərini, tapşırıqlarını xatırlayıram. Bu, təkcə xidmət deyildi, həyat idi; sözün əsl mənasında, sutkanın 24 saatı onunla bağlı bir həyat. Ona görə də mən nə qədər yaşasam da, onun adı və obrazı həmişə mənimlə olacaq”, – deyə Bülbüloğlu əlavə edib.
